ޓްރަމްޕްގެ ބައްދަލުވުމުގައި އިންފަންޓީނޯ ބައިވެރިވުމަކީ އޮލިމްޕިކް ޗާޓަރާ ޚިލާފު ކަމެއް ނޫން: އައިއޯސީ

އެމެރިކާގެ ރައީސް ޑޮނަލްޑް ޓްރަމްޕް އިސްވެ ހުންނަވައި އުފައްދާފައިވާ "ބޯޑް އޮފް ޕީސް" ގެ ފުރަތަމަ ބައްދަލުވުމުގައި، ދުނިޔޭގެ ފުޓުބޯޅައިގެ މައި އިދާރާ (ފީފާ)ގެ ރައީސް ޖިއާނީ އިންފަންޓީނޯ ބައިވެރިވުމަކީ، އޮލިމްޕިކް ޗާޓަރުގެ ސިޔާސީ ވަކި ފަރާތަކަށް ނުޖެހުމުގެ އުސޫލުތަކާ ޚިލާފު ކަމެއް ނޫން ކަމަށް އިންޓަނޭޝަނަލް އޮލިމްޕިކް ކޮމެޓީ (އައިއޯސީ) އިން ބުނެފި އެވެ. 

ފީފާގެ ރައީސްގެ އިތުރުން، އިންފަންޓީނޯ އަކީ އައިއޯސީގެ މެމްބަރެއްގެ ގޮތުގައި ވެސް ހުންނެވި ބޭފުޅެކެވެ. މިދިޔަ ބުރާސްފަތި ދުވަހު ބޭއްވި ބޯޑު އޮފް ޕީސްގެ ފުރަތަމަ ބައްދަލުވުމުގައި އިންފަންޓީނޯ ވަނީ ބައިވެރިވެ ވަޑައިގެންފަ އެވެ. އެ ބައްދަލުވުމުގައި ޓްރަމްޕްގެ އިތުރުން، ދުނިޔޭގެ ޤައުމު ތަކުގެ ލީޑަރުން ވަނީ ބައިވެރިވެ ވަޑައިގެންފަ އެވެ. 

އެކަމާ ގުޅޭ ގޮތުން އައިއޯސީގެ ތަރުޖަމާނު ވިދާޅުވީ، ފީފާ އާއެކު އެ ކޮމެޓީ އިން މުއާމަލާތު ކޮށްފައިވާ ކަމަށާއި، ފަލަސްޠީނުގެ ޣައްޒާގައި ކުޅިވަރުގެ އިންފްރާސްޓްރަކްޗާ ޤާއިމު ކުރުމާއި، ތައުލީމާއި، ހުނަރުވެރި ކުޅުންތެރިން އުފެއްދުމަށް ފީފާ އިން ކުރިއަށް ގެންދާ އިންވެސްޓްމަންޓް ޕްރޮގްރާމް އަކީ ބައިނަލްއަޤުވާމީ ކުޅިވަރު ފެޑެރޭޝަނަކުން އަދާ ކުރަން ޖެހޭ ދައުރާ އެއްގޮތަށް ކުރިއަށްދާ ކަމެއް ކަމަށެވެ. 

މީގެ އިތުރުން އޯއައިސީގެ އޮލިމްޕިކް ސޮލިޑާރިޓީ މެދުވެރިކޮށް އެ ސަރަހައްދުގެ ކުޅިވަރު ކުރިއެރުވުމަށް އެ ކޮމެޓީ އިން ވެސް އެހީތެރިކަން ފޯރުކޮށްދެމުންދާ ކަމަށް އޭނާ ފާހަގަ ކުރައްވާފައިވެ އެވެ. އޮލިމްޕިކް ޗާޓަރުގައި ބަޔާން ކޮށްފައިވާ ގޮތުން، އެ ކޮމެޓީގެ މެމްބަރުން އަބަދު ވެސް ވިޔަފާރި އަދި ސިޔާސީ މަސްލަޙަތު ތަކުން އެއްކިބާވެ މިނިވަންކަމާ އެކު މަސައްކަތް ކުރަން ޖެހެ އެވެ. އަދި ސަރުކާރު ތަކުން، ނުވަތަ އެހެން ޖަމާއަތް ތަކަކުން މެމްބަރުންގެ މިނިވަން ކަމަށް، ނުވަތަ ވޯޓު ދިނުމުގެ ޙައްގަށް ނުފޫޒު ފޯރުވާ ފަދަ އެއްވެެސް އިރުޝާމެއް ޤަބޫލު ކުރުމަކީ ވެސް މަނާ ކަމެކެވެ. 

ޓްރަމްޕްގެ އިސް ނެންގެވުމުގެ ދަށުން އުފައްދާފައިވާ ބޯޑު އޮފް ޕީސް އަކީ، އެކި ފަރާތްތަކުގެ ފާޑު ކިޔުން އަމާޒުވެފައިވާ ބޯޑެކެވެ. މި ބޯޑުގައި އިޒްރޭލް ހިމެނުނު ނަމަވެސް، ފަލަސްޠީނުގެ އެއްވެސް މަންދޫބަކަށް ފުރުސަތު ދީފައި ނުވެ އެވެ. މީގެ އިތުރުން ޣައްޒާގެ މައްސަލައިގެ އިތުރުން، ބައިނަލްއަޤުވާމީ އެހެން މައްސަލަ ތަކަށް ވެސް މި ބޯޑުން ޙައްލު ހޯއްދަވާނެ ކަމަށް ޓްރަމްޕް ވިދާޅުވުމާ ގުޅިގެން، މިއީ ބައިނަލްއަޤުވާމީ ޑިޕްލޮމަސީގައި އދ. އިން އަދާކުރާ ދައުރަށް ހުރަސްއެޅިދާނެ ކަމެއްކަމުގެ ކަންބޮޑުވުން ވަނީ އުފެދިފަ އެވެ. 

އެ ބައްދަލުވުމުގެ ތެރެއިން އިންފަންޓީނޯ ވަނީ ޓްރަމްޕްގެ ރިޔާސީ ދައުރުތަކަށް ނިސްބަތްވާ "45-47" ޖަހާފައިވާ ރަތް ކުލައިގެ ތޮތްޕެއް އަޅުއްވައިގެން ހުންނަވައިފަ އެވެ. އަދި ޣައްޒާގައި 50 ކުޑަ ފުޓުބޯޅަ ދަނޑާއި، ފަސް ބޮޑު ދަނޑުގެ އިތުރުން، ޒަމާނީ ފީފާ އެކަޑަމީ އަކާއި، 20،000 މީހުންގެ ޖާގައިގެ ޤައުމީ ދަނޑެއް އެޅުމަށް ބޯޑު އޮފް ޕީސް އާއެކު ފީފާ އިން ވެފައިވާ އެއްބަސްވުން ވެސް އޭނާ ވަނީ ދައްކަވާލައްވައިފަ އެވެ. 

މިއަހަރުގެ ފީފާ ވޯލްޑް ކަޕް އެމެރިކާ އާއި، މެކްސިކޯ އަދި ކެނެޑާގައި ބޭއްވުމަށް ހަމަޖެހިފައިވާއިރު، މީގެ ކުރިން ވެސް އިންފަންޓީނޯ ވަނީ އެކި ފަހަރު މަތިން ޓްރަމްޕްއާ ބައްދަލު ކުރައްވައިފަ އެވެ. އަދި މިދިޔަ އަހަރުގެ ޑިސެމްބަރު މަހުގެ ތެރޭގައި ފީފާ އިން ވަނީ ދުނިޔޭގެ ސުލްޙަ އަށް މަސައްކަތް ކުރުމުގެ އެވޯޑެއް ވެސް ޓްރަމްޕް އަށް އަރުވައިފަ އެވެ.