ފޯކަސް އޮތީ މެޗަކަށް ފަހު މެޗަކަށް، ކުޅުމުގެ ފެންވަރު އެއްވަރެއްގައި ހުންނަން ޖެހޭ: ފްލިކް

ބާސެލޯނާގެ ފޯކަސް އޮތީ ކުރިއަށް އޮތް މެޗަށް ކަމަށާއި، އެ ޓީމުގެ ކުޅުމުގެ ފެންވަރު އެއްވަރެއްގައި ހުންނަން ޖެހޭ ކަމަށް ބާސެލޯނާގެ ކޯޗު ހަންސީ ފްލިކް ބުނެފި އެވެ.

ފްލިކް މިހެން ބުނެފައި ވަނީ، ހޮނިހިރު ދުވަހުގެ ރޭ ދަންވަރު ރަށުން ބޭރުގައި އޮސަސޫނާއާ ދެކޮޅަށް ބާސެލޯނާ ކުޅޭ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުންނެވެ. އެ މެޗަށް ނިކުންނައިރު ބާސެލޯނާ އިން ވަނީ ސްޕެނިޝް ލީގު ކާމިޔާބު ކުރުމާ ގާތަށް ޖެހިލައިފަ އެވެ.

ފްލިކް ބުނީ އޮސަސޫނާ އަކީ ވެސް އިިދިކޮޅަށް ކުޅެން ވަރުގަދަ ޓީމެއް ކަމަށާއި، އެ ޓީމާ މެދު ސަމާލުވާން ޖެހޭނެ ކަމަށެވެ. އޭނާ ބުނީ އޮސަސޫނާއާ ދެކޮޅަށް ބާސެލޯނާ އިން ދައްކަން ޖެހޭނީ، އެންމެ ފަހުން ލީގުގައި ގެޓާފޭއާ ދެކޮޅަށް ކުޅުނު މެޗުގައި ވެސް ދެއްކި ފެންވަރުގެ ކުޅުމެއް ކަމަށެވެ. ޚާއްސަކޮށް ޑިފެންސްގައި މޮޅު ކުޅުމެއް ދެއްކުމާ އެކު، ލިބޭ ފުރުސަތުގެ ބޭނުން ހިފަން ޖެހޭނެ ކަަމަށް ފްލިކް ބުންޏެވެ. އެއާ އެކު ފްލިކް ބުނީ، އޭނާ މިވަގުތު ދައްކާނީ އޮސަސޫނާ މެޗުގެ ވާހަކަ ކަމަށާއި، އޭގެ ފަހުން ހުރި މެޗު ތަކުގެ ވާހަކަ މިވަގުތު ނުދައްކާނެ ކަމަށެވެ.

މީގެ އިތުރުން ސްޕެނިޝް ލީގާ ގުޅޭ ގޮތުން ސުވާލު ކުރުމުން ފްލިކް ބުނީ، މިވަގުތު އެ ވާހަކަ ދައްކަން ބޭނުން ނުވާ ކަމަށެވެ. އަދި އެކަމުގެ ސަބަބުން ޓީމުގެ ރޫހަށް އަދި ކުޅުންތެރިންގެ ވިސްނުމަށް ބަދަލެއް އަަންނަން ބޭނުން ނުވާ ކަމަށް ވެސް ފްލިކް ބުންޏެވެ. ފްލިކް ބުނީ، ފޯކަސް އޮތީ މެޗަކަށް ފަހު މެޗަކަށް ކަމަށާއި، ބާސެލޯނާ އިން ބޭނުން ވަނީ ކޮންމެ މެޗަކުން ވެސް މޮޅުވާން ކަމަށެވެ. އެގޮތުން އޭނާ ބުނީ ލީގުގައި ބާކީ ބާސެލޯނާ އަށް އޮތީ ވެސް އުނދަގޫ މެޗު ތަކަކަށް ވާނެ ކަމަށެވެ. ބާސެލޯނާ އިން އެ ޓީމުގެ އެންމެ މޮޅު ކުޅުން ދައްކަން ޖެހޭނެކަން ފާހަގަކޮށް ފްލިކް ބުނީ، ޓީމުގެ މުޅި ސްކޮޑު އޮތީ ތައްޔާރަށް ކަމަށެވެ. 

އޮސަސޫނާއާ ދެކޮޅަށް ނިކުންނައިރު، ބާސެލޯނާ އެއް ވަަނައިގައި އޮތީ 11 ޕޮއިންޓުގެ ލީޑަކުންނެވެ. އެއީ މިހާތަނަށް ލީގުގައި ކުޅެފައިވާ 33 މެޗުން 85 ޕޮއިންޓާ އެކު އެވެ. ހަމަ އެ އަދަދަށް މެޗު ކުޅެގެން ދެ ވަނައިގައި ވާދަވެރި ރެއާލް މެޑްރިޑަށް ލިބެނީ 74 ޕޮއިންޓެވެ.