ކޮންމެ ފިއްތުމެއް ކުރިމަތި ވިޔަސް ނިންމުން ބަދަލެއް ނުވާނެ، އީރާންއާ ދެކޮޅަށް ކުރާ ހަނގުރާމަ އަކީ އަހަރަމެންގެ ހަނގުރާމައެއް ނޫން: އިނގިރޭސިވިލާތުގެ ބޮޑު ވަޒީރު ސްޓާމަރ

އެމެރިކާ އާއި އިޒްރޭލް އިން އީރާންއާ ދެކޮޅަށް ކުރަމުން އަންނަ ހަނގުރާމައިގެ ތެރެއަށް އިނގިރޭސިވިލާތުން ނުވަންނާނެ ކަމަށާއި، އެއީ އެ ޤައުމުގެ ހަނގުރާމައެއް ނޫން ކަމަށް، އިނގިރޭސިވިލާތުގެ ބޮޑު ވަޒީރު ކިއާ ސްޓާމަރ ވިދާޅުވެއްޖެ އެވެ. 

މިރާ ޔޫކޭ އިން ރިޕޯޓު ކޮށްފައިވާ ގޮތުގައި، ސަރަހައްދީ މަސްރަހު ވަރަށް ބޮޑަށް ނުތަނަވަސްވަމުން ދިޔަ ނަމަވެސް، އިނގިރޭސިވިލާތުގެ ސަރުކާރުގެ ސިޔާސަތު އެކަމުގައި ވަރަށް ސާފެވެ. މީގެ ކުރިން ވެސް އިނގިރޭސިވިލާތުގެ ސަރުކާރުން ވަނީ، އެ ޤައުމުން މި ހަނގުރާމައިގެ ތެރެއަށް ނުވަންނާނެ ކަމަށް ތަކުރާރުކޮށް ބުނެފަ އެވެ. 

އެގޮތުން އިނގިރޭސިވިލާތުގެ ބޮޑު ވަޒީރު ސްޓާމަރ ވިދާޅުވީ، އެ ޤައުމުގެ ސަރުކާރުން އެ މައްސަލައިގައި ދެކޭ ގޮތް ތަކުރާރުކޮށް ހާމަ ކުރުމަކީ މުހިންމު ކަމެއް ކަމަށެވެ. އެގޮތުން މިއީ އިނގިރޭސިވިލާތާ ގުޅުން ހުރި ހަނގުރާމައެއް ނޫން ކަމަށާއި، އެ ހަމަނުޖެހުން ތަކުގެ ތެރެއަށް އެ ޤައުމު ސޮއްސާލައިގެން ދިޔުމުގެ ފުރުސަތު ނުދެއްވާނެ ކަމަށް ސްޓާމަރ ވަނީ ވިދާޅުވެފަ އެވެ. 

މީގެ އިތުރުން ސްޓާމަރ ވިދާޅުވީ، ސަރަހައްދީ ހަމަ ނުޖެހުން ތަކުގެ ތެރެއަށް ސީދާ ގޮތުން ނުވަން ނަމަވެސް، އިނގިރޭސިވިލާތުގެ ރައްޔިތުންގެ ފުރާނަ އާއި، އެ ޤައުމުގެ އިސްތިރާޖީ މަސްލަޙަތުތައް ހިމާޔަތް ކުރުމަށް ފިޔަވަޅު އަޅުއްވާނެ ކަމަށެވެ. އދަި ގަލްފު ސަރަހައްދުގައި ތިބި އިނގިރޭސިވިލާތުގެ ބައިވެރިންނާ އެކު، އެ ޤައުމުން ސާބިތުކަމާ އެކު އޮންނާނެ ކަމުގެ ޔަޤީންކަން ވެސް ބޮޑު ވަޒީރު ސްޓާމަރ ވަނީ ދެއްވައިފަ އެވެ. 

މި ނިންމުމަކީ ވަކި އުސޫލު ތަކެއްގެ މައްޗަށް ބިނާވެފައިވާ ނިންމުމެއްކަން ފާހަގަ ކުރައްވައި ބޮޑު ވަޒީރު ސްޓާމަރ ވިދާޅުވީ، ބޭރުގެ ފަރާތް ތަކުން ކިތަންމެ ބޮޑު ފިއްތުން ތަކެއް ކުރިމަތި ކުރުވި ނަމަވެސް، ސަރުކާރުގެ އެ ނިންމުމަށް ބަދަލެއް ނާންނާނެ ކަމަށެވެ. އަދި މިއީ އޭނާ ޤަބޫލު ކުރައްވާ އުސޫލު ތަކާއި ހަމަތައް ކަމަށާއި، ސަރުކާރުގެ ނިންމުންތައް ބިނާ ކުރަނީ އެ އުސޫލު ތަކުގެ މައްޗަށް ކަމަށް ވެސް ބޮޑު ވަޒީރު ވަނީ ވިދާޅުވެފަ އެވެ. 

އިނގިރޭސިވިލާތުގެ ބޮޑު ވަޒީރު ސްޓާމަރ މިފަދަ މޭރުމަކުން ވާހަކަ ދައްކަވާފައި މި ވަނީ، މެދު އިރުމަތީގެ ހަމަ ނުޖެހުންތައް އިތުރަށް ފުޅާވެ، މުޅި ސަރަހައްދަށް ހަނގުރާމައިގެ ނުރައްކާ ބޮޑުވަމުންދާތީ ބައިނަލްއަޤުވާމީ މުޖުތަމައުން ކަންބޮޑުވުން ފާޅު ކުރަމުންދާ ދަނޑިވަޅެއްގަ އެވެ. އިނގިރޭސިވިލާތުން މި މައްސަލައިގައި ގެންގުޅޭ ސިޔާސަތަކީ ސީދާ ހަނގުރާމައިގައި ބައިވެރި ނުވެ، މަސްލަޙަތުތައް ހިމާޔަތް ކުރުން ކަމަށް ބޮޑު ވަޒީރުގެ ވާހަކަ އިން ސާފުވެ އެވެ.