ފީފާ އިން އިޒްރޭލް އަށް އެޅި ފިޔަވަޅަކީ ޖޫރިމަނާ ކުރުމާ އެކު، ދަނޑުގައި ބެނާއެއް ދެމުމަށް
މައްސަލަ ބެލުމަށް ފަހު ފީފާ ޑިސިޕްލިނަރީ ކޮމެޓީ އިން ނިންމާފައި ވަނީ އިޒްރޭލް ޖޫރިމަނާ ކުރުމާ އެކު، އިޒްރޭލްގެ ދަނޑު ބޭރުގައި ބެނާއެއް ދެމުމަށް. އެގޮތުން ފީފާ އިން ނިންމާފައި ވަނީ 190،700 (އެއް ލައްކަ ނުވަދިހަ ހާސް، ހަތް ސަތޭކަ) އެމެރިކާ ޑޮލަރުން އިޒްރޭލް ޖޫރިމަނާ ކުރުމަށް.
ފީފާގެ ރައީސް ޖިއާނީ އިންފަންޓީނޯ | ރޮއިޓާސް
ޣައްޒާއާ ދެކޮޅަށް އިޒްރޭލް އިން ހިންގަމުން އަންނަ ޖަރީމާތަކާ ގުޅިގެން، ދުނިޔޭގެ ފުޓުބޯޅައިގެ މައި އިދާރާ (ފީފާ) އިން އިޒްރޭލްއާ ދެކޮޅަށް ވަރަށް އާދައިގެ ފިޔަވަޅު ތަކެއް އަޅައިފި އެވެ.
އިޒްރޭލް އިން ފަލަސްޠީނުގެ ޣައްޒާގައި ހިންގަމުން އަންނަ ހަނގުރާމަ އާއި، ކުށެއް ނެތް މައުސޫމް އެތައް ބަޔަކު ޝަހީދު ކުރަމުން އަންނާތީ، އިޒްރޭލްއާ ދެކޮޅަށް ފިޔަވަޅު އަޅައި ދިނުމަށް ހުށަހަޅާފައި ވަނީ 2024 ވަނަ އަހަރު އެވެ. އެ މައްސަލަ ހުށަހެޅީ ފަލަސްޠީނުގެ ފުޓުބޯޅަ އެސޯސިއޭޝަން އިންނެވެ.
ނަމަވެސް، މައްސަލަ ބެލުމަށް ފަހު ފީފާ އިން އިޒްރޭލް ސަސްޕެންޑު ކޮށްފައި ނުވެ އެވެ. މީގެ ކުރިން ވެސް އެތައް ބަޔަކު ވަނީ، ފީފާ އިން އިޒްރޭލް ސަސްްޕެންޑު ނުކުރާތީ އެކަމަށް ފާޑު ކިޔައިފަ އެވެ. ނަމަވެސް، ރަޝިޔާ އާއި ޔޫކްރެއިންއާ ދެމެދު ހިނގަމުން އަަންނަ ހަނގުރާމައިގައި ފީފާ އާއި ޔުއެފާގެ އިތުރުން، އެހެން ކުޅިވަރު އިދާރާ ތަކުން ވެސް ވަނީ ރަޝިޔާއާ ދެކޮޅަށް ފިޔަވަޅު އަޅައިފަ އެވެ.
މައްސަލަ ބެލުމަށް ފަހު ފީފާ ޑިސިޕްލިނަރީ ކޮމެޓީ އިން ނިންމާފައި ވަނީ އިޒްރޭލް ޖޫރިމަނާ ކުރުމާ އެކު، އިޒްރޭލްގެ ދަނޑު ބޭރުގައި ބެނާއެއް ދެމުމަށެވެ. އެގޮތުން ފީފާ އިން ނިންމާފައި ވަނީ 190،700 (އެއް ލައްކަ ނުވަދިހަ ހާސް، ހަތް ސަތޭކަ) އެމެރިކާ ޑޮލަރުން އިޒްރޭލް ޖޫރިމަނާ ކުރުމަށެވެ.
މީގެ އިތުރުން ދެން އަޅާފައިވާ ފިޔަވަޅަކީ އަމިއްލަ ދަނޑުގައި އިޒްރޭލް އިން ދެން ކުޅޭ ފީފާގެ ތިން މެޗުގައި ވެސް ދަނޑު ބޭރުގައި ބެނާއެއް ދެމުމަށެވެ. އެގޮތުން އެ ބެނާގައި، "ފުޓްބޯލް ޔުނައިޓްސް ދަ ވާރލްޑް - ނޯ ޓު ޑިސްކްރިމިނޭޝަން" މިހެން ޖެހުމަށް ވަނީ އަންގައިފަ އެވެ.
މިއީ ފީފާ އިން އިޒްރޭލްއާ ދެކޮޅަށް އަޅާފައިވާ ވަރަށް އާދައިގެ ފިޔަވަޅު ތަކެއް ކަމަށްވާއިރު، އިޒްރޭލްއާ ދެކޮޅަށް ހަރުކަށި ފިޔަވަޅު އެޅުމަށް ފީފާ އިން ފަސް ޖެހޭ ކަަމަށް އެތައް ބަޔަކު އަންނަނީ ބުނަމުންނެވެ.
