ތެލުގެ އަގު އުފުލުމާ ގުޅިގެން، އިންޑިއާގެ އެންމެ ބޮޑު ދެ އެއާލައިނުން ޓިކެޓުގެ އަގު ބޮޑުކުރަން ނިންމައިފި
އެއާ އިންޑިއާއިން ޓިކެޓަކުން 90 ޑޮލަރާ ހަމައަށް އަގު ބޮޑުކުރަން ނިންމާފައިވާއިރު، އިންޑިގޯއިން ވަނީ ޓިކެޓުގެ އަގަށް 30 ޑޮލަރު އިތުރުކުރަން ނިންމާފައި.
ލަންޑަން ހީތުރޯ އެއާޕޯޓުގެ ރަންވޭއަށް ޖެއްސުމަށްޓަކައި، އެއާ އިންޑިއާގެ އެއާބަސް A350-900 މަރުކާގެ ބޯޓެއް ދަތުރުކުރަނީ. | ގެޓީ އިމޭޖަސް
އީރާނާއި އިޒްރޭލާ ދެމެދު އެމެރިކާ ބައިވެރިވެގެން ކުރަމުންދާ ހަނގުރާމައިގެ ސަބަބުން ދުނިޔޭގެ ބާޒާރުގައި ތެލުގެ އަގު އިންތިހާއަށް އުފުލިފައިވާތީ، އިންޑިއާގެ އެންމެ ބޮޑު ދެ އެއާލައިން ކަމަށްވާ އެއާ އިންޑިއާ އަދި އިންޑިގޯ އިން ފްލައިޓް ޓިކެޓުގެ އަގުން "ފިއުލް ސާޗާޖް" ނުވަތަ ތެލުގެ ފީއެއް ނަގަން ނިންމައިފިއެވެ.
މި ހަފުތާގެ ކުރީކޮޅު އެއާ އިންޑިއާއިން ނެރުނު ބަޔާނެއްގައި ބުނެފައިވަނީ، އެއާލައިނެއް ހިންގުމަށް ހިނގާ ޚަރަދުގެ ގާތްގަނޑަކަށް 40 އިންސައްތައަކީ ބޯޓަށް އަޅާ ތެޔޮ (އޭވިއޭޝަން ޓާބައިން ފިއުލް) ކަމަށެވެ. ނަމަވެސް 2026 ވަނަ އަހަރުގެ މާރިޗު މަހުން ފެށިގެން ތެޔޮ ސަޕްލައި ކުރުމަށް ދިމާވެފައިވާ ދަތިތަކާ ގުޅިގެން، ތެލުގެ އަގު ވަރަށް ބޮޑަށް އުފުލިފައިވާ ކަމަށް އެ އެއާލައިނުން ބުނެފައިވެއެވެ.
ތެލުގެ އަގަށް އައި މި ބަދަލާ ގުޅިގެން، އެއާ އިންޑިއާއިން ވަނީ ތެލުގެ ޚަރަދު ހަމަޖެއްސުމަށްޓަކައި ޓިކެޓުގެ އަގު 90 ޑޮލަރާ ހަމައަށް ބޮޑުކުރުމަށް ނިންމާފައެވެ.
މީގެ އިތުރުން، އިންޑިއާގެ ވައިގެ ދަތުރުފަތުރުގެ ބާޒާރުގައި ބޮޑު ހިއްސާއެއް އޮންނަ އަނެއް އެއާލައިން ކަމަށްވާ އިންޑިގޯއިން ހުކުރު ދުވަހު ބުނީ، ތެލުގެ އަގު އުފުލުމުގެ ސަބަބުން ކުރިމަތިވާ މާލީ ދަތިތަކުން އަރައިގަތުމަށްޓަކައި އެ އެއާލައިންގެ ޓިކެޓުތަކުން ވެސް ގާތްގަނޑަކަށް 30 ޑޮލަރާ ހަމައަށް އަގު ބޮޑުކުރަން ނިންމާފައިވާ ކަމަށެވެ.
މަސްދަރު: އަލް ޖަޒީރާ
