އީރާންއާ ދެކޮޅަށް އެމެރިކާާ އިން ފެށި އަސްކަރީ އޮޕަރޭޝަން ނިމިފައިވާ ކަމަށް ރޫބިއޯ ވިދާޅުވެއްޖެ

އީރާންއާ ދެކޮލަށް އެމެރިކާ އިން ކުރިއަށް ގެންދިޔަ އަސްކަރީ އޮޕަރޭޝަން، "އެޕިކް ފިއުރީ" ނިމުމަކަށް އައިސްފައިވާ ކަމަށް އެމެެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވިދާޅުވެއްޖެ އެވެ.

އެމެރިކާގެ ރިޔާސީ ގަނޑުވަރު، ވައިޓް ހައުސްގައި އަންގާރަ ދުވަހު އޮތް ނޫސްވެރިންގެ ބައްދަލުވުމުގައި ވާހަކަ ދައްކަވަމުން ރޫބިއޯ ވިދާޅުވީ، އެމެރިކާާގެ ރައީސް ޑޮނަލްޑް ޓްރަމްޕް އެ ޤައުމުގެ ކޮންގްރެސް އަށް އަންގަވާފައިވާ ފަދައިން އެ އޮޕަރޭޝަން މިހާރު ނިމިފައިވާ ކަމަށާއި،  ހަނގުރާމައިގެ އެ މަރުޙަލާ މިހާރުު ފުރިހަމަ ވެފައިވާ ކަމަށެވެ. 

އެމެރިކާާގެ ސަރުކާރުން އެ ޤައުމުގެ ކޮންްގްރެސްގެ މެމްބަރުންނަށް އެކަން އަންގާފައި ވަނީ، ދެ ޤައުމުގެ ދެ މެދުގައި ޤާއިމު ކޮށްފައިވާ ހަނގުރާމަ މެދު ކަނޑާލުމުގެ އެއްބަސްވުމާ ގުޅިގެން ހަނގުރާމަ ހުއްޓުމަކަށް އައިސްފައިވާތީ އެވެ. މީގެ ސަބަބުން، 60 ދުވަހަށް ވުރެ އިތުރަށް ހަނގުރާމަ ކުރިއަށް ގެންދާ ނަމަ، ކޮންްގްރެސްގެ ހުއްދަ ހޯދަން ޖެހޭ ޤާނޫނީ ލާޒިމު ކަމުން ސަރުކާރު ވަނީ ސަލާމަތްވެފަ އެވެ. ނަމަވެސް، އީރާން އިން އެމެރިކާާގެ އުޅަނދު ފަހަރަށް ހަމަލާ ދީފި ނަމަ، ބަދަލު ހިފާނެ ކަމުގެ އިންޒާރު ޓްރަމްޕް ވެސް ވަނީ ދެއްވައިފަ އެވެ.

މީގެ އިތުރުން ހޮރްމޫޒް ކަނޑު އޮޅިން ދަތުރު ކުރާ އުޅަނދު ފަހަރަށް އެހީތެރިވުމަށް "ޕްރޮޖެކްޓް ފްރީޑަމް"ގެ ނަމުގައި އައު ޙަރަކާތެއް ފަށާނެކަން ރައީސް ޓްރަމްޕް އޮތީ އާދީއްތަ ދުވަހު އިއުލާން ކުރައްވައިފަ އެވެ. އެކަމާ ގުޅޭ ގޮތުން ރޫބިއޯ ވިދާޅުވީ، އެއީ އިސްވެ ހަމަލާ ދިނުމުގެ އޮޕަރޭޝަނެއް ނޫން ކަމަށާއި، އެއީ ދިފާއީ މަސައްކަތެއް ކަމަށެވެ. އަދި އެމެރިކާގެ ސިޔާސަތަކީ އެމެރިކާ އަށް އިސްވެ ހަމަލާއެއް ނާންނަނީސް، ބަޑި ނުޖެހުން ކަމަށް ރޫބިއޯ ވިދާޅުވި އެވެ. 

އެމެރިކާ އާއި އިޒްރޭލް ގުޅިގެން، މިދިޔަ ފެބްރުވަރީ މަހުގެ 28 ވަނަ ދުވަހު ވަނީ އީރާންއާ ދެކޮޅަށް ހަނގުރާމަ ފަށައިފަ އެވެ. އެ ހަމަލާ ތަކުގައި އީރާންގެ އެންމެ