ކުރީގެ ރައީސް ޔާމީނު ދެކެ އެންމެ ލޯބިވާ އެންމެ އަޅާލަން ބޭނުންވާ ބޭފުޅަކީ ރައީސް މުއިއްޒު: މިނިސްޓަރު ސައީދު
ސިނަމާލެ ބްރިޖު މަޝްރޫއުގެ އެންމެ ބޮޑު ކްރެޑިޓެއް ލިބެންޖެހޭނީ ކުރީގެ ރައީސް ޔާމީނަށް ކަމަށާއި، އެމަނިކުފާނަށް އޮންނަ އިހުތިރާމަށް އެއްވެސް ބަދަލެއް ނާންނާނެ ކަމަށް މިނިސްޓަރު ސައީދު ވިދާޅުވި. ރައީސް މުއިއްޒުގެ ހިތްޕުޅުގައި ޔާމީނާ މެދު އެއްވެސް ހިތްބުރަކަމެއް ނެތްކަން ފާހަގަކުރައްވައި، މިނިސްޓަރު ސައީދު ވިދާޅުވީ ޔާމީންގެ އަރިހުގައި އުޅުއްވާ ބައެއް ބޭފުޅުން މަސައްކަތް ކުރައްވަނީ ހަގީގަތް އޮޅުވާލުމަށް ކަމަށް.
ރައީސް ޑރ. މުހައްމަދު މުއިއްޒު (ކ) އަދި ކުރީގެ ރައީސް އަބްދުﷲ ޔާމީން. | ރައީސް އޮފީސް
ރައީސުލްޖުމްހޫރިއްޔާ ޑރ.މުހައްމަދު މުއިއްޒަކީ، ކުރީގެ ރައީސް އަބްދުﷲ ޔާމީނު ދެކެ އެންމެ ލޯބިވާ އެންމެ އަޅާލަން ބޭނުންވާ ބޭފުޅާ ކަމަށް މިނިސްޓަރ އޮފް އިކޮނޮމިކް ޑިވެލޮޕްމަންޓް، ޓްރާންސްޕޯޓް އެންޑް ޓްރޭޑް މުހައްމަދު ސައީދު ވިދާޅުވެއްޖެ އެވެ.
ބުރާސްފަތި ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ރާއްޖެޓީވީގެ ނޫސްވެރިޔާ ވަނީ ސިނަމާލެ ބްރިޖުގެ މަޝްރޫއުއާ ގުޅޭގޮތުން މިނިސްޓަރު ސައީދު ދެއްކެވި ވާހަކަތަކަށް އިޝާރާތްކޮށް ސުވާލު ކޮށްފަ އެވެ. އަދި އެމަޝްރޫއުގައި ޔާމީންގެ ދައުރެއް ނެތްތޯ ސުވާލުކުރި އެވެ.
މިސުވާލަށް މިނިސްޓަރު ސައީދު ވިދާޅުވީ، ސިނަމާލެ ބްރިޖު މަޝްރޫއުގެ އެންމެ ބޮޑު ކްރެޑިޓެއް ލިބޭނީ ޔާމިނަށް ކަމަށާއި، ޔާމީނަށް ފުރިހަމަ އިހުތިރާމް އޮންނާނެ ކަމަށެވެ.
މިނިސްޓަރު ސައީދު ވިދާޅުވީ ރައީސް މުއިއްޒަކީ ޔާމީނުގެ އެންމެ ލޯބިވާ އެންމެ އަޅާލަން ބޭނުންވާ ބޭފުޅާ ކަމަށާއި، ޔާމީން އަރިހުގައި ހުންނަން ބޭނުންފުޅުވާނެ އެއް ބޭފުޅާ ކަމަށެވެ. އަދި ރައީސް މުއިއްޒުގެ ހިތްޕުޅުގައި ޔާމީންނާ ދޭތެރޭގައި އެއްވެސް ކަހަލަ ހިތްބުރަ ކަމެއް ނޯންނާނެ ކަމަށް މިނިސްޓަރު ސައީދު ވިދާޅުވި އެވެ.
