ޙަކީމީ ޕީއެސްޖީ ދޫކޮށް ނުލާނެ ކަމަށް އޭނާގެ އެޖެންޓު ބުނެފި

ފްރާންސްގެ ޕެރިސް ސެއިންޓް ޖާމަން (ޕީއެސްޖީ) އަށް ކުޅެމުން އަންނަ މޮރޮކޯގެ ޑިފެންޑަރު އަޝްރަފް ޙަކީމީ އެ ކުލަބު ދޫކޮށްލުމުގެ ފުރުސަތެއް ނެތް ކަމަށް، އޭނާގެ އެޖެންޓު ބުނެފި އެވެ.

އެންމެ ފަހުން ޙަކީމީ ޕީއެސްޖީގެ އެއްބަަސްވުން އައު ކޮށްފައި ވަނީ 2025 ވަނަ އަހަރު އެވެ. އެފަހަރު އެ ކުލަބާ އެކު އޭނާ ސޮއި ކުރި ހަތަރު އަހަރު ދުވަހުގެ އެއްބަސްވުމުގެ މުއްދަތު ހަމަވާނީ 2029 ވަނަ އަހަރު އެވެ. އޭނާގެ އެއްބަސްވުމުގެ މުއްދަތު ހަމަވާން އަދި ތިން އަހަރު އެބަ އޮތެވެ.

ޙަކީމީގެ މުސްތަޤުބަލާ ގުޅޭ ގޮތުން ވާހަކަ ދައްކަމުން އޭނާގެ އެޖެންޓު ބުނީ، ޙަކީމީ ޕީއެސްޖީ ދޫކޮށްލުމުގެ އެއްވެސް ފުރުސަތެއް ނެތް ކަމަށެވެ. އެގޮތުން އެއްބަސްވުމުގެ މުއްދަތު ހަމަވާން އަދި ތިން އަހަރު އޮތްއިރު، އޭނާ ޕީއެސްޖީ ދޫކޮށް ނުލާނެ ކަމަށް އެޖެންޓު ބުންޏެވެ. ހަމަ އެހެންމެ، އެހެން ކުަލަބަކަށް ބަދަލުވުމުގެ އެއްވެސް ވާހަކައެއް ވެސް ނުދެކެވޭ ކަމަށް ވެސް އެޖެންޓު ވަނީ ބުނެފަ އެވެ.

މީގެ އިތުރުންް ޙަކީމީގެ އެޖެންޓު ބުނީ، އޭނާ ޕީއެސްޖީގައި ހުރީ ވަރަށް ހިތްހަމަ ޖެހިގެން އަދި އުފަލުން ކަމަށެވެ. އަދި ޙަކީމީ ބޭނުން ވަނީ ޕީއެސްޖީ އާއެކު ދެ ވަނަ ފަހަރަށް ޔުއެފާ ޗެމްޕިއަންސް ލީގު ކާމިޔާބު ކުރަން ކަމަށް ވެސް އޭނާގެ އެޖެންޓު ވަނީ ބުނެފަ އެވެ. އެއާ އެކު، ޕީއެސްޖީ އާއެކު އެންމެ ދިގު މުއްދަތެއް ހޭދަ ކުރަން ވެސް ޙަކީމީ ބޭނުންވާ ކަމަށް އޭނާގެ އެޖެންޓު ބުނެފައިވެ އެވެ.

އިންޓަރ މިލާން ދޫކޮށްލުމަށް ފަހު، އުމުރުން 27 އަހަރުގެ ޙަކީމީ ޕީއެސްޖީ އަށް ބަދަލުވީ 2021 ވަނަ އަހަރު އެވެ. އޭގެ ފަހުން މި ފާއިތުވި މުއްދަތުގެ ތެރޭގައި އޭނާ ވަނީ ޕީއެސްޖީ އަށް 199 މެޗު ކުޅެދީ 28 ލަނޑު ޖަހައިފަ އެވެ. އަދި ޕީއެސްޖީ އާއެކު އޭނާ ވަނީ 11 ތައްޓެއް ވެސް ކާމިޔާބު ކޮށްފަ އެވެ. އޭގެ ތެރޭގައި ފްރާންސް ލީގު ހަތަރު ފަހަރު ކާމިޔާބު ކުރުމުގެ އިތުރުން، ޕީއެސްޖީގެ ތާރީޚުގައި ފުރަތަމަ ފަހަރަށް ޗެމްޕިއަންސް ލީގު ކާމިޔާބު ކުރުން ވެސް ހިމެނެ އެވެ.