ބޮޑު ވަޒީރު ސްޓާމަރއާ ދެކޮޅަށް ލޭބަރ ޕާޓީގެ މެމްބަރު ވެސްޓް ތެދުވެއްޖެ، ވިދާޅުވީ ކެބިނެޓުން އަންގާރަ ދުވަހުގެ ނިޔަލަށް ގޮތެއް ނިންމަން ޖެހޭނެ ކަމަށް

އިނގިރޭސިވިލާތުގައި ވެރިކަން ކުރަމުން އަންނަ ލޭބަރ ޕާޓީ އަށް ލިބުނު ބޮޑު ނާކާމިޔާބާ ގުޅިގެން، ސަރުކާރުގެ ކެބިނެޓުން ގޮތެއް ނުނިންމައިފި ނަމަ، އޭނާ އަމިއްލަ އަށް ލީޑަރު ކަމަށް ނިކުންނަވާނެ ކަމަށް ލޭބަރ ޕާޓީގެ ޤާނޫނު ހަދާ މަޖިލީހުގެ މެމްބަރު ކެތެރިން ވެސްޓް ވިދާޅުވެއްޖެ އެވެ. 

ބީބީސީ އަށް ދެއްވި ޚާއްސަ އިންޓަވިޔުއެއްގައި ވެސްޓް ވިދާޅުވީ، އޭނާ އަށް ފެންނަ އެންމެ ރަނގަޅު ޙައްލަކީ ކެބިނެޓުން ބޮޑު ވަޒީރާ މަޝްވަރާ ކުރައްވައި، ބޮޑު ވަޒީރު ކިއާ ސްޓާމަރ ގެ ބަދަލުގައި އެހެން މީހަކު ކުރިއަށް ނެރުން ކަމަށެވެ. އޭރުން ލޭބަރ ޕާޓީގެ ލީޑަރު ހޮވުމަށް އިންތިޚާބެއް ބާއްވާކަށް ނުޖެހޭނެ އެވެ. 

ލޭބަރ ޕާޓީ އަށް އެންމެ ފަހުން އޮތް އިންތިޚާބު ތަކުގައި ލިބުނު ބޮޑު ނާކާމިޔާބީގެ ފަހުން ވާހަކަ ދައްކަވަމުން ވެސްޓް ވިދާޅުވީ، އޭނާ ގެންދަވަނީ ކެބިނެޓުގެ މެމްބަރުންނަށް އިންޒާރު ދެއްވަމުން ކަމަށެވެ. އަދި އަންގާރަ ދުވަހުގެ ނިޔަލަށް އެކަމަށް ގޮތެއް ނިމި، ލީޑަރު ކަމަށް އެހެން މީހަކު ނުހޯދިއްޖެ ނަމަ، ލޭބަރ ޕާޓީގެ މެމްބަރުންގެ ތާއީދު ހޯއްދަވަން އޭނާ ފައްޓަވާނެ ކަމަށް ވެސްޓް ވިދާޅުވި އެވެ. 

އެކަން ކުރުމަށްޓަކައި ލޭބަރ ޕާޓީގެ ޤާނޫނު ހަދާ މަޖިލީހުގެ މެމްބަރުންގެ ތެރެއިން 20 އިންސައްތަ މެމްބަރުންގެ ތާއީދު ބޭނުންވާނެ އެވެ. އެއީ 81 މެމްބަރުންގެ ތާއީދެވެ. 

ކުރީގެ ޖޫނިއާ ފޮރިން އޮފީސް މިނިސްޓަރު ވެސްޓް ވިދާޅުވީ، ލޭބަރ ޕާޓީގެ ލީޑަރު ކަމަށް ކުރިމަތިލުމަށް މިހާރު 10 މެމްބަރުންގެ ތާއީދު އޭނާ އަށް އޮތް ކަމަށެވެ. އަދި އެ 10 މެމްބަރުންގެ އަދަދު އިތުރުކޮށް، ވޯޓި ނެގުމަށް ބޭނުންވާ އަދަދު ފުރިހަމަ ވާނެ ކަމުގެ ޔަޤީންކަން އޮތް ކަމަށް ވެސް ވެސްޓް ވަނީ ވިދާޅުވެފަ އެވެ. 

ހޯންސީ އެންޑް ފްރިއަން ބާނެޓްގެ މެމްބަރު ވިދާޅުވީ، އޭނާގެ އެންމެ ރަނގަޅު ޙައްލަކީ ކެބިނެޓުން އެމީހުންގެ ތެރޭގައި ބަދަލު ތަކެއް ގެނައުން ކަަމަށާއި، މިހާރުގެ ބޮޑު ވަޒީރު ސްޓާމަރ އަށް އެހެން ރޯލެއް ދިނުން ކަމަށެވެ. މިސާލެއްގެ ގޮތުގައި އޭނާ ވިދާޅުވީ، ސްޓާމާ އަށް ބައިނަލްއަޤުވާމީ ރޯލެއް ވެސް ދެވިދާނެ ކަމަށެވެ. 

ނަމަވެސް، ސަރުކާރުގެ ކެބިނެޓު އޮފީސް މިނިސްޓަރު ނިކް ތޯމަސް ސިމަންޑްސް ވިދާޅުވީ، އެ ހުށަހެޅުމާ ދެކޮޅު ހެއްދެވުމަށް ކެބިނެޓުގެ ވަޒީރުންނަށް "އިންޒާރު" ދެއްވާނެ ކަމަށެވެ. އޭނާ ވިދާޅުވީ ފާއިތުވި 10 އަހަރަށް ބަލާއިރު ވެސް، ސަރުކާރުގައި އޮންނަ ޕާޓީ އިން ލީޑަރު ބަދަލު ކުރުމަކީ މާ ރަނގަޅު ކަމެއް ކަަމަށް ފާހަގަވެފައި ނުވާ ކަމަށެވެ. 

ތަޖުރިބާކާރުން ބުނާ ގޮތުގައި ލޭބަރ ޕާޓީގެ ލީޑަރު ކަމަށް ވަޑައިގެންނެވުމަށް ވެސްޓް އަމިއްލަ އަށް މަސައްކަތް ނުކުރެއްވި ނަމަވެސް، އެ މަގާމަށް އެހެން ބޭފުޅަކު ގެންނަން ވެސް އޭނާ މަސައްކަތް ކުރައްވަފާނެ އެވެ. އެހެންކަމުން، މިވަގުތު ވެރިކަން ކުރާ ލޭބަރ ޕާޓީގެ ތެރޭގައި ނުތަނަވަސްކަން އޮންނާނެ ކަމަށް ތަޖުރިބާކާރުން އަންނަނީ ފާހަގަ ކުރަމުންނެވެ. 

އިންތިޚާބުގެ ނަތީޖާ އަށް ފަހު ބޮޑު ވަޒީރު ސްޓާމަރ ވިދާޅުވެފައި ވަނީ، މަގާމުން އިސްތިއުފާ ނުދެއްވާނެ ކަމަށެވެ. އޭނާ ވިދާޅުވީ ބޮޑު ވަޒީރު ކަމުން އިސްތިއުފާ ދެއްވައި، އެ ޤައުމު ހަލަބޮލި ކަމެއްގެ ތެރެއަށް ނުގެންދަވާނެ ކަމަށާއި، އޭގެ ބަދަލުގައި އެކުވެރި ކުރުމަށް މަސައްކަތް ކުރައްވާނެ ކަމަށެވެ. އިނގިރޭސިވިލާތުގެ ކައުންސިލް އިންތިޚާބު ތަކާއި، ވޭލްސް އަދި ސްކޮޓްލެންޑުގެ ޕަރލަމެންޓް އިންތިޚާބު ތަކުގައި ލޭބަރ ޕާޓީ އަށް ވަނީ ބޮޑު ނާކާމިޔާބެއް ކުރިމަތިވެފަ އެވެ.