ބޮލީވުޑްގެ ލެޖެންޑަރީ ލަވަކިޔުންތެރިޔާ އާޝާ ބޯސްލޭ މަރުވެއްޖެ

ބޮލީވުޑްގެ މިއުޒިކީ ދުނިޔޭގައި ބޮޑު މަގުބޫލުކަމެއް ހޯދާފައިވާ ލެޖެންޑަރީ ލަވަކިޔުންތެރިޔާ އާޝާ ބޯސްލޭ، އުމުރުން 92 އަހަރުގައި މަރުވެއްޖެ އެވެ.

އިންޑިއާގެ ޕްލޭބެކް ސިންގިންގް ނުވަތަ ފިލްމުތަކަށް ލަވަކިޔައިދިނުމުގެ ރާނީގެ ގޮތުގައި ބެލެވޭ އާޝާ މަރުވީ ހާޓް އެޓޭކެއް ޖެހިގެން މުމްބާއީގެ ހޮސްޕިޓަލެއްގައި ފަރުވާދެމުން ދަނިކޮށެވެ.

އާޝާގެ ވަކިވުމާއެކު ބޮލީވުޑް މިއުޒިކްގެ ރަންޒަމާނެއް ނިމުމަކަށް އައީއެވެ. އަށްޑިހަ އަހަރުގެ މުއްދަތަކަށް ދެމިގެން ދިޔަ އޭނާގެ މިއުޒިކީ ކެރިއަރުގައި 12،000 އަށްވުރެ ގިނަ ލަވަ ވަނީ ރެކޯޑްކޮށްފައެވެ.

އާޝާ ބޯސްލޭ ކިޔައިދީފައިވާ އެތައް ހާސް ލަވަތަކަކަށް ފިލްމީ ތަރިން ލިޕް ސިންގ ކުރަމުން ދިޔައިރު، އެ ލަވަތަކަށް ދިރުން ގެނެސްދިނީ އޭނާގެ ހިތްގައިމު އަޑެވެ.

ބޮލީވުޑްގައި އާޝާގެ މަގުބޫލުކަން ބޮޑުވެފައިވާ މިންވަރުން، 1997 ވަނަ އަހަރު ކޯނަރޝޮޕް ބޭންޑުން ވަނީ އޭނާއަށް ހާއްސަކޮށް "ބްރިމްފުލް އޮފް އާޝާ" ގެ ނަމުގައި ހިޓް ލަވައެއް ނެރެފައެވެ. މީގެ އިތުރުން އިނގިރޭސި މިއުޒީޝަން ބޯއި ޖޯޖާއެކު މަސައްކަތްކޮށް އޭނާ ވަނީ ބައިނަލްއަގުވާމީ މައިދާނުގައިވެސް މަޝްހޫރުކަން ހޯދާފައެވެ.

އާޝާގެ އަޑުގައި ހުރި ޖޯޝާއި ފޯރީގެ ސަބަބުން، އޭނާގެ ލަވަތަކަކީ އެތައް ޖީލެއްގެ މީހުންގެ މެދުގައި މަގުބޫލު، ހިތްޖެހޭ ފަދަ ލަވަތަކަކަށް ވަނީ ވެފައެވެ.

ލޯބީގެ މަޑުމައިތިރި ލަވަތަކުން ފެށިގެން ފޯރިގަދަ ނެށުންތަކުގެ ލަވަތަކާ ހަމައަށް، ކޮންމެ ކަހަލަ ރާގަކަށް ވެސް ފަރިތަކަމާއެކު ލަވަކިޔުމުގެ ގާބިލުކަން އާޝާގެ ކިބައިގައި ހުރުމުން، އޭނާއަކީ މިއުޒިކް ކޮމްޕޯޒަރުންގެ އެންމެ ފުރަތަމަ ޗޮއިސް އެވެ.

އާޝާގެ އަޑުގައި ހުރި ބާރާއި ހަކަތައިގެ ސަބަބުން ކޮންމެ ލަވައަކަށް ވެސް އާ ދިރުމެއް ލިބިގެންދިޔައިރު، އޭނާގެ ލަވަތަކަކީ ބޮލީވުޑް މިއުޒިކްގެ ވިންދެވެ.

"ދަމް މާރޯ ދަމް" ފަދަ ސަކަ ރާގުތަކާއި، "ޕިޔާ ތޫ އަބް ތޯ އާޖާ" ފަދަ ޖަޒުބާތީ ލަވަތަކުގެ އިތުރުން "މެހެންދީ ހޭ ރަޗްނޭވާލީ" ފަދަ ފޯރިގަދަ ލަވަތަކުން އާޝާ ވަނީ އޭނާގެ ހުނަރުވެރިކަމަށް ހުދޫދެއް ނެތްކަން ސާބިތުކޮށްދީފައެވެ.

"ތީސްރީ މަންޒިލް"، "ކާރަވަން"، "ޔާދޯން ކީ ބާރާތު"، "އިޖާޒަތު" އަދި "ސާގަރު" ފަދަ ފިލްމުތަކުގެ ލަވަތަކަކީ މިއަދުވެސް އާންމުންގެ މެދުގައި މަގުބޫލު ލަވަތަކެކެވެ. އަދި މިއުޒިކް ޑައިރެކްޓަރު ޚައްޔާމްގެ އިރުޝާދުގެ ދަށުން "އުމްރާއޯ ޖާން" އަށް އާޝާ ކިޔައިދިން ލަވަތަކަކީ އޭނާގެ ކެރިއަރުގެ އެންމެ ފާހަގަކޮށްލެވޭ މަސައްކަތްތަކުގެ ގޮތުގައި ގިނަ ބަޔަކު ގަބޫލުކުރެއެވެ.

2022 ވަނަ އަހަރު ދުނިޔެ ދޫކުރި އޭނާގެ ދައްތަ ލަތާ މަންގޭޝްކަރާ ތަފާތު، އަމިއްލަ ވަކި ސްޓައިލެއް އާޝާ ވަނީ މިއުޒިކީ ދުނިޔޭގައި ގާއިމުކޮށްފައެވެ.

ލަތާ މަންގޭޝްކަރަކީ ކްލެސިކަލް މިއުޒިކާއި އޭގެ ފުރިހަމަކަމަށް މަޝްހޫރު ފަންނާނަކަށް ވީނަމަވެސް، އާޝާ ފާހަގަވެފައިވަނީ ކޮންމެ ލަވައަކަށްވެސް ހަކަތަ އާއި ޖޯޝް ގެނެސްދިން ލަވަކިޔުންތެރިއެއްގެ ގޮތުގައެވެ.

އާޝާ ބޯސްލޭ އާއި މިއުޒިކް ކޮމްޕޯޒަރު އާރް.ޑީ ބަރްމަން (ފަހުން އާޝާ ކައިވެނި ކުރި ފަރާތް) ގެ ގުޅުމަކީ ބޮލީވުޑްގެ ތާރީޚުގައި ފާހަގަކޮށްލެވޭ ވަރުގަދަ ގުޅުމެކެވެ. މި ދެ ފަންނާނުން އެކުވެގެން ވަނީ އިންޑިއާގެ މިއުޒިކީ ސިނާއަތަށް ބޮޑު އިންގިލާބެއް ގެނެސްދީފައެވެ.

ބަރްމަންގެ ތަފާތު އަދި އާދަޔާ ހިލާފު ރާގުތަކާ އާޝާގެ އަޑު ފުރިހަމައަށް ގުޅިގެންދިޔައިރު، އެކި ވައްތަރުގެ އެތައް ހިޓް ލަވަތަކެއް މި ދެމަފިރިން ވަނީ އުފައްދާފައެވެ.

އާޝާ އާއި ބަރްމަން 25 އަހަރު ވަންދެން އެކުގައި ކުރި މަސައްކަތުން މިއުޒިކީ ބޮޑު ތަރިކައެއް ބިނާކުރިއިރު، އާޝާ އެއްފަހަރަކު ބުނެފައިވަނީ އޭނާގެ ކިބައިގައި ހުރި އެންމެ ފުރިހަމަ ހުނަރު ނެރެދިނީ ބަރްމަން ކަމަށެވެ.

2023 ވަނަ އަހަރު ދިން އިންޓަވިއުއެއްގައި އާޝާ ބުނެފައިވަނީ، އޭނާގެ އަޑުގެ ކުޅަދާނަކަން ހޯދައިދިނީ "ޕަންޗަމް" (ބަރްމަންއަށް ލޯބިން ކިޔާ ނަން) ކަމަށާއި، އޭނާގެ އަޑުގައި އެފަދަ އާދަޔާޚިލާފް ގޮތެއް ހުރިކަން އެނގުނީވެސް ބަރްމަންގެ ސަބަބުން ކަމަށެވެ.

1933 ވަނަ އަހަރުގެ ސެޕްޓެމްބަރު 8 ވަނަ ދުވަހު މަހާރާޝްތުރާގެ ގޯއާގައި އުފަންވި އާޝާއަކީ މަޝްހޫރު މަންގޭޝްކަރު އާއިލާއަށް ނިސްބަތްވާ ފަރާތެކެވެ.

މަޝްހޫރު އެކްޓަރު އަދި ކްލެސިކަލް ލަވަކިޔުންތެރިޔާ ދީނަނާތު މަންގޭޝްކަރުގެ ގޭގައި މިއުޒިކީ މާހައުލެއްގައި ބޮޑުވި އާޝާ، އޭނާގެ މިއުޒިކީ ދަތުރު ފެށީ 1943 ވަނަ އަހަރު މަރާޓީ ފިލްމު "މާޖާ ބާލް" އަށް ކިޔައިދިން ފުރަތަމަ ލަވައިންނެވެ.

އާޝާގެ ކެރިއަރު އެންމެ ބޮޑަށް ކުރިއަރައިގެން ދިޔައީ 50 އާއި 60 ގެ އަހަރުތަކުގައެވެ. ފިލްމީ ލަވަތަކުގެ އިތުރުން ގަޒަލް، ބަޖަން، ގައްވާލީ އަދި ޕޮޕް މިއުޒިކްގައި ވެސް އޭނާ ވަނީ ނަންވިދާލާފައެވެ. އޯ.ޕީ ނައްޔަރު، އާރް.ޑީ ބަރްމަން އަދި އެސް.ޑީ ބަރްމަން ފަދަ ކޮމްޕޯޒަރުންނާއެކު ކުރި މަސައްކަތުން އޭނާއަކީ ކޮންމެ ގެއެއްގައިވެސް ދަންނަ ނަމަކަށް ވިއެވެ.

"އައިޔޭ މެހެރުބާން" (1958)، "ޕަރުދޭ މޭ ރެހެނޭ ދޯ" (1968) އަދި "ދަމް މާރޯ ދަމް" (1971) އަކީ އޭނާގެ ކާމިޔާބު އެތައް ލަވަތަކެއްގެ ތެރެއިން މަދު މިންވަރެކެވެ.

މުހައްމަދު ރަފީއު، ކިޝޯރު ކުމާރު އަދި މަންނާ ޑޭ ފަދަ ލެޖެންޑުންނާއެކު އާޝާ ކިޔާފައިވާ ޑުއެޓް ލަވަތަކަކީ މިއަދުވެސް އަގުނުކުރެވޭ ފަދަ މިއުޒިކީ ޖަވާހިރުތަކެކެވެ.

އާޝާގެ އަމިއްލަ ދިރިއުޅުމަކީވެސް އޭނާގެ ކެރިއަރު ފަދައިން އެކި ކުލަވަރުތަކުން ފުރިގެންވާ ދިރިއުޅުމެކެވެ. އުމުރުން އެންމެ 16 އަހަރުގައި އަވަށްޓެރިއެއް ކަމަށްވާ ގަންޕަތުރާއޯ ބޯސްލޭއާއެކު ފިލައިގެން ގޮސް ކުރި ކައިވެނި ނިމުނީ ހިތްދަތި ގޮތަކަށެވެ.

ލަތާ މަންގޭޝްކަރު ފަހުން ކިޔައިދީފައިވާ ގޮތުގައި، އާޝާގެ ފިރިމީހާ ވަނީ އޭނާ އާއިލާއާ އެތައް އަހަރެއް ވަންދެން ވަކިކޮށްފައެވެ. އަދި އާޝާގެ ހުނަރުގެ ބޭނުންކޮށްގެން ފައިދާ ހޯދުމަށް މަސައްކަތްކޮށް، އޭނާގެ މައްޗަށް ނުފޫޒު ފޯރުވައި ބޮޑެތި ތަކުލީފުތަކެއް ޖެއްސި ކަމަށްވެސް ލަތާ ބުނެފައިވެއެވެ.

ތިން ދަރިންގެ މަންމައެއްގެ ގޮތުގައި ހުރެ 1960 ވަނަ އަހަރު އާޝާ އޭނާގެ ފިރިމީހާ ދޫކޮށްލިއެވެ. އޭގެ ފަހުން އާރް.ޑީ ބަރްމަންއާއެކު މަސައްކަތް ފަށައި، 1980 ވަނަ އަހަރު އެ ދެމީހުން ކައިވެނި ކުރިއެވެ. ބަރްމަން ދުނިޔެ ދޫކުރީ 1994 ވަނަ އަހަރު، އުމުރުން 54 އަހަރުގައެވެ.

އާޝާ ބޯސްލޭ އާއި އޭނާގެ ދައްތަ ލަތާއާ އަޅާކިޔުންތައް އަބަދުވެސް އޮންނައިރު، ދެބެއިންގެ މެދުގައި ވާދަވެރިކަމެއް އޮންނަ ކަމުގެ އަޑުތައްވެސް އަބަދުވެސް ފެތުރެއެވެ.

އެއް އިމާރާތެއްގައި ދިރިއުޅެ، ގާތް ގުޅުމެއް ބޭއްވި ނަމަވެސް، ލަތާގެ ސަބަބުން އާޝާގެ ކެރިއަރަށް ހުރަސްތަކެއް އެޅުނު ކަމަށް ބައެއް މީހުން ބުނެއެވެ. އާޝާވެސް އެއްފަހަރަކު ބުނެފައިވަނީ ދައްތަގެ އެހީތެރިކަން ލިބުނުނަމަ މާ ކުރިންވެސް އޭނާއަށް ކުރިއެރުން ލިބުނީސް ކަމަށެވެ.

ލަތާ މަންގޭޝްކަރު ބުނެފައިވަނީ އެ ދެބެއިންގެ މެދުގައި އޮތް ހިމޭން ގުޅުމަކީ އާޝާގެ ފުރަތަމަ ފިރިމީހާގެ ނުފޫޒުން ދިމާވި ކަމެއް ކަމަށެވެ. އާންމުންގެ މެދުގައި މި ވާދަވެރިކަމުގެ ވާހަކަ ދެކެވުނަސް، ގިނަ ބަޔަކު ގަބޫލުކުރާ ގޮތުގައި އެއީ ހަގީގަތަށްވުރެ ބޮޑުކޮށްލާފައިވާ ވާހަކައެކެވެ.

1971 ވަނަ އަހަރު އާޝާ ބުނެފައިވަނީ، ދެބެއިންނަށްވެސް ލިބިފައިވަނީ މިއުޒިކީ ތަރިކައެއް ކަމަށާއި، ދައްތަ ކުރީގައި އުޅުނު ނަމަވެސް، އެކަމުގެ ސަބަބުން އޭނާގެ އަޒުމް ވަރުގަދަވެ، ދައްތައާ ހަމަކުރުމަށް އިތުރު ހިތްވަރެއް ލިބުނު ކަމަށެވެ.

އާޝާ ފާހަގަކުރެވިފައިވަނީ ބަދަލުވަމުންދާ މިއުޒިކީ އޮއިވަރާ އެއްގޮތަށް އޭނާގެ އަޑު ބަދަލުކޮށްލުމުގެ ހައިރާންކުރުވަނިވި ގާބިލުކަމެއް ލިބިފައިވާ ފަންނާނެއްގެ ގޮތުގައެވެ.

އެކި އަހަރުތަކުގެ މަތިން އޭނާ ވަނީ ބައިނަލްއަގުވާމީ ޕޮޕް އާޓިސްޓުންނާއެކު މަސައްކަތްކޮށްފައެވެ. އެގޮތުން 90 ގެ އަހަރުތަކުގެ ކުރީކޮޅު ބޯއި ޖޯޖާއި އާރް.އީ.އެމް ބޭންޑުގެ މައިކަލް ސްޓައިޕާއެކު ލަވަ ރެކޯޑްކޮށްފައިވެއެވެ.

މީގެ އިތުރުން، ކޯނަރޝޮޕް ބޭންޑުން އާޝާއަށް ހާއްސަކޮށްގެން ނެރުނު ލަވަ، ފެޓްބޯއި ސްލިމް ރީމިކްސްގެ މަގުބޫލުކަން އިތުރަށް ބޮޑުވެގެންދިޔައެވެ.

އާޝާއަކީ ކްރިކެޓަށް ވަރަށް ލޯބިކުރާ، އަދި ހުސްވަގުތުތަކުގައި ކްރިކެޓް ބަލަން ޝައުގުވެރިވާ ފަރާތެކެވެ.

2007 ވަނަ އަހަރު އޮސްޓްރޭލިއާގެ ކުރީގެ ފާސްޓް ބޯލަރު ބްރެޓް ލީއާއެކު "ޔޫ އާ ދަ ވަން ފޯ މީ" ލަވަ ކިޔުމަކީ އާޝާގެ ހަޔާތުގައި ފާހަގަ ކުރެވުނު ކަމެކެވެ. މި ލަވަ ވަނީ އިންޑިއަން ޕްރިމިއާ ލީގު (އައި.ޕީ.އެލް) ގެ ފުރަތަމަ ސީޒަންގައި ބޭނުންކޮށްފައެވެ.

އާޝާގެ ބަޔޮގްރަފީ ލިޔުނު ރާޖޫ ބަރަޓާން ލިޔެފައިވާ ގޮތުގައި، އާޝާއާ ބައްދަލުވުމަކީ ޓޯކް ޝޯއެއް ފަދަ ކަމެކެވެ. އޭނާ ހުއްޓުމެއް ނެތި ވާހަކަދައްކާނެ ކަމަށާއި، ވާހަކަ މެދުކަނޑާލާނީ ހަމައެކަނި ލަވައެއް ކިޔާލުމަށް ކަމަށް އޭނާ ލިޔެފައިވެއެވެ.

އަދި އާޝާއާ ދިމާކޮށް ސަމާސާ ކުރި ނަމަވެސް، އޭނާއަކީ އެކަންކަން ވަރަށް އުފަލާއެކު ބަލައިގަންނަ، ހިތްހެޔޮ މިޒާޖެއްގެ މީހެއް ކަމަށްވެސް ބަރަޓާން ފާހަގަކޮށްފައިވެއެވެ.

އާޝާގެ 90 ވަނަ އުފަންދުވަސް 2023 ވަނަ އަހަރު ފާހަގަކުރީ ދުބާއީގައި ބޭއްވި ލައިވް ކޮންސަޓަކުންނެވެ. އެ ޝޯގެ ކުރިން ދިން އިންޓަވިއުއެއްގައި އޭނާ ބުނީ، އުމުރުން 90 އަހަރުގައި ތިން ގަޑިއިރު ވަންދެން ސްޓޭޖްމަތީގައި ހުރެ ލަވަކިޔުމަކީ ލިބުނު ބޮޑު ނިއުމަތެއް ކަމަށެވެ.

އާޝާ ބޯސްލޭއަކީ މަސައްކަތް ހުއްޓާލި ފަންނާނެއް ނޫނެވެ. 2020 ވަނަ އަހަރު އޭނާ ވަނީ "އާޝާ ކީ އާޝާ" ގެ ނަމުގައި އޮންލައިން ޓެލެންޓް ޝޯއެއް ފަށާފައެވެ. އަދި އޭނާގެ ކާމިޔާބު ކެރިއަރުގެ ވާހަކަތައް ހިއްސާކުރުމަށް ޔޫޓިއުބް ޗެނަލެއް ފަށައި، 160,000 އަށްވުރެ ގިނަ ސަބްސްކްރައިބަރުން ހޯދާފައެވެ.

"އަހަންނަށް މިއުޒިކަކީ ނޭވާ ފަދަ އެއްޗެއް. މުޅި އުމުރު ހޭދަކުރީ އެ ވިސްނުމުގައި. މިއުޒިކަށް އަހަރެން ވަރަށް ގިނަ ޚިދުމަތް ކޮށްދީފިން. އުނދަގޫ ދުވަސްތަކުން އަރައިގަނެވުނީތީ އުފާކުރަން. އެތައް ފަހަރަކު ހީވި ދިރިނުހުރެވޭނެ ކަމަށް، އެކަމަކު އަހަރެން ކާމިޔާބު ކުރިން،" 2023 ވަނަ އަހަރު އާޝާ ބުނެފައިވެއެވެ.