ސައުތެމްޓަން އަތް ދަށުގެ އާސެނަލް ކަޓައިފި

އިނގިރޭސި އެފްއޭ ކަޕްގެ ކުއާޓާ ފައިނަލްގައި ސައުތެމްޓަން އަތުން ބަލިވެ، އާސެނަލް މުބާރާތުން ކަޓައިފި އެވެ.

ސައުތެމްޓަންގެ އަމިއްލަ ދަނޑުގައި ހޮނިހިރު ދުވަހުގެ ރޭ ދަންވަރު ކުޅުނު މެޗުގައި އެ ޓީމުން ވަނީ 2-1 އިން އާސެނަލް ބަލިކޮށްފަ އެވެ. މެޗުގައި ސައުތެމްޓަން އިން ލަނޑު ޖަަހައި ކުރި ހޯދާފައި ވަނިކޮށް، އާސެނަލް އިން ފަހަތުން އަރައި ނަތީޖާ ހަމަހަމަ ވެސް ކުރި އެވެ. ނަމަވެސް، ދެ ވަނަ ލަނޑެއް ޖަހައިގެން ސައުތެމްޓަން ވަނީ މެޗުން މޮޅުވެފަ އެވެ.

މެޗުގެ ފުރަތަމަ ހާފުގެ 35 ވަނަ މިނެޓުގައި ސައުތެމްޓަން އަށް ލީޑު ނަގައިދިނީ ރޮސް ސްޓެވާޓް އެވެ. މެޗުގައި ލަނޑު ޖަހައި ނަތީޖާ ހަމަހަމަ ކުރުމަށް އާސެނަލް އިން ކުރި މަސައްކަތް ކާމިޔާބު ކުރެވުނީ، ދެ ވަނަ ހާފުގެ 68 ވަނަ މިނެޓުގަ އެވެ. އެ ލަނޑު އާސެނަލް އަށް ޖަހައިދިނީ ވިކްޓަ ޔޮކަރޭސް އެވެ. އެއީ ކައި ހަވާޓްޒް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. މެޗުން ސައުތެމްޓަން މޮޅުވެފައި ވަނީ، މެޗުގެ ފުރިހަމަ ވަގުތު ހަމަވާން ފަސް މިނެޓަށް ވެފައި ވަނިކޮށް، ޝީ ޗާލްސް ޖެހި ލަނޑުންނެވެ.

ސައުތެމްޓަން އަތުން ބަލިވެ އެފްއޭ ކަޕް އިން އާސެނަލް ކަޓާފައިވާއިރު، ދާދި ފަހުން އާސެނަލް ވަނީ ކަރަބޯ ކަޕްގެ ފައިނަލްގައި މެންޗެސްޓަރ ސިޓީ އަތުން ވެސް ބަލިވެފަ އެވެ. މި ސީޒަންގެ އިނގިރޭސި ޕްރިމިއާ ލީގު ތާވަލްގެ އެއް ވަނައިގައި އާސެނަލް އޮތްއިރު، ޔުއެފާ ޗެމްޕިއަންސް ލީގުގައި ވެސް އެ ޓީމު އޮތީ ކުއާޓާ ފައިނަލްގަ އެވެ.