ކުރީގެ ޑެޕިއުޓީ ބޮޑު ވަޒީރު ރޭނާ، ލޭބާ ޕާޓީގެ ލީޑަރު ކަމަށް ވާދަ ކުރައްވަން ތައްޔާރު

އިނގިރޭސިވިލާތުގެ ކުރީގެ ބޮޑު ވަޒީރުގެ ނާއިބު އެންޖެލާ ރޭނާ، ވެރިކަން ކުރާ ލޭބާ ޕާޓީގެ ލީޑަރުގެ މަގާމަށް ވާދަ ކުރައްވަން ތަައްޔާރަށް ހުންނެވި ކަމަށް، އޭނާގެ އަރިސް ބޭފުޅުން ބީބީސީ އަށް މައުލޫމާތު ދީފި އެވެ. 

ރޭނާގެ ފަރާތުން މިފަދަ އިޝާރާތެއް ލިބިފައި ވަނީ، އިނގިރޭސިވިލާތުގެ ސިޔާސީ މަސްރަހަށް ބޮޑެތި ބަދަލު ތަކެއް އަންނަމުންދާ ދަނޑިވަޅެއްގަ އެވެ. 

ރޭނާގެ އަރިސް ބޭފުޅުންނާ ހަވާލާދީ ބީބީސީ އިން ރިޕޯޓު ކޮށްފައިވާ ގޮތުގައި، ޕާޓީގެ ލީޑަރު ކަމުގެ މަގާމަށް ބޭފުޅަކު އިންތިޚާބު ކުރުމުގެ މަރުޙަލާ ކުރިއަށް ގެންދަން ޖެހިއްޖެ ޙާލަތެއްގައި، އެ މަގާމަށް ކުރިމަތިލެއްވުމަށް އޭނާ ހުންނެވީ ތައްޔާރަށެވެ. 

ނަމަވެސް، ވަގުތުން ވަގުތަށް ލީޑަރު ކަމުގެ ވާދަވެރި ކަމެއް ފެށުމަށް އޭނާ ބާރު އަޅުއްވަމުން ނު ގެންދަވާކަން ވެސް އެ ފަރާތްތަކުން ވަނީ ފާހަގަ ކޮށްފަ އެވެ. 

ހަމަ އެއާ އެކު، ލޭބާ ޕާޓީގެ ލީޑަރު ކަމަށް އެހެން ބޭފުޅަކު ވާދަ ކުރައްވަން ބޭނުން ވެއްޖެ ޙާލަތެއްގައި، އެ ބޭފުޅަކަށް ތާއީދު ކުރުމުގެ ވިސްނުން ވެސް ރޭނާ ގެންގުޅުއްވަފާނެ ކަމަށް ބުނެފައިވެ އެވެ. މިއީ ޕާޓީގެ އެތެރޭގެ އެއްބައިވަންތަކަން ހިފެހެއްޓުމަށް އޭނާ ގެންގުޅުއްވާ ސިޔާސަތެއް ކަމަށް ބެލެވެ އެވެ. 

ރޭނާ އަކީ ލޭބާ ޕާޓީގެ ތެރޭގައި ނުފޫޒު ގަދަ، އަދި އާންމުންގެ ތެރޭގައި ވަރަށް މަޤުބޫލު ބޭފުޅެކެވެ.، އޭނާ ލީޑަރު ކަމަށް ވާދަ ކުރައްވަން ތައްޔާރަށް ހުންނެވިކަން ހާމަވުމާ އެކު، ކުރިއަށް އޮތް ތަނުގައި ޕާޓީގެ އެތެރޭގެ ސިޔާސީ ޙަރަކާތްތައް އިތުރަށް ވަރުގަދަ ވެގެންދާނެ ކަމަށް މަސްރަހު ދިރާސާ ކުރާ ފަރާތްތަކުން ލަފާ ކުރެ އެވެ. 

މިކަން ރިޕޯޓު ކޮށްފައި މި ވަނީ އިނގިރޭސިވިލާތުގެ ސަރުކާރަށް ބޮޑެތި ފާޑު ކިޔުން ތަކެއް އަމާޒުވެ، ލޭބާ ޕާޓީގެ ތެރޭގައި އައު ލީޑަރަކު އިންތިޚާބު ކުރުމާ ގުޅޭ ގޮތުން ނުރަސްމީ މަޝްވަރާ ތަކެއް ކުރެވެމުންދާާ ވަގުތެެއްގަ އެވެ. ނަމަވެސް، މިކަމާ ގުޅޭ ގޮތުން ރޭނާ ރަސްމީކޮށް އެއްޗެއް ވިދާޅުވެފައި ނުވެ އެވެ.