ޓްރަމްޕްގެ ސިޔާސަތުތަކާ ދެކޮޅަށް އެމެރިކާގައި ބޮޑެތި އެއްވުން ތަކެއް ބާއްވައިފި

އެމެރިކާގެ ރައީސް ޑޮނަލްޑް ޓްރަމްޕްގެ ސިޔާސަތުތަކާ ދެކޮޅަށް އެ ޤައުމުގައި ބޮޑެތި މުޒާހަރާ ތަކެއް ކުރިއަށް ގެންގޮސްފި އެވެ. 

މިއީ ނޯ ކިންގްސް ނަމުގައި ކުރިއަށް ގެންދާ މުޒާހަރާ ތަކުގެ ތެރެއިން، ތިން ވަނަ މުޒާހަރާ އެވެ. މީގެ ކުރިން ވެސް ބޭއްވި އެއްވުން ތަކުގައި މިލިއަނުން މީހުން ވަނީ ބައިވެރިވެފަ އެވެ. 

މުޒާހަރާ އިންތިޒާމު ކުރި ފަރާތް ތަކުން ބުނާ ގޮތުގައި، މި އެއްވުންތައް ކުރިއަށް ގެންދަނީ ޓްރަމްޕް ތަންފީޒު ކުރަމުން ގެންދާ ސިޔާސަތުތަކާ ދެކޮޅަށެވެ. އޭގެ ތެރޭގައި އެމެރިކާ އާއި އިޒްރޭލް އިން އީރާންއާ ދެކޮޅަށް ކުރިއަށް ގެންދާ ހަނގުރާމައިގެ އިތުރުން، އިމިގްރޭޝަންގެ މައްސަލަ ތަކާއި،  ދިރިއުޅުމުގެ ޚަރަދުތައް މަތިވުން ފަދަ ކަންކަން ހިމެނެ އެވެ. 

އެ ފަރާތް ތަކުން ބުނަނީ ޓްރަމްޕް ބޭނުން ވަނީ ޒާލިމެއްގެ ގޮތުގައި ވެރިކަން ކުރަން ކަމަށެވެ. ނަމަވެސް، އެއީ އެމެރިކާ ކަމަށާއި، އެ ޤައުމުގައި ބާރު ލިބިފައި އޮންނަނީ ރައްޔިތުންނަށް ކަމަށް މުޒާހަރާގެ ބައިވެރިން ފާހަގަ ކޮށްފައިވެ އެވެ. އެކަމާ ގުޅޭ ގޮތުން އެމެރިކާގެ ރިޔާސީ ގަނޑުވަރު، ވައިޓް ހައުސްގެ ތަރުޖަމާނަކު ވިދާޅުވެފައި ވަނީ، އެއީ ޓްރަމްޕްއާ ދެކޮޅަށް ރޭވިގެން ހިންގާ ޙަރަކާތެއް ކަމަށެވެ.

ހޮނިހިރު ދުވަހު ވަނީ އެމެރިކާގެ ނިއުޔޯކްގެ އިތުރުން، ވޮޝިންޓަން ޑީސީ އާއި ލޮސް އެންޖަލެސް ފަދަ ބޮޑެތި ސިޓީ ތަކުގައި މި އެއްވުން ކުރިއަށް ގެންގޮސްފަ އެވެ. ވެރި ރަށް ވޮޝިންޓަން ޑީސީގެ މަގު ތަކުގައި އެއްވުން ކުރިއަށް ގެންދިޔައިރު، ގިނަ ބަޔަކު ވަނީ ލިންކަން މެމޯރިއަލް އަށް ޖަމާވެފަ އެވެ. އެ މުޅި ސަރަހައްދު ފުރިފައިވާއިރު، ގިނަ ބަޔަކު ޓްރަމްޕްއާ ދެކޮޅަށް އަޑު އުފުލި އެވެ. 

މި އެއްވުމުގެ ތެރެއިން މިނެސޯޓާގައި ކުރިއަށް ގެންދިޔަ އެއްވުމަކީ ވަރަށް މުހިންމު އެއްވުމެކެވެ. މިއަހަރުގެ ޖަނަވަރީ މަހު ފެޑެރަލް އިމިގްރޭޝަން އެޖެންޓުން، އެމެރިކާގެ ދެ ރައްޔިތަކު މަރާލުމާ ގުޅިގެން ވެސް އެ ސަރަހައްދުގައި އެއްވުމެއް ބާއްވާފައިވެ އެވެ. އެތައް ހާސް ބަޔަކު މަގު ތަކަށް ނިކުމެ އަޑު އުފުލުން ކުރިއަށް ގެންދިޔައިރު، އިދިކޮޅު ޑިމޮކްރަޓިކް ޕާޓީގެ ބައެއް މަޝްހޫރު ބޭފުޅުން ވަނީ އެ އެއްވުމުގައި ވާހަކަ ވެސް ދައްކަވައިފަ އެވެ. 

ނިއުޔޯކް ސިޓީގެ ޓައިމްސް ސްކޮޔާގައި ވެސް އެތައް ހާސް ބަޔަކު އެއްވެ އަޑު އުފުލާފައިވާއިރު، ފުލުހުންނަށް ވަނީ މަގު ބަންދު ކުރަން ވެސް ޖެހިފަ އެވެ. އެއްވުމުގެ ތެރެއިން ލޮސް އެންޖަލެސްގައި ދެ މީހަކު ހައްޔަރު ކޮށްފައިވެ އެވެ. އެއީ ފެޑެރަލް ޤާނޫނު ތަންފީޒު ކުރާ ފަރާތް ތަކަށް ހަމަލާ ދިނުމާ ގުޅިގެންނެވެ. ހޯމް ލޭންޑް ސެކިއުރިޓީ ޑިޕާޓްމަންޓް އިން ބުނީ، އެ މީހުން ހައްޔަރު ކޮށްފައި ވަނީ ސިމެންތި ބްލޮކް ތަކުން ދެ އޮފިސަރަކަށް ހަމަލާ ދިނުމާ ގުޅިގެންނެވެ. 

މިދިޔަ އަހަރުގެ އޮކްޓޫބަރު މަހުގެ ތެރޭގައި ބޭއްވި ނޯ ކިންގްސް އެއްވުމުގައި ވެސް ހަތް މިލިއަނަށް ވުރެ ގިނަ މީހުން ބައިވެރިވެފައިވާ ކަމަށް ވަނީ ރިޕޯޓު ކޮށްފަ އެވެ. އެމެރިކާގެ އިތުރުން ފްރާންސް ޕެރިސް އާއި، އިނގިރޭސިވިލާތުގެ ލަންޑަން އަދި ޕޯޗުގަލްގެ ލިސްބަންގައި ވެސް އެމެރިކާގެ ރައްޔިތުން ވަނީ މި އެއްވުން ކުރިއަށް ގެންގޮސްފަ އެވެ. 

ޕެރިސް، ލަންޑަން، އަދި ލިސްބަން ފަދަ ބޭރު ގައުމުތަކުގައި ދިރިއުޅޭ އެމެރިކާ ރައްޔިތުން ވެސް ހަޅޭލުންތައް ކުރިއަށް ގެންދިޔައެވެ.