ރެއާލް ނުހުއްޓުވުނު، ދެ ވަނަ ލެގުގައި ވެސް ސިޓީ ބަލިކޮށް ކުއާޓާ ފައިނަލަށް

ޔުއެފާ ޗެމްޕިއަންސް ލީގުގެ ގަދަ 16 ވަނަ ބުރުގެ ދެ ވަނަ ލެގުގައި ވެސް ވާދަވެރި މެންޗެސްޓަރ ސިޓީގެ މައްޗަށް ކުރި ހޯދައި، ރެއާލް މެޑްރިޑް އިން މުބާރާތުގެ ކުއާޓާ ފައިނަލްގެ ފުރުސަތު ހޯދައިފި އެވެ.

މިދިޔަ ހަފުތާގައި ރެއާލް އަމިއްލަ ދަނޑުގައި ކުޅުނު ފުރަތަމަ ލެގުގައި އެ ޓީމުން ވަނީ 3-0 އިން ސިޓީ ބަލިކޮށްފަ އެވެ. އެހެންވެ ސިޓީ އަށް ކުއާޓާ ފައިނަލްގެ ފުރުސަތު އޮތީ އަމިއްލަ ދަނޑުގައި ތިން ލަނޑުގެ ތަފާތުން ރެއާލް ބަލިކޮށްގެންނެވެ.

ސިޓީގެ އިއްތިހާދު ސްޓޭޑިއަމްގައި އަންގާރަ ދުވަހުގެ ރޭ ދަންވަރު ކުޅުނު ދެ ވަނަ ލެގު ރެއާލް އިން ކާމިޔާބު ކުރީ 2-1 އިންނެވެ. މެޗުގައި ރެއާލް އިން ލީޑު ނަގާފައި ވަނިކޮށް، ސިޓީ އިން ނަތީޖާ ހަމަހަމަ ވެސް ކުރި އެވެ. ނަމަވެސް ފަހު ވަގުތު ލަނޑު ޖަހައިގެން ރެއާލް ވަނީ މެޗުން މޮޅުވެފަ އެވެ.

މެޗު ފަށައިގެން 22 ވަނަ މިނެޓުގައި ރެއާލް އަށް ލިބުނު ޕެނަލްޓީ ކާމިޔާބުކޮށް، ލީޑު ނަގައިދިނީ ވިނީޝިއުސް ޖޫނިއާ އެވެ. ނަމަވެސް ފުރަތަމަ ހާފުގެ 41 ވަނަ މިނެޓުގައި އާލިން ހާލަންޑް ޖެހި ލަނޑުން ސިޓީ އިން ނަތީޖާ ހަމަހަމަ ކުރި އެވެ. 

މެޗުގެ ދެ ވަނަ ހާފުގައި ސިޓީ އިން އިތުރު ލަނޑު ޖަހަން މަސައްކަތް ކުރި ނަމަވެސް، އެކަން ކާމިޔާބެއް ނުވި އެވެ. މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ވިނީޝިއުސް ވަނީ ދެ ވަނަ ލަނޑެއް ޖަހައި މެޗުން ރެއާލް މޮޅު ކޮށްދީފަ އެވެ. އެއީ އައުރެލިއަން ޗުއަމެނީ ތަނަވަސްކޮށްދިން ފުރުސަތެއްގައި ވިނީޝިއުސް ޖެހި ލަނޑެކެވެ.

މޮޅާ އެކު ރެއާލް އިން މުބާރާތުގެ ކުއާޓާ ފައިނަލްގެ ފުރުސަތު ހޯދީ އެގްރިގޭޓް ނަތީޖާ 5-1 އިންނެވެ.