އީޝާ ފުލުހަށް ހާޒިރު ކުރީ ހަތަރު ފަރާތުން މަގު ބަންދުކޮށްގެން، ފުލުހުން ދަނީ ނޫސްވެރިންނަށް ވެސް ހުރަސް އަޅަމުން
6 މެއި 2026 | ބުދަ 12:00މި ތަހުގީގަށް ފުރިހަމަ އެއްބާރުލުން ދިނުމަށް އީޝާ ތައްޔާރަށް ހުރި ނަމަވެސް، އޭނާ ފުލުހަށް ހާޒިރުކުރި ސަރަހައްދު ބަންދުކޮށް، އެ ސަރަހައްދުގައި ހަރަކާތްތެރިވި ނޫސްވެރިންނަށް ފުލުހުން ވަނީ ހުރަސް އަޅާފަ. ރައީސުލްޖުމްހޫރިއްޔާއަށް ގަޒުފުކުރި ކަމުގެ ތުހުމަތުގައި ހިންގާ މި މައްސަލައިގައި އީޝާގެ ފޯނު ރެކޯޑުތައް ހިއްސާކުރަން ވެސް އޭނާ ވަނީ އެއްބަސްވެފަ.
ބުދަ ދުވަހު ހަވީރު 4 ޖެހި އިރު އީޝާ ހެންވޭރު ޕޮލިސް ސްޓޭޝަނަށް ހާޒިރުކުރުން | ރާއްޖެ އެމްވީ
އޮންލައިން ނޫސް "އަދަދު" އިން ޝާއިއުކުރި "އައިޝާ" ޑޮކިއުމެންޓްރީއާ ގުޅިގެން ފުލުހުން ހިންގާ ތަހުގީގަށް އައިޝަތު އީޝާ އަޝްރަފު ބުދަ ދުވަހު ވެސް ފުލުހަށް ހާޒިރުކޮށްފި އެވެ.
އީޝާ ފުލުހަށް ހާޒިރުވެފައިވަނީ އޭނާގެ ވަކީލުން ކަމަށްވާ ކުރީގެ ޕްރޮސިކިއުޓާ ޖެނެރަލް ހުސެން ޝަމީމް އަދި މުހައްމަދު ފަރީދު އާއެކުގަ އެވެ.
ބުދަ ދުވަހު ހަވީރު 4 ޖެހިއިރު އީޝާ ހެންވޭރު ޕޮލިސް ސްޓޭޝަނަށް ހާޒިރުކުރިއިރު، އެ ސަރަހައްދުގެ ސަލާމަތީ ކަންކަން ވަނީ ވަރަށް ބޮޑަށް ވަރުގަދަކޮށްފަ އެވެ. އެގޮތުން ހެންވޭރު ޕޮލިސް ސްޓޭޝަނަށް ދެވެން އޮންނަ ހުރިހާ މަގެއް ބެރިކޭޑް ޖަހައި ބަންދުކޮށްފައި ހުރިއިރު، ގިނަ އަދަދެއްގެ ފުލުހުން އެ ސަރަހައްދުގައި ދަނީ ހަރަކާތްތެރިވަމުންނެވެ.
މި ހަބަރު ކަވަރުކުރުމަށް އެ ސަރަހައްދުގައި ހަރަކާތްތެރިވާ ނޫސްވެރިންނަށް ފުލުހުން ދަނީ ހުރަސް އަޅަމުންނެވެ. ފުލުހުން ވަނީ މަޖީދީ މަގާއި ޖަނަވަރީ މަގު ގުޅޭ ހިސާބުން ނޫސްވެރިންނަށް ކުރިއަށް ނުދެވޭނެހެން ހުރަސް އަޅާފަ އެވެ. މީގެ އިތުރުން އެ ސަރަހައްދުގައި ހުންނަ ކެފޭއަކަށް އާންމު ރައްޔިތުންނާއި ނޫސްވެރިން ވަނުމަށް ވެސް ފުލުހުން ވަނީ ހުރަސް އަޅާފަ އެވެ.
އީޝާގެ މައްޗަށް ތުހުމަތު ކުރެވެނީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ މައްޗަށް ގަޒުފުކޮށް ހަދާފައިވާ ކަމަށް ބުނާ ޑޮކިއުމެންޓްރީގައި ބައިވެރިވުމެއް އޮތް ކަމަށެވެ. މި މައްސަލައިގައި ސުވާލުކޮށް ބަޔާން ނެގުމަށް އަންގާރަ ދުވަހުގެ ރޭ ވެސް އީޝާ ވަނީ ހުޅުމާލެ ޕޮލިސް ސްޓޭޝަނަށް ހާޒިރުކޮށްފަ އެވެ.
އީޝާގެ ވަކީލު ހުސައިން ޝަމީމް ވިދާޅުވީ، "އައިޝާ ޑޮކިއުމެންޓްރީއާ ގުޅިގެން ފުލުހުން ހިންގާ ތަހުގީގަށް އީޝާގެ ފަރާތުން ފުރިހަމަ އެއްބާރުލުން ދޭން ބޭނުންވާ" ކަމަށެވެ. އަދި އީޝާގެ ފޯނު ކޯލުތަކާއި މެސެޖުތައް ފަދަ ހުރިހާ ތަފްސީލެއް ހިއްސާކުރަން އޭނާ ހުރީ ތައްޔާރަށް ކަމަށް ވެސް ޝަމީމް ވިދާޅުވި އެވެ.
ޝަމީމް އިތުރަށް ފާހަގަކުރެއްވި ގޮތުގައި އީޝާ އަކީ މި ހާދިސާގައި "ވިކްޓިމް" އެއް ނުވަތަ އަނިޔާ ލިބުނު ފަރާތެކެވެ. އީޝާ ބޭނުންވަނީ މިކަން ހިނގައިދިޔަ ގޮތުގެ ހުރިހާ ތަފްސީލެއް ފުލުހުންނަށް ކިޔައިދީ، ތަހުގީގަށް ފުރިހަމައަށް އެއްބާރުލުން ދިނުމަށް ކަމަށް ވެސް ވަކީލު ވިދާޅުވި އެވެ.