މީގެ އިތުރުން މިނިސްޓަރު ސައީދު ވިދާޅުވީ ޔާމީންގެ އަރިހުގައި އުޅުއްވާ ދެތިން ބޭފުޅަކު އުޅުއްވަނީ ވަރަށް ހުތުރު ކޮށް ކަމަށާއި، އެބޭފުޅުން އެ ދައްކަވާ ވާހަކަތައް ވެސް ޔާމީން ގަބޫލުފުޅު ނުކުރައްވާނެ ކަމަށެވެ.
ނޫން، ނޫން، ރައީސް ޔާމީނަށް ވަރަށް ބޮޑު ކްރެޑިޓެއް. އެމަނިކުފާނަކީ ވަރަށް ވިސްނުންތެރި ބޭފުޅެއް. އެ މަނިކުފާނަކީ ހަމަ ވަރަށް ވިޝަނަރީ ބޭފުޅެއް. އަޅުގަނޑު ދެންނެވި އެއްޗަށް އަނެއްކާވެސް އޮޅުވާލީ، ރައީސް ޔާމީނަށް އޮންނަންވާ ފުރިހަމަ އިހުތިރާމު ރައީސް ޑރ. މުހައްމަދު މުއިއްޒުގެ ހިތްޕުޅުގައި އަބަދުވެސް އޮވޭ. އޮންނާނެ. އެ އެއްޗެއް ބަދަލެއް ވެސް ނުވާނެ. ރައީސް މުއިއްޒަކީ ރައީސް ޔާމީނަށް އެންމެ ލޯބިވާ އެންމެ އަޅާލަން ބޭނުންވާ އެންމެ ރައީސް ޔާމީން އަރިހުގައި ހުންނަން ބޭނުންފުޅުވާނެ އެއް ބޭފުޅަކު އެއީ. އެހެންވީމާ، ރައީސް މުއިއްޒުގެ ހިތްޕުޅުގައި ރައީސް ޔާމީންނާ ދޭތެރޭގައި އެއްވެސް ކަހަލަ ހިތްބުރަ ކަމެއް އޮވެދާނެ ކަމަކަށް އަޅުގަނޑު އަދި ރާއްޖެ ޓީވީން ތިޔައިން ބުންޏަކަސް ގަބޫލެއް ނުކުރާނަން އިނގޭތޯ. އެއީ އަޅުގަނޑުމެން އެންމެންނަކީ އެއް ޓީމެއް. އަޅުގަނޑު ދެންނެވިހާ އައިސް ވާހަކައަކީ، އޭރުގެ ހައުސިންގ މިނިސްޓަރަކީ، އިންފްރާސްޓްރަކްޗަރ މިނިސްޓަރަކީ، ރައީސް ޑރ. މުޙައްމަދު މުޢިއްޒުއޭ. ބުރިޖު ގެންދެވީ އެމަނިކުފާނުގެ ސީދާ ބެލުމުގެ ދަށުންނޭ. ދެން އޭރުގެ އިޤްތިޞާދީ ވަޒީރަކަށް ހުރީ ހަމަ އަޅުގަނޑު ހުރީ. އެ ވާހަކަ އަޅުގަނޑު ފަސޭހަ ގޮތަކަށް މި ދަންނަވާލީ. އަޅުގަނޑުމެން ދެމީހުން ތިބީ އޭގެ ނޫންހެއްޔޭ. މީގައި ނެތީމި ވަގުތު އެންމެ މީހެއް ނޫންހެއްޔޭ ނުވަތަ މަދު މީހެއް ނޫންހެއްޔޭ.މިނިސްޓަރ އޮފް އިކޮނޮމިކް ޑިވެލޮޕްމަންޓް، ޓްރާންސްޕޯޓް އެންޑް ޓްރޭޑް މުހައްމަދު ސައީދު
ޕީއެންސީގައި 70،000 މެންބަރުން ތިބިކަން ފާހަގަކުރައްވައި މިނިސްޓަރު ސައީދު ވިދާޅުވީ މި ފިކުރަށް ގިނަ ބަޔަކު ތާއީދު ކުރަމުންދަނީ ސަބަބުތަކެއް ހުރީމަ ކަމަށެވެ. އަދި ދެ ދައުރުގައި ވެރިކަން ކުރިއިރު، ޕާޓީގެ ފަރާތުން ނަމޫނާ ދައްކާފައިވާ ކަމަށް މިނިސްޓަރު ސައީދު ވިދާޅުވި އެވެ.
