”މިފަހަރު އިންޑިއާ އައުޓް ގެ ބައެއް ނެތް، މިފަހަރު އޮތީ އިންޑިއާ އޮއިލް ޕްލީސް“: އަބްދުﷲ ޝާހިދު

ގައުމެއް ވެއްޖެއްޔާ ކޮންމެސް ކަހަލަ ގޮތަކާއި ސިފައެއް ހުންނަންޖެހޭނެ ކަމަށާއި ވެރިކަމަށް އަންނަންވެގެން އިންޑިއާ އައުޓް ކިޔައި، މިހާރު އިންޑިއާ އައުޓް ގެ ބަދަލުގައި އިންޑިއާ އޮއިލް ޕްލީސް އަށް ބަދަލުވެއްޖެ ކަމަށް ވިދާޅުވެ އެމްޑީޕީގެ ރައީސް އަބްދުﷲ ޝާހިދު ސަރުކާރަށް ފާޑު ވިދާޅުވެއްޖެ އެވެ.

އެމްޑީޕީގެ ރައީސް ޢަބްދުﷲ ޝާހިދު، އެ ޕާޓީގެ ލީޑަރޝިޕްގެ ބޭފުޅުންނާއެކު އަތޮޅުތެރެއަށް ކުރައްވަމުންގެންދަވާ ކެމްޕޭން ދަތުރުތަކުގެ ތެރެއިން ލ. މާވަށަށް ވަޑައިގެން އެރަށުގައި ބޭއްވި ހަރުގެ ޖަލްސާގައި ވާހަކަދައްކަވަމުން ޝާހިދު ވިދާޅުވީ، އޮމާން އިން ބޭނުންވަރަކަށް ތެޔޮ ލިބޭނެ ކަމަށް މީގެ ކުރިން މިސަރުކާރުގެ ވެރިން ބުނަމުންދިޔަ ނަމަވެސް މިއަދު އިންޑިއާގެ އެހީތެރިކަމަށް އެދިފައިވާ ކަމަށެވެ. މިކަމުންވެސް މި ސަރުކާރުގެ ނާގާބިލުކަން ހާމަވާކަން ޝާހިދު ފާހަގަކުރެއްވި އެވެ. 

އަނެއްކާވެސް އިންޑިއާ. މިފަހަރު އައުޓްގެ ބައެއް ނެތް، މިފަހަރު އޮތީ އިންޑިއާ އޮއިލް ޕްލީސް. ދެން އަޅުގަނޑުމެން ވެސް ގައުމެއް މިއީ ކޮންމެސް ކަހަލަ ގޮތެއް ހުންނަންޖެހޭނެ. ކޮންމެސް ކަހަލަ ސިފަވެރިކަމެއް ހުންނަނެޖެހޭނެ. ހިތު ހުރިގޮތަކަށް އަޅުގަނޑުމެން ވެސް ބޭރު ގައުމުތަކުގެ ކުރިމަތީގަ އޮރިޔާން ކުރައްވާކަށް ނުވާނެ.

އަބްދުﷲ ޝާހިދު

މީގެ އިތުރުން ޝާހިދު ވިދާޅުވީ ވަރަށް ފަލަ ރަތް ރޮނގެއްގެ ކުރިމަތީ ހުންނަވައި މުހާތަބުކުރައްވައި ހިތުހުރި އެއްޗެއް ރާއްޖޭގެ އަވައްޓެރިންނާ ދިމާލަށް ގޮވުމަށްފަހު މިއަދު ތެޔޮފޮދެއް ގަންނަން ލިބޭތޯ އިންޑިއާގެ ފައިބުޑަށް ވެއްޓެން ޖެހުނީމަ އެއީ މިސަރުކާރުން ލަދު ގަންނަންޖެހޭ ކަމެއް ކަމަށެވެ. އަދި އަވައްޓެރި ގައުމުތަކާއެކު ގުޅުން ބަދަހި ކުރުމަކީ މުހިންމު ކަމެއްކަން ޝާހިދު ފާހަގަކުރެއްވި އެވެ. 

ޝާހިދު ވިދާޅުވީ މިސަރުކާރުން ރައްޔިތުންނަށް ސައްހަ މައުލޫމާތު ފޯރުކޮށްދޭންޖެހޭ ކަމަށާއި ރާއްޖެ ތެލަށް ނުޖެހޭނެ ކަމަށް ބުނެ ދެއްކި ވާހަކަ މިހާރު ރައްޔިތުންނަށް ގަބޫލުކުރަން ދަތިކަމަށެވެ.