ފީފާ ފުޓްސަލް ރޭންކިންގެ 99 ވަނައިގައި ދިވެހި ރާއްޖެ
9 މެއި 2026 | ހޮނިހިރު 03:11ރާއްޖެ އިން ރޭންކިންގެ 99 ވަނަ ހޯދާފައި ވަނީ 914.49 ޕޮއިންޓާ އެކު. މިއީ ކުރިން ރާއްޖެ އަށް ލިބުނު 889.11 ޕޮއިންޓާ އަޅާބަލާއިރު، 25.38 ޕޮއިންޓުގެ ކުރިއެރުމެއް.
ސާފް ފުޓްސަލް ޗެމްޕިއަންޝިޕް ކާމިޔާބު ކުރި ރާއްޖޭގެ ޤައުމީ ޓީމު. | ސޯޝަލް މީޑިއާ
ދުނިޔޭގެ ފުޓުބޯޅައިގެ މައި އިދާރާ (ފީފާ) އިން އާންމުކުރާ ފުޓްސަލްގެ ދުނިޔޭގެ ރޭންކިންގެ 99 ވަނަ އަށް ދިވެހި ރާއްޖެ ޖެހިލައިފި އެވެ.
ފީފާ އިން އެންމެ ފަހުން ނެރުނު ރޭންކިންގައި ދިވެހި ރާއްޖެ 99 ވަނައިގައި ހިމެނިފައިވާއިރު، މިއީ 10 ދަރަޖައިގެ ކުރިއެރުމެކެވެ. އޭގެ ކުރިން 2025 ވަނަ އަހަރުގެ މެއި މަހުގެ ތެރޭގައި ނެރުނު ރޭންކިންގައި ރާއްޖެ އޮތީ 109 ވަނައިގަ އެވެ.
ރާއްޖެ އިން ރޭންކިންގެ 99 ވަނަ ހޯދާފައި ވަނީ 914.49 ޕޮއިންޓާ އެކު އެވެ. މިއީ ކުރިން ރާއްޖެ އަށް ލިބުނު 889.11 ޕޮއިންޓާ އަޅާބަލާއިރު، 25.38 ޕޮއިންޓުގެ ކުރިއެރުމެކެވެ.
ދުނިޔޭގެ ރޭންކިންގެ އިތުރުން، ރާއްޖެ އިން ވަނީ ދެކުނު އޭޝިއާ ސަރަހަައްދުގެ އެއް ވަނަ މަގާމު ހޯދައިފަ އެވެ. އޭޝިއާގައި ރާއްޖެ އޮތީ 24 ވަނައިގަ އެވެ. މިއީ ރާއްޖޭގެ ޤައުމީ ފުޓްސަލް ޓީމުން ހޯދި ފަޚުރުވެރި ކާމިޔާބާ އެކު، ރާއްޖެ އަށް ލިބުނު ބޮޑު ކުރިއެރުމެކެވެ.
ރާއްޖޭގެ ޤައުމީ ފުޓްސަލް ޓީމުން ވަނީ، މިއަހަރުގެ ޖަނަވަރީ މަހު ތައިލެންޑުގައި ކުރިއަށް ދިޔަ ސާފް ފުޓްސަލް ޗެމްޕިއަންޝިޕް ކާމިޔާބު ކޮށްފަ އެވެ. ފުރަތަމަ ފަހަރަށް ބޭއްވި ސާފް ފުޓްސަލް ޗެމްޕިއަންޝިޕް ރާއްޖެ އިން ކާމިޔާބު ކުރީ ކުޅުނު ހުރިހާ މެޗަކުން ވެސް މޮޅުވެގެންނެވެ. އެގޮތުން ރާއްޖެ އިން ވަނީ ޕާކިސްތާން، ބަންގްލަދޭޝް، އިންޑިއާ، ނޭޕާލް، ބޫޓާން، އަދި ސްރީ ލަންކާ ބަލިކޮށްފަ އެވެ.
ފީފާ އިން އާންމު ކޮށްފައިވާ ފުޓްސަލް ރޭންކިންގެ އެއް ވަނައިގައި ބްރެޒިލް އޮތީ 1684.97 ޕޮއިންޓާ އެކު އެވެ. ދެ ވަަނައިގައި ޕޯޗުގަލް އޮތްއިރު، ތިން ވަަނައިގައި އޮތީ ސްޕެއިންނެވެ. ހަތަރު ވަނައިގައި އާޖެންޓީނާ އޮތްއިރު، ފަސް ވަނައިގައި އޮތީ އީރާން އެވެ.
