އައިޝާ ޑޮކިއުމަންޓްރީގެ ތަހުގީގަށް އައިޝަތު އީޝާ ފުލުހަށް ހާޒިރުވާން އަންގައިފި
"އަދަދު" ނޫހުން ޝާއިއުކުރި "އައިޝާ" ޑޮކިއުމެންޓްރީއާ ގުޅިގެން ރައީސުލްޖުމްހޫރިއްޔާއަށް ގަޛުފުކުރި ކަމުގެ ތުހުމަތުގައި، އައިޝަތު އީޝާ އަޝްރަފް ފުލުހަށް ހާޒިރުވާން އަންގައިފި. މި މައްސަލައިގައި މީގެ ކުރިން އެ ނޫހުގެ އިސްވެރިންނާ ސުވާލުކޮށްފައިވާއިރު، ތަހުގީގަށް ހިފަހައްޓާފައިވާ ތަކެތީގެ ފާސްވޯޑް ދިނުމަށް ކޯޓުން އަމުރުކުރި ނަމަވެސް މަސްދަރު ހިމާޔަތްކުރުމުގެ ގޮތުން އެ ނޫހުން ވަނީ އެކަމަށް އިންކާރުކޮށްފައި.
ރައީސް އޮފީހާއި، ސަރުކާރުގެ ބައެއް މަޤާމުތައް ފުރާފައިވާ އައިޝަތު އީޝާ އަޝްރަފް | ފޭސްބުކް
އަދަދު ނޫހުގެ ސޯޝަލް މީޑިއާގައި ޝާއިއުކުރި "އައިޝާ ޑޮކިއުމެންޓްރީ" އާ ގުޅިގެން ފުލުހުން ހިންގާ ތަހުގީގަށް ރައީސް އޮފީހާއި، ސަރުކާރުގެ ބައެއް މަޤާމުތައް ފުރާފައިވާ އައިޝަތު އީޝާ އަޝްރަފް ހާޒިރުވާން އަންގައިފިއެވެ.
އެ މައްސަލައިގެ ތުހުމަތުގައި ސުވާލުކޮށް ބަޔާން ނެގުމަށް އޭނާ ހާޒިރުވުމަށް އަންގާފައިވަނީ 5 މެއި 2026 ވާ ބުދަ ދުވަހުގެ ރޭގަނޑު 21:00 އަށް ހުޅުމާލޭ ޕޮލިސް ސްޓޭޝަނަށެވެ.
ފުލުހުން ފޮނުވާފައިވާ ޗިޓުގައި ވާ ގޮތުން އޭނާގެ މައްޗަށް ތުހުމަތު ކުރެވެނީ 2026 މާރޗު 28 ވަނަ ދުވަހު އަދަދު އޮންލައިންގެ އެކްސް އެކައުންޓުގައި ރައީސުލްޖުމްހޫރިއްޔާ ޑރ މުޙައްމަދު މުއިއްޒަށް ގަޛުފުކޮށް، އައިޝާ ނަމުގައި ހަދާފައިވާ ޑޮކިއުމަންޓްރީގައި އޭނާގެ ބައިވެރިވުން އޮތް ކަމަށެވެ.
މި މައްސަލައިގައި ފުލުހުން މީގެ ކުރިން ވަނީ އަދަދުގެ ސީއީއޯ ހުސައިން ފިޔާޒު މޫސާގެ އިތުރުން، އެ ނޫހުގެ އެޑިޓަރު ހަސަން މުހައްމަދު (ހަސަނާ) ވެސް ސުވާލުކޮށްފައެވެ. ޤާނޫނުން ލިބިދޭ ޙައްޤުގެ ބޭނުންކޮށް ފިޔާޒުގެ އިތުރުން ހަސަނުވެސް ނިންމީ މަސްދަރު ހާމަނުކޮށް، ހަނު ހުރުމަށެވެ.
މީގެ އިތުރުން، ފުލުހުން ހިންގާ ތަހުގީގަށް، އެ ނޫހުގެ އޮފީހުން ގެންދިޔަ ލެޕްޓޮޕްތަކާއި ހާޑް ޑްރައިވްތަކުގެ ފާސްވަރޑް ފުލުހުންނަށް ދިނުމަށް ކްރިމިނަލް ކޯޓުން ވަނީ އަމުރުކޮށްފައެވެ. ނަމަވެސް މި މައްސަލައާ ގުޅުންހުރި މަސްދަރުތަކުގެ އިތުރުން، އެހެން މައްސަލަތަކާ ގުޅިގެން މައުލޫމާތު ދީފައިވާ ފަރާތްތަކަކީ ކޮބައިކަން ވެސް ޕާސްވަރޑް ދިނުމުން ހާމަވެދާނެ ކަމުގެ ބިރު އޮތުމުން އަދަދު ނޫހުން ވަނީ ޕާސްވޯޑު ހިއްސާ ނުކުރުމަށް ނިންމާފައެވެ.
