ވަޒީރު އިހުސާންގެ ނުސީދާ ތުހުމަތެއް ކުރީގެ އުއްތަމަފަނޑިޔާރު އަބްދުﷲ ދީދީ އަށް
އަދަދު ނޫހުން އާންމުކުރި ޑޮކިއުމަންޓްރީއެއްގެ މައްސަލައިގައި ފުލުހުންގެ ތަހުގީގަށް ހޯމް މިނިސްޓަރު އަލީ އިހުސާން ނުފޫޒު ފޯރުވާ ކަމަށް ކުރީގެ އުއްތަމަ ފަނޑިޔާރު ޑރ. އަހުމަދު އަބްދުﷲ ދީދީ ކުރެއްވި ތުހުމަތުތައް މިނިސްޓަރު ދޮގުކުރެއްވި. މިނިސްޓަރު ވިދާޅުވީ އެއްވެސް ތަހުގީގަކަށް ސީދާކޮށް ނުވަތަ ނުސީދާކޮށް ވެސް ނުފޫޒެއް ފޯރުވާފައި ނުވާނެ ކަމަށް.
ކުރީގެ އުއްތަމަފަނޑިޔާރު ދީދީ އަދި މިނިސްޓަރ އަލީ އިހުސާން | ސޯޝަލް މީޑިއާ
ކުރީގެ އުއްތަމަ ފަނޑިޔާރު ޑރ. އަހުމަދު އަބްދުﷲ ދީދީ މަޤާމުގައި ހުންނެވި ދުވަސްވަރު އަމަލުކުރީ ރަނގަޅަށް ނޫންކަމަށް ދޭހަވާ ގޮތަށް ވާހަކަ ދައްކަވައި، ހޯމް މިނިސްޓަރ އަލީ އިހުސާން ދީދީ އަށް ނުސީދާ ތުހުމަތުތަކެއް ކުރައްވައިފި އެވެ.
އަދަދު ނޫހުން އާއްމު ކުރި "އައިޝާ" ޑޮކިއުމެންޓްރީއާ ގުޅިގެން މިދިޔަ ހޯމަ ދުވަހުގެ ރޭ އަދަދު އޮފީހަށް ވަދެ ފުލުހުން ވަނީ އެތަން ބަލާ ފާސްކޮށްފަ އެވެ. އެކަމާއި ގުޅޭ ގޮތުން އެކްސްގައި ހިއްސާކުރެއްވި ޕޯސްޓެއްގައި ކުރީގެ އުއްތަމަ ފަނޑިޔާރު ވަނީ އެ ތަހުގީގަށް ނުފޫޒު ފޯރުވުމުގެ ބާރު މިނިސްޓަރަށް ލިބިފައި ނުވާ ކަމަށް ވިދާޅުވެފަ އެވެ. ދީދީ ވަނީ އެ ޑޮކިއުމަންޓްރީގެ ތަހުގީގަށް ވަޒީރުގެ ނުފޫޒު ފޯރުވާކަން އިހުސާން ސޯޝަލްމީޑިއާގައި ކުރައްވާފައިވާ ޕޯސްޓުތަކުން ހާމަވާ ކަމަށް ވިދާޅުވެފަ އެވެ. ދީދީ ވަނީ އެ ތަހުގީގު މިނިވަންކަމާއި ނަޒާހަތްތެރިކަމާ އެކު ހިންގުމަށް ފުލުހުންނަށް ފުރުސަތު ލިބޭ މިންވަރާއި މެދު ސުވާލު އުފައްދަވައި، އެ ތަހުގީގު މިނިވަންކަމާއި އެކު ކުރިއަށް ގެންދަން ޖެހޭ ކަމަށް ވިދާޅުވެފަ އެވެ.
ދީދީގެ އެ ވާހަކަތަކާއި ގުޅިގެން އިހުސާން ކުރެއްވި ޕޯސްޓެއްގައި ވިދާޅުވީ ފުލުހުންގެ ތަހުގީގަށް ނުފޫޒު ފޯރުވުމުގެ ބާރު ލިބިފައި ނުވާތީ އެ ބާރު ބޭނުން ކުރައްވާފައި ނުވާނެ ކަމަށެވެ. އަދި މިނިސްޓަރ ވަނީ އެ މަނިކުފާނު ވަޒީރުކަމުގެ މަސްއޫލިއްޔަތު އަދާކުރައްވަނީ، ދީދީ ''އުއްތަމަ ފަނޑިޔާރުކަން ކުރެއްވި ގޮތަކަށް ނޫން'' ކަމަށް ފާހަގަކުރައްވާފަ އެވެ.
މިނިސްޓަރގެ އެ ވާހަކަތަކުން އުއްތަމަ ފަނޑިޔާރުކަމުގައި ދީދީ ހުންނެވި ދުވަސްވަރު ލިބިވަޑައިގެންފައި ނެތް ބާރެއް ބޭނުންކުރެއްވުން، ނުވަތަ ނުފޫޒު ބޭނުންކޮށްގެން ކަންތައްތަކެއް ކުރައްވާފައިވާ ކަމަށް ދޭހަވެ އެވެ. ނަމަވެސް ވަޒީރު އެފަދަ ތުހުމަތެއް ކުރެއްވި ސަބަބު ތަފްސީލްކޮށް ވިދާޅުވެފަ އެއް ނުވެ އެވެ.
