މޮނާކޯ އަތް ދަށުވެ، ޕީއެސްޖީ އަށް ލީޑު ފުޅާ ނުކުރެވުނު
މެޗުން ބަލިވެ ޕީއެސްޖީ އެއް ވަނައިގައި އޮތީ، މިހާތަނަށް އެ ޓީމު ކުޅެފައިވާ 25 މެޗުން 57 ޕޮއިންޓާ އެކު. ޕީއެސްޖީ އަށް ވުރެ އެއް މެޗު މަދުން ކުޅެގެން ދެ ވަަނައިގައި ލެންސް އަށް 53 ޕޮއިންޓު ލިބޭއިރު، މެޗުގެ އަދަދު ހަމަކޮށް ފަރަގު ކުޑަ ކުރުމުގެ ފުރުސަތު ލެންސް އަށް އޮންނާނެ.
މެޗުގައި ލަނޑު ޖެހުމަށް ފަހު މޮނާކޯގެ ކުޅުންތެރިން އުފާ ފާޅު ކުރަނީ | ރޮއިޓާސް
ފްރާންސް ލީގުގައި މޮނާކޯއާ ދެކޮޅަށް ކުޅުނު މެޗުން ބަލިވެ، ލީޑު ފުޅާ ކުރަން ލިބުނު ފުރުސަތު ޗެމްޕިއަން ޕެރިސް ސެއިންޓް ޖާމަން (ޕީއެސްޖީ) އިން ނަގާލައިފި އެވެ.
ޕީއެސްޖީގެ އަމިއްލަ ދަނޑުގައި ހުކުރު ދުވަހުގެ ރޭ ދަންވަރު ކުޅުނު މެޗުގައި މޮނާކޯ އިން ވަނީ 3-1 އިން އެ ޓީމުގެ މައްޗަށް ކުރި ހޯދައިފަ އެވެ. މެޗުގެ ފުރަތަމަ ހާފުގައި މޮނާކޯ އިން އެއް ލަނޑު ޖެހިއިރު، އަނެއް ދެ ލަނޑު ޖެހީ ދެ ވަނަ ހާފުގަ އެވެ. މި ހާފުގައި ޕީއެސްޖީ އިން ވެސް ވަނީ ލަނޑެއް ޖަހައިފަ އެވެ.
މެޗުގެ ފުރަތަމަ ހާފުގެ 27 ވަނަ މިނެޓުގައި މޮނާކޯ އަށް ލީޑު ނަގައިދިނީ މަގްނެސް އަކިލޫޗް އެވެ. އޭގެ ފަހުން ދެ ވަނަ ހާފު ފަށައިގެން ދިހަ ވަނަ މިނެޓުގައި އެލެކްސެންޑަ ގޮލޮވިން ވަނީ މޮނާކޯގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ.
މެޗުގެ 71 ވަނަ މިނެޓުގައި ބްރާޑްލޭ ބާކޮލާ ވަނީ ޕީއެސްޖީގެ ފުރަތަމަ ލަނޑު ޖަހައި ފަރަގު ކުޑަ ކޮށްފަ އެވެ. އޭގެ ދެ މިނެޓު ފަހުން މޮނާކޯގެ ތިން ވަނަ ލަނޑު ޖަހައި ލީޑު ފުޅާ ކޮށްދިނީ ފޮލަރިން ބަލޮގުން އެވެ.
މެޗުން ބަލިވެ ޕީއެސްޖީ އެއް ވަނައިގައި އޮތީ، މިހާތަނަށް އެ ޓީމު ކުޅެފައިވާ 25 މެޗުން 57 ޕޮއިންޓާ އެކު އެވެ. ޕީއެސްޖީ އަށް ވުރެ އެއް މެޗު މަދުން ކުޅެގެން ދެ ވަަނައިގައި ލެންސް އަށް 53 ޕޮއިންޓު ލިބޭއިރު، މެޗުގެ އަދަދު ހަމަކޮށް ފަރަގު ކުޑަ ކުރުމުގެ ފުރުސަތު ލެންސް އަށް އޮންނާނެ އެވެ.
