ވެރިކަން ކުރާާ ލޭބާ ޕާޓީ އަށް ލަދުވެތި ނާ ކާމިޔާބެއް، ބޮޑު ވަޒީރު ސްޓާމާ ވިދާޅުވީ އިސްތިއުފާ ނުދެއްވާނެ ކަމަށް

އިނގިރޭސިވިލާތުގައި ވެރިކަން ކުރަމުން އަންނަ ލޭބާ ޕާޓީ އަށް އިންތިޚާބުގައި ލަދުވެތި ނާކާމިޔާބެއް ކުރިމަތިވެފައިވާއިރު، މަގާމުން އިސްތިއުފާ ދެއްވައި، ޤައުމު ހަމަ ނުޖެހުމަކަށް ދިޔުމުގެ ފުރުސަތު ނުދެއްވާނެ ކަމަށް އިނގިރޭސިވިލާތުގެ ބޮޑު ވަޒީރު ކިއާ ސްޓާމާ ވިދާޅުވެއްޖެ އެވެ. 

އިނގިރޭސިވިލާތާާއި، ސްކޮޓްލެންޑް އަދި ވޭލްސްގައި ބޭއްވި އިންތިޚާބުގެ ނަތީޖާ އިން ބޮޑު ވަޒީރު ސްޓާމާ އަށް ޕްރެޝަރު ބޮޑުވެފައިވާއިރު، ލޭބާ ޕާޓީގެ ބައެއް މެމްބަރުން ވެސް ވަނީ ސްޓާމާ މަގާމުން ދުރަށް ޖެހިލަން ޖެހޭ ކަމަށް ވިދާޅުވެފަ އެވެ. 

ލޭބާ ޕާޓީ އަށް ވޭލްސްގެ ވެރިކަން ގެއްލިފައިވާއިރު، މިއީ އެ ޕާޓީ އިން 27 އަހަރު ވަންދެން ވޭލްސްގައި ކުރަމުން އައި ވެެރިކަން ބަދަލުވި ފަހަރެވެ. ސްކޮޓްލެންޑުގައި އެންމެ ބޮޑު ކާމިޔާބެއް އޭއެސްޕީ. އިން ހޯދި ނަމަވެސް، އިނގިރޭސިވިލާތުގައި ރިފޯމް ޔޫކޭ އިން ވަނީ ބޮޑު ކާމިޔާބެއް ހޯދައިފަ އެވެ. 

ރިފޯމް ޔޫކޭ އިން 1400 އަށް ވުރެ ގިނަ ގޮނޑި ކާމިޔާބު ކޮށްފައިވާއިރު، ލޭބާ ޕާޓީ އާއި ކޮންސަވޭޓިވް ޕާޓީ އިން ތާރީޚީ ގޮތުން ވެރިކަން ކުރަމުން އައި ސަރަހައްދު ތަކުގައި ވެސް ކައުންސިލް ތަކުގެ ކޮންޓްރޯލް އެ ޕާޓީ އިން ވަނީ ހޯދައިފަ އެވެ. ބީބީސީގެ އެނަލިސްޓުން އަންދާޒާ ކޮށްފައިވާ ގޮތުގައި، 26 އިންސައްތަ އާއެކު އެންމެ ކުރީގައި އޮތީ ވެސް ރިފޯމް ޔޫކޭ އެވެ. 

ގްރީން ޕާޓީ އިން 18 އިންސައްތަ އާއެކު ދެ ވަނައިގައި އޮތްއިރު، ތިން ވަނަ އަށް ދިޔަ ކޮންސަވޭޓިވް ޕާޓީ އަށް ލިބިފައި ވަނީ 17 އިންސައްތަ އެވެ. މިއީ އިނގިރޭސިވިލާތުގައި ބޮޑު ދެ ބާާރުގެ ގޮތުގައި އޮތް ލޭބާ ޕާޓީ އާއި، ކޮންސަވޭޓިވް ޕާޓީގެ ތާއީދު ދަށްވެފައިވާ ކަމުގެ ހެއްކެއް ކަމަށް ތަޖުރިބާކާރުން ފާހަގަ ކޮށްފައިވެ އެވެ. 

ލޭބާ ޕާޓީ އަށް އިނގިރޭސިވިލާތުގެ އުތުރާއު މެދު ތެރޭގައި 1100 އަށް ވުރެ ގިނަ ކައުންސިލް ގޮނޑި ގެއްލިފައިވާއިރު، ވޭލްސްގައި ޕްލައިޑް ސިމްރީ އަކީ އެންމެ ބޮޑު ޕާޓީ އަށް ވެފައިވާއިރު، ރިފޯމް ޔޫކޭ ވެފައި ވަނީ އިދިކޮޅު ޕާޓީ އަށެވެ. ސްކޮޓްމެންޑުގައި އޭއެސްއެންޕީ އިިން އެންމެ ބޮޑު ޕާޓީގެ ގޮތުގައި އޮތް ނަމަވެސް، ބޮޑު މެޖޯރިޓީއެއް ލިބިފައި ނުވެ އެވެ. 

މި ނަތީޖާ އާއެކު ބޮޑު ވަޒީރު ސްޓާމާގެ މުސްތަޤުަބަލާ މެދު ސުވާލު ތަކެއް އުފެދިފައިވާއިރު، އޭނާ ވިދާޅުވެފައި ވަނީ ބައިބައިވުން ތަކުގައި ނުޖެހި، އެކުވެރި ކަމުގެ މަގުން ޤައުމު ކުރިއަށް ގެންދަވާނެ ކަމަށެވެ. ބޮޑު ވަޒީރަށް ޕްރެޝަރު ބޮޑުވެފައިވާއިރު، ހެލްތު ސެކްރެޓަރީ ވެސް ސްޓްރީޓިން ވިދާޅުވެފައި ވަނީ ސަރުކާރުން ގޯސްތަކުގެ ޒިންމާ ނަގާނެ ކަމަށާއި، ބޮޑު ވަޒީރަށް ފުރިހަމަ އަށް އިތުބާރު އޮތް ކަމަށެވެ. 

ނަމަވެސް، ވެރިކަން ކުރާ ލޭބާ ޕާޓީގެ 22 މެމްބަރަކު ހުކުރު ދުވަހު ވަނީ، ބޮޑު ވަޒީރު ސްޓާމާ އިސްތިއުފާ ދެއްވުމަށް ގޮވާލައްވައިފަ އެވެ. އެގޮތުން ވަގުތީ ތާވަލެއް އެކުލަވާލައި، މަގާމުން ދުރަށް ވަޑައިގެންނެވުމަކީ އެންމެ ރަނގަޅު ގޮތް ކަމަށް އެ މެމްބަރުން ވަނީ ގޮވާލައްވައިފަ އެވެ. މިއީ ބޮޑު ވަޒީރު ކަމާ ހަވާލުވެ ވަޑައިގެންނެވި ފަހުން، އިސްތިއުފާގެ ޕްރެޝަރާ ސްޓާމާ އަށް ކުރިމަތިލާން ޖެހުނު ދެ ވަނަ ފަހަރެވެ.

އިނގިރޭސިވިލާތުގެ ކެބިނެޓުގެ ގިނަ ވަޒީރުން ވަނީ ބޮޑު ވަޒީރު ސްޓާމާ އަށް ތާއީދު އޮތް ކަމަށް ހާމަ ކުރައްވައިފަ އެވެ. އެގޮތުން ޗާންސެލަރު ރޭޗަލް ރީވްސް ވިދާޅުވީ، ބޮޑު ވަޒީރު ސްޓާމާ އަށް އޮތީ ޤައުމު ބަދަލު ކުރުމުގެ މެންޑޭޓު ހަވާލުވެފައި ކަމަށެވެ.