ކާބޯތަކެއްޗާއި އިމާރާތްކުރުމަށް ބޭނުންވާ ތަކެތި ރާއްޖެއަށް އެކްސްޕޯޓްކުރުމުގެ ހުއްދަ އިންޑިއާއިން 2027 އާ ހަމައަށް އިތުރުކޮށްފި
13 އެޕްރީލު 2026 | ހޯމަ 08:40އިންޑިއާގެ 'ނެއިބަހުޑް ފަސްޓް' ސިޔާސަތުގެ ދަށުން، ރާއްޖެއަށް ބޭނުންވާ ކާބޯތަކެތީގެ މުހިންމު ބާވަތްތަކާއި އިމާރާތްކުރުމަށް ބޭނުންވާ ތަކެތި 2026-27 ވަނަ އަހަރަށް އެކްސްޕޯޓް ކުރުމުގެ ހުއްދަ އެ ގައުމުން ވަނީ ދީފައި. މި އެއްބަސްވުމުގެ ދަށުން އިންޑިއާއިން ބޭރުކުރުން މަނާކޮށްފައިވާ ބައެއް ބާވަތްތައް ވެސް ހިމެނޭހެން، ރާއްޖެއަށް ކަނޑައެޅިފައިވާ ވަކި މިންވަރަކަށް ތަކެތި ފޯރުކޮށްދިނުމަށް ވަނީ ނިންމާފައި. މީގެ ސަބަބުން ރާއްޖޭގެ ކާބޯތަކެތީގެ ޔަގީންކަން ކަށަވަރުވެ، އިމާރާތްކުރުމުގެ ދާއިރާއަށް ބޭނުންވާ ހިލަ އާއި ހިލަވެލި މެދުނުކެނޑި ލިބުމަށް މަގުފަހިވެގެންދާނެ.
ތާޒާ ފިޔާ - އިންޑިއާ އިން 37,537 ޓަނުގެ ފިޔާ ރާއްޖެ އަށް އެކްސްޕޯޓް ކުރުމަށް ވަނީ ހުއްދަ ދީފައި. | ގެޓީ އިމޭޖަސް
2026-27 ވަނަ އަހަރަށް ރާއްޖެ އަށް ބޭނުންވާ ކާބޯތަކެތީގެ މުހިންމު ބާވަތްތަކާއި އިމާރާތްކުރުމަށް ބޭނުންވާ ތަކެތި ކަނޑައެޅިފައިވާ ވަކި މިންވަރަކަށް ދިވެހިރާއްޖެއަށް އެކްސްޕޯޓް ކުރުމުގެ ހުއްދަ ދިނުމަށް އިންޑިއާ ސަރުކާރުން ނިންމައިފި އެވެ.
މީގެ ތެރޭގައި ހިމެނެނީ ކުކުޅުބިސް، އަލުވި، ފިޔާ، ހަނޑޫ، ގޮދަން ފުށް، ހަކުރު އަދި މުގުގެ ބާވަތްތަކެވެ. އިންޑިއާގެ ޑައިރެކްޓްރޭޓް ޖެނެރަލް އޮފް ފޮރިން ޓްރޭޑް (ޑީޖީއެފްޓީ) އިން ނެރުނު ނޮޓިފިކޭޝަނެއްގައި ބުނެފައިވަނީ، މި ތަކެތި ރާއްޖެއަށް އެކްސްޕޯޓް ކުރުމުގެ ހުއްދަ ދީފައިވަނީ ދެ ގައުމުގެ ދެމެދުގައި ވެފައިވާ ދޭދޭ ވިޔަފާރީގެ އެއްބަސްވުމުގެ ދަށުން 2026-27 ވަނަ އަހަރަށް ކަމަށެވެ.
ޑީޖީއެފްޓީން ހާމަކޮށްފައިވާ ގޮތުގައި، ކުކުޅުބިސް، އަލުވި، ފިޔާ، ހަނޑޫ، ގޮދަން ފުށް، ހަކުރު، މުގު، ހިލަ އަދި ހިލަވެލި ރާއްޖެއަށް އެކްސްޕޯޓް ކުރުމުގެ ހުއްދަ މިހާރު ވަނީ ދީފައެވެ. އަދި މި މުއްދަތުގެ ތެރޭގައި، މި ބާވަތްތައް އެކްސްޕޯޓް ކުރުމުގައި މިހާރު އަމަލުކުރަމުންދާ ނުވަތަ ކުރިއަށް އޮތް ތަނުގައި އަޅާފާނެ އެއްވެސް ހުރަހަކުން ނުވަތަ މަނާކުރުމަކުން މި ތަކެތި އިސްތިސްނާވާނެ ކަމަށްވެސް އެ އިދާރާއިން ބުނެފައިވެއެވެ. އާންމު އުސޫލުން ބަލާއިރު، މީގެ ތެރެއިން ބައެއް ބާވަތްތަކަކީ އިންޑިއާއިން ބޭރުކުރުން މަނާކޮށްފައިވާ ނުވަތަ ވަކި ހުދޫދުތަކެއް ކަނޑައަޅާފައިވާ ތަކެއްޗެވެ.
މި އެއްބަސްވުމުގެ ދަށުން ރާއްޖެއަށް އެކްސްޕޯޓް ކުރުމަށް ހުއްދަ ދީފައިވާ މިންވަރުތަކަކީ 448,913,750 ކުކުޅުބިސް، 22,589 ޓަނުގެ އަލުވި، 37,537 ޓަނުގެ ފިޔާ، 230,429 ޓަނުގެ ހަނޑޫ، 114,621 ޓަނުގެ ގޮދަން ފުށް، 67,719 ޓަނުގެ ހަކުރު، 350 ޓަނުގެ މުގު، 1,300,000 ޓަނުގެ ހިލަ އަދި 1,300,000 ޓަނުގެ ހިލަވެއްޔެވެ. ހިލަވެއްޔާއި ހިލަ އެކްސްޕޯޓް ކުރުމުގައި، އެ ތަކެތި ފޯރުކޮށްދޭ ފަރާތްތަކުން ބޭނުންވާ ހުއްދަތައް ހޯދާފައިވާކަން ކެޕެކްސިލް (ކެމިކަލް އެންޑް އެލައިޑް ޕްރޮޑަކްޓްސް އެކްސްޕޯޓް ޕްރޮމޯޝަން ކައުންސިލް) އިން ކަށަވަރު ކުރަންޖެހޭނެ ކަމަށް ޑީޖީއެފްޓީން ބުނެފައިވެ އެވެ. އަދި އެކްސްޕޯޓް ކުރާ ވެއްޔަކީ ގޮނޑުދޮށުން ހިމާޔަތްކޮށްފައިވާ ސަރަހައްދުތަކުން ނަގާފައިވާ އެއްޗެއް ނޫންކަން ކަށަވަރު ކުރަންޖެހޭނެ ކަމަށްވެސް ބުނެފައިވެއެވެ.
އިންޑިއާގެ 'ނެއިބަހުޑް ފަސްޓް' ސިޔާސަތުގެ ދަށުން ރާއްޖެއަކީ ކަނޑުގެ ސަރަހައްދުގެ މުހިންމު އަވަށްޓެރިއެއްގެ ގޮތުގައި އަދި މުހިންމު ބައިވެރިއެއްގެ ގޮތުގައި އިންޑިއާއިން ދެކެއެވެ. މި އެއްބަސްވުމުގެ ސަބަބުން ރާއްޖޭގެ އިމާރާތްކުރުމުގެ ދާއިރާއަށާއި ކާބޯތަކެތީގެ ސިނާއަތަށް ބޭނުންވާ މުހިންމު ބާވަތްތައް މެދުނުކެނޑި ލިބޭނެކަން ކަށަވަރުވެގެންދާއިރު، މިއީ ދިވެހި ރައްޔިތުންނަށް އިންޑިއާއިން ފޯރުކޮށްދޭ މެދުނުކެނޑޭ އެހީތެރިކަން ރަމްޒުކޮށްދޭ ކަމެއްގެ ގޮތުގައި އިންޑިއާގެ ލޯކަލް މީޑިއާ އިން ސިފަކޮށްފައިވެއެވެ.
