ސީރިއާގެ ރައީސް އަލް ޝަރާ އިނގިރޭސިވިލާތަށް ވަޑައިގެން، ބޮޑު ވަޒީރު ސްޓާމަރ އާއި ބައްދަލު ކުރައްވައިފި

ސީރިއާގެ ރައީސް އަޙުމަދު އަލް ޝަރާ އިނގިރޭސިވިލާތަށް ވަޑައިގެން، އެ ޤައުމުގެ ބޮޑު ވަޒީރު ކިއާ ސްޓާމަރ އާއި ބައްދަލު ކުރައްވައިފި އެވެ. 

އިނގިރޭސިވިލާތުގެ ބޮޑު ވަޒީރުގެ ރަސްމީ އޮފީސް ޑައުނިންގ ސްޓްރީޓްގައި އަންގާރަ ދުވަހު އަލް ޝަރާ އާއިސްޓާމަރ ބައްދަލު ކުރައްވާފައިވާއިރު، އެ ބައްދަލުވުމުގައި މައިގަނޑު ގޮތެއްގައި މަޝްވަރާ ކުރައްވާފައި ވަނީ ސީރިއާގެ ސިޔާސީ ބަދަލުތަކާ ގުޅޭ ގޮތުންނެވެ. 

އެގޮތުން ދެ ޤައުމުގެ ދެ މެދުގައި ގުޅުން ބަދަހި ކުރުމާއި ވަރުގަދަ ކުރުމާއި، އަދި ސީރިއާގެ ޙާލަތާ ގުޅޭ ގޮތުން މަޝްވަރާ ކުރައްވާފައިވާ ކަމަށް މީޑިއާ ތަކުގައި ވަނީ ރިޕޯޓު ކޮށްފަ އެވެ. މިއީ ސީރިއާގެ އައު ސަރުކާރާއި، އިނގިރޭސިވިލާތާ ދެމެދު އެއްބާރުލުން ދެމުން އަންނަ ކަމުގެ ނިޝާނެއް ކަމަށް މާހިރުން ވަނީ ފާހަގަ ކޮށްފަ އެވެ. 

އިނގިރޭސިވިލާތާއި، ސީރިއާގެ ދެމެދުގައި ވިޔަފާރީގެ ގުޅުން ބަދަހި ކުރުމާއި، އިޤްތިޞާދީ އެހީތެރިކަން ފޯރުކޮށްދިނުމާ ބެހޭ ގޮތުން މި ބައްދަލު ކުރެއްވުމުގައި މަޝްވަރާ ކުރައްވާފައިވާ ކަމަށް ވެސް ވަނީ ރިޕޯޓު ކޮށްފަ އެވެ. ސީރިއާގެ ތަރައްޤީ އަށް ބޭނުންވާ އެހީތެރިކަން ފޯރުކޮށްދިނުމަށް އިނގިރޭސިވިލާތުން ތައްޔާރަށް އޮތް ކަމުގެ އިޝާރާތެއް ވެސް ސްޓާމަރ ދެއްވާފައިވާ ކަމަށް ރިޕޯޓު ތަކުގައި ބުނެފަ އެވެ. 

ސީރިއާގެ ވެރިކަމަށް ވަޑައިގެންނެވުމަށް ފަހު އަލް ޝަރާ ގެންދަވަނީ ދުނިޔޭގެ އެކި ޤައުމުތަކާއި ސީރިއާއާ ދެމެދު ގުޅުން ބަދަހި ކުރުމަށް ގިނަ މަސައްކަތް ތަކެއް ކުރައްވަމުންނެވެ. ޚާއްސަކޮށް ސީރިއާގެ ކުރިއެރުމާއި، އެ ޤައުމުގެ އިޤްތިޞާދަށް ބަދަލު ގެނައުމަށް އަލް ޝަރާ ގެންދަވަނީ ގިނަ މަސައްކަތް ތަކެއް ވެސް ކުރައްވަމުންނެވެ.