ފީފާގެ ރައީސް ކަމުގެ ހަތަރު ވަނަ ދައުރަކަށް އިންފަންޓީނޯ އިންތިޚާބު ކުރަން އޭޝިއާ އަދި އެފްރިކާ އިން ތާއީދު ކޮށްފި

ދުނިޔޭގެ ފުޓުބޯޅައިގެ މައި އިދާރާ (ފީފާ)ގެ ރައީސް ކަމުގެ ހަތަރު ވަނަ ދައުރަަކަށް ޖިއާނީ އިންފަންޓީނޯ އިންތިޚާބު ކުރަން، އޭޝިއާ އާއި އެފްރިކާގެ ފުޓުބޯޅަ ކޮންފެޑަރޭޝަން ތަކުން ފުރިހަަމަ އަށް ތާއީދު ކޮށްފި އެވެ. 

މިދިޔަ ބުރާސްފަތި ދުވަހު ކެނެޑާގެ ވެންކޫވަރުގައި ބޭއްވި ފީފާގެ ކޮންގްރެސްގައި އިންފަންޓީނޯ ވަނީ، ހަތަރު ވަނަ ދައުރަަކަށް ވާދަ ކުރައްވާނެ ކަމަށް އިއުލާން ކުރައްވައިފަ އެވެ.

ކޮންފެޑަރޭޝަން އޮފް އެފްރިކް ފުޓުބޯޅަ (ކާފް) އިން ބުނީ، 2027 ވަނަ އަހަރު ބާއްވާ އިންތިޚާބުގައި އިންފަންޓީނޯ އަށް ތާއީދު ކުރުމަށް އެ އިދާރާގެ ހުރިހާ މެމްބަރުން އިއްތިފާގުވެފައިވާ ކަމަށެވެ. ކާފްގެ އިތުރުން، އޭޝިއަން ފުޓުބޯޅަ ކޮންފެޑަރޭޝަން (އޭއެފްސީ) އިން ވަނީ އިންފަންޓީނޯ އަށް ތާއީދު ކުރާނެ ކަމަށް ހާމަ ކޮށްފަ އެވެ. 

އޭއެފްސީގެ ރައީސް ޝައިޚް ސަލްމާން ބިން އިބްރާހީމް އަލް ޚަލީފާ ނެރުއްވި ބަޔާނެއްގައި ވިދާޅުވީ، ފީފާ މިހާރު އޮތީ ތާރީޚުގައި ވެސް އެންމެ ވަރުގަދަ ޙާލަތުގައި ކަމަށެވެ. އެއާ އެކު 2027 ވަނަ އަހަރުން ފެށިގެން، 2031 ވަނަ އަހަރުގެ ނިޔަލަށް އޮންނަ ދައުރަށް އިންފަންޓީނޯ ކުރިމަތިލައްވާއިރު، އޭޝިއާގެ ފުރިހަމަ ތާއީދު އޭނާ އަށް އޮންނާނެ ކަމަށް ޝައިޚް ސަލްމާން ވަނީ ވިދާޅުވެފަ އެވެ.

ފީފާގެ އިންތިޚާބުގައި ވޯޓުލުމުގެ ހައްގު ލިބިފައިވާ 211 މެމްބަރު ޤައުމުގެ ތެރެއިން، 101 ވޯޓު ނިސްބަތް ވަނީ އެފްރިކާ އާއި އޭޝިއާ ސަރަހައްދަށެވެ. މީގެ އިތުރުން ދެކުނު އެމެރިކާގެ ފުޓުބޯޅަ އިދާރާ (ކޮންމެބޯލް)ގެ 10 ވޯޓު ވެސް އިންފަންޓީނޯ އަށް ވަނީ ކަށަވަރުވެފަ އެވެ. 

ކޮރަޕްޝަންގެ މައްސަލަ ތަކެއްގައި ފީފާގެ ކުރީގެ ރައީސް ސެޕް ބްލެޓާ މަގާމުން އިސްތިއުފާ ދެއްވުމާ ގުޅިގެން، އެންމެ ފުރަތަމަ ފީފާގެ ރައީސް ކަމަށް އިންފަންޓީނޯ އިންތިޚާބު ވެފައި ވަނީ 2016 ވަނަ އަހަރު އެވެ. އޭގެ ފަހުން 2019 ވަނަ އަހަރު ދެ ވަނަ ދައުރެއް އޭނާ ހޯއްދެވިއިރު، ތިން ވަނަ ދައުރެއް ހޯއްދެވީ 2023 ވަނަ އަހަރު އެވެ. 

ފީފާގެ ޤަވާއިދު ބުނާ ގޮތުން ރައީސްކަން ކުރެވޭނީ އެންމެ ގިނަ ވެގެން ތިން ދައުރަށެވެ. ނަމަވެސް، 2016 އިން 2019 އަށް އޭނާ ފުރިހަމަ ކުރެއްވި ފުރަތަމަ ދައުރަކީ، ކުރީގެ ރައީސް ބްލެޓާގެ ދައުރުގެ ބާކީ ބައި ކަމަށް ނިންމައި، އެއީ ފުރިހަމަ ދައުރެއްގެ ގޮތުގައި ނުގުނުމަށް ފީފާ އިން ވަނީ ނިންމައިފަ އެވެ. އެހެންކަމުން، އަންނަ އަހަރު ބާއްވާ ފީފާގެ އިންތިޚާބުގައި ވާދަ ކުރުމުގެ ފުރުސަތު އިންފަންޓީނޯ އަށް ވަނީ ފަހިވެފަ އެވެ.

އިންފަންޓީނޯގެ ދައުރުގައި ފީފާގެ އާމްދަނީ ވަނީ ރެކޯޑު މިންވަރަކަށް އިތުރުވެފަ އެވެ. އެގޮތުން މިއަހަރުގެ ފީފާ ވޯލްޑް ކަޕް އިން 13 ބިލިއަން އެމެރިކާ ޑޮލަރުގެ އާމްދަނީއެއް ލިބޭނެ ކަމަށް ލަފާ ކުރެވޭއިރު، ފީފާ ފޯވާޑް ޕްރޮގްރާމްގެ ދަށުން މެމްބަރު ޤައުމު ތަކަށް ދޭ އެހީ ވެސް ވަނީ އަށް ގުނަ އަަށް އިތުރު ކޮށްފަ އެވެ. އެގޮތުން 2027 ވަނަ އަހަރުން ފެށިގެން، 2030 ވަނަ އަހަރަށް މެމްބަރު ޤައުމު ތަކަށް 2.7 ބިލިއަން އެމެެރިކާ ޑޮލަރު ބެހުމަށް ވަނީ ނިންމައިފަ އެވެ. 

މި ކާމިޔާބީތަކާ އެކު ވެސް، އިންފަންޓީނޯ އަށް ގިނަ ބައެއްގެ ފާޑު ކިޔުންތައް އަމާޒުވެ އެވެ. އޭގެ ތެރޭގައި އެމެރިކާގެ ރައީސް ޑޮނަލްޑް ޓްރަމްޕްއާ އޮންނަ ގާތް ގުޅުމާއި، ވޯލްޑް ކަޕްގެ ޖާގަ 48 ޓީމަށް ބަދަލު ކުރުން އަދި 32 ޓީމު ހިމެނޭ ކުލަބު ވޯލްޑް ކަޕް ތައާރަފު ކުރުން ހިމެނެ އެވެ. ޚާއްސަކޮށް، އެމެރިކާގެ ރައީސް ޓްރަމްޕް އަށް ފީފާގެ ސުލްޙައިގެ އިނާމު ދިނުމާ ގުޅިގެން އިންފަންޓީނޯ އަށް އެތައް ފާޑު ކިޔުމެއް ކުރިމަތިވި އެވެ. އެގޮތުން ސިޔާސީ ގޮތުން ވަކި ފަރާތަކަށް ނުޖެހޭ ހަމަހަމަ މިންގަނޑުން ފީފާ ބޭރުވެފައިވާ ކަމަށް ބުނެ، ފީފާގެ އެތިކްސް ކޮމެޓީ އަށް މައްސަލަ ވެސް ހުށަހަޅާފައިވެ އެވެ.