ފަލަސްޠީނަށް ތާއީދުކޮށް ބާއްވާ އެއްވުންތައް މަނާ ކުރުމަކީ ކުރަން ޖެހޭ ކަމެއް: އިނގިރޭސި ބޮޑު ވަޒީރު ސްޓާމާ

ފަލަސްޠީނަށް ތާއީދުކޮށް އިނގިރޭސިވިލާތުގައި ބާއްވަމުންދާ މުޒާހަރާ ތަކުގައި ނަފުރަތު ފެތުރުމަށް ގޮވާލާ ނަމަ، އެފަދަ އެއްވުންތައް މަނާ ކުރުމަކީ ކުރަން ޖެހޭ ކަމެއް ކަމަށް އިނގިރޭސިވިލާތުގެ ބޮޑު ވަޒީރު ކިއާ ސްޓާމާ ވިދާޅުވެއްޖެ އެވެ.

ހޮނިހިރު ދުވަހު ދެއްވި އިންޓަވިޔުއެއްގައި ބޮޑު ވަޒީރު ސްޓާމާ ވިދާޅުވީ ޚިޔާލު ފާޅު ކުރުމުގެ މިނިވަންކަމާއި، ސުލްޙަވެރި މުޒާހަރާ ތަަކަށް އޭނާ ތާއީދު ކުރެއްވި ނަމަވެސް، ވަކި އިންތަކެއް ހުންނަން ޖެހޭނެ ކަމަށެވެ. 

ބޮޑު ވަޒީރު ސްޓާމާ މިހެން ވިދާޅުވެފައި ވަނީ، އިނގިރޭސިވިލާތުގައި ޔަހޫދީންނާ ދެކޮޅު ޙަރަކާތްތައް އިތުރުވަމުންދާ ކަމަށް ބުނެ، އޭނާ އަށް ބޮޑެތި ފިއްތުން ތަކެއް ކުރިމަތިވެފައިވާ ދަނޑިވަޅެއްގަ އެވެ. މިގޮތުން، މި ހަފުތާގައި ލަންޑަންގެ އުތުރުގައި އޮންނަ، ގިނަ އަދަދެއްގެ ޔަހޫދީން ދިރިއުޅޭ ގޯލްޑާސް ގްރީން ސަރަހައްދުގައި ދެ މީހަކަށް ވަޅިން ހަމަލާދީ ޒަޚަމުކޮށްލާފައިވެ އެވެ. މި މައްސަލައިގައި ތުހުމަތު ކުރެވޭ ސޯމާލިއާ އަށް އުފަން، އުމުރުން 45 އަހަރުގެ އިނގިރޭސި ރައްޔިތަކު ހައްޔަރު ކޮށްފައިވެ އެވެ. އަދި އޭނާގެ މައްޗަށް ވަނީ މީހަކު މަރާލަން އުޅުމުގެ ދައުވާ އުފުލައިފަ އެވެ.

ބޮޑު ވަޒީރު ސްޓާމާ ބުރާސްފަތި ދުވަހު އެ ސަރަހައްދަށް ޒިޔާރާތް ކުރައްވާފައިވާއިރު، އެތަނަށް އެއްވި ބައެއް މީހުން ވަނީ ބޮޑު ވަޒީރާ ދެކޮޅަށް އަޑު އުފުލައިފަ އެވެ. އަދި ޚާއްސަކޮށް، ޔަހޫދީންގެ ރައްކާތެރި ކަމަށް އެކަށީގެންވާ މަސައްކަތެއް ނުކުރާ ކަމަށް ބުނެ އަޑު އުފުލާފައިވެ އެވެ. މީގެ އިތުރުން 2023 ވަނަ އަހަރުގެ އޮކްޓޫބަރު މަހުގެ ހަތް ވަނަ ދުވަހު ހަމާސް އިން އިޒްރޭލް އަށް ދިން ހަމަލާއާ ގުޅިގެން ފެށުނު ޣައްޒާ ހަނގުރާމައާ ދެކޮޅަށް، އިނގިރޭސިވިލާތުގެ އެކި ސިޓީ ތަކުގައި ބާއްވަމުންދާ މުޒާހަރާތައް ހުއްޓުވުމަށް ވެސް އެ މީހުން ވަނީ ގޮވާލައިފަ އެވެ. 

ބީބީސީ އަށް ދެއްވި އިންޓަވިޔުއެއްގައި ސްޓާމާ ވިދާޅުވީ، މުޒާހަރާތައް ތަކުރާރުވަމުންދާ ގޮތުގެ ސަބަބުން ގިނަ އަދަދެއްގެ ޔަހޫދީންނަށް ނަފްސާނީ ގޮތުން އަސަރު ކޮށްފައިވާ ކަމަށެވެ. ވަކިން ޚާއްސަކޮށް، "ގްލޯބަލައިޒް ދަ އިންތިފާދާ" މުޅި ދުނިޔެ އަށް ފަތުރާލުމަށް ގޮވާލާ ގޮވުން ތަކަކީ ބަލައިގަނެވޭނެ ކަމެއް ނޫން ކަމަށާއި، އެފަދަ ކަންކަމާ މެދު ހަރުކަށި ފިޔަވަޅު އަޅަން ޖެހޭ ކަމަށް ވެސް އޭނާ ވިދާޅުވި އެވެ. މި ޙަރަކާތަކީ 1987 އިން 1993 އަށް، އަދި 2000 ގެ ކުރީ ކޮޅު އިޒްރޭލްގެ އިސްތިއުމާރާ ދެކޮޅަށް ފަލަސްޠީނުގެ ރައްޔިތުންގެ ހައްގުގައި ކުރިއަށް ގެންދާ ޙަރަކާތެކެވެ. 

އިންސާނީ ހައްގުތަކާ ބެހޭ ވަކީލެއްގެ ގޮތުގައި މީގެ ކުރިން މަސައްކަތް ކުރައްވާފައިވާ، އަދި އަނބިކަނބަލުންނަކީ ޔަހޫދީ ދަރިކޮޅުގެ ބޭފުޅަކަށްވާ ސްޓާމާ އިތުރަށް ވިދާޅުވީ، މުޒާހަރާ ތަކުގައި ބޭނުން ކުރާ ބަސް މަގު އިތުރަށް މޮނިޓާ ކުރަން ޖެހޭ ކަމަށެވެ. އަދި ބައެއް ޙާލަތް ތަކުގައި މުޒާހަރާތައް މުޅިން ހުއްޓުވަން ޖެހިދާނެ ކަމަށާއި، އެކަމާ ގުޅޭ ގޮތުން ފުލުހުންނާ އެކު މަޝްވަރާތައް ކުރިއަށްދާ ކަމަށް ވެސް އޭނާ ވިދާޅުވި އެވެ.