އިނގިރޭސިވިލާތުން ޗާގޯސްގެ އެއްބަސްވުން މަޑު ޖައްސާލައިފި

ޗާގޯސް ޖަޒީރާ ތަކުގެ މިލްކުވެރިކަން މޮރިޝަސް އަށް ދިނުމުގެ އެއްބަސްވުން މަޑު ޖައްސާލަފައިވާ ކަމަށް، އިނގިރޭސިވިލާތުގެ ސަރުކާރުން ހާމަ ކޮށްފި އެވެ. 

ހޮނިހިރު ދުވަހު އިނގިރޭސިވިލާތުގެ ސަރުކާރުން މިކަން ހާމަ ކޮށްފައިވާއިރު، މިއީ އެމެރިކާގެ ރައީސް ޑޮނަލްޑް ޓްރަމްޕް މި އެއްބަސްވުުމަށް ފާޑު ވިދާޅުވުމުގެ ސަބަބުން އަޅާފައިވާ ފިޔަވަޅެއް ކަމަށް ބައެއް މީޑިއާ ތަކުގައި ވަނީ ބުނެފަ އެވެ. 

ޓައިމްސް ނޫސް ތަކުން ބުނާ ގޮތުގައި މި ޖަޒީރާ ތަކުގެ މިލްކުވެރިކަން މޮރިޝަސް އަށް ދިނުމުގެ އެއްބަސްވުމަށް ބޭނުންވާ ޤާނޫނީ ބިލު ސަރުކާރުގެ ކުރިއަށް އޮތް ޕާލަމެންޓްރީ އެޖެންޑާގައި ހިމާނަކަށް ނުޖެހޭނެ އެވެ. ނަމަވެސް، އެ އެއްބަސްވުމަށް އެމެރިކާގެ ތާއީދު އޮންނަން ޖެހޭނެ ކަމަށް ވަނީ ބުނެފައެވެ. 

އިނގިރޭސިވިލާތުގެ ބޮޑު ވަޒީރު ކިއާ ސްޓާމާގެ އޮފީހުން ބުނެފައި ވަނީ، އެ އެއްބަސްވުމަށް އެމެރިކާގެ ރަސްމީ ތާއީދު ހޯދުމަށް އިނގިރޭސިވިލާތުން މަސައްކަތް ކުރާނެ ކަމަށެވެ. މިދިޔަ ފެބްރުވަރީ މަހުގެ ތެރޭގައި ޓްރަމްޕް ވިދާޅުވެފައި ވަނީ، އެ އެއްބަސްވުމަކީ ވަރަށް ބޮޑު ގޯހެއް ކަމަށެވެ. ނަމަވެސް އޭގެ ކުރިން ޓްރަމްޕް ވިދާޅުވެފައި ވަނީ، އެއީ އިނގިރޭސި ބޮޑު ވަޒީރު ސްޓާމާ އަށް ލިބޭނެ އެންމެ ރަނގަޅު އެއްބަސްވުން ކަަމަށެވެ. 

މި އެއްބަސްވުމުގެ ދަށުން އިނގިރޭސިވިލާތަށް ޑިއޭގޯ ގާސިއާގައި އޮންނަ ސިފައިންގެ މައި ބޭސް 99 އަހަރަށް ކޮންޓްރޯލް ކުރެވޭނެ އެވެ. އަދި އެތަނުގައި އެމެރިކާގެ އޮޕަރޭޝަންތައް ވެސް ކުރިއަށް ގެންދެވޭނެ ކަމަށް ވަނީ ބުނެފަ އެވެ. އިނގިރޭސި ސަރުކާރުގެ ތަރުޖަމާނަކު ވިދާޅުވެފައި ވަނީ، ޑިއޭގޯ ގާސިއާގެ ދިގު މުއްދަތުގެ އޮަޕަރޭޝަނަލް ސަލާމަތާއި ރައްކާތެރިކަން ކަށަވަރު ކުރުމަކީ އަބަދު ވެސް އިސްކަން ދޭ ކަމެއް ކަމަށެވެ. 

އެ ތަރުޖަމާނު ވިދާޅުވީ، މި އެއްބަސްވުމަކީ ބޭސްގެ ދިގު މުއްދަތުގެ ރައްކާތެރި ކަމަށް އެންމެ ރަނގަޅު ގޮތް ކަމަށް ވެސް ޤަބޫލު ކުރާ ކަމަށެވެ. ނަމަވެސް، މި އެއްބަސްވުން ކުރިއަށް ގެންދެވޭނީ އެމެރިކާގެ ތާއީދު އެކަމަށް ލިބިގެން ކަމަށް ވެސް އޭނާ ވިދާޅުވެފައިވެ އެވެ. އެއާ އެކު އޭނާ ވިދާޅުވީ، އެމެރިކާ އާއި މޮރިޝަސްއާ ދެމެދު ވެސް މަޝްވަރާތައް ކުރިއަށް ދާނެ ކަމަށެވެ. 

އެމެރިކާ އާއި އިނގިރޭސިވިލާތާ ދެމެދު އޮތް ގުޅުން މިހާރު އޮތީ ހީނަރު ކަމެއްގެ ތެރޭގަ އެވެ. އެމެރިކާ އާއި އިޒްރޭލް އިން އީރާންއާ ދެކޮޅަށް ފެށި ހަނގުރާމައިގައި ބައިވެރިވުމަށް އިނގިރޭސި ބޮޑު ވަޒީރު ސްޓާމާ ދެކޮޅު ހެއްދެވުމާއި، ހަނގުރާމަ ފެށުމަށް އިނގިރޭސިވިލާތުގެ ހުރި އެމެރިކާގެ ބޭސްތައް ބޭނުން ކުރުމަށް ހުއްދަ ނުދިނުމުގެ ސަބަބުން، ދެ ޤައުމުގެ ގުޅުން ގޯސްވެފައިވެ އެވެ.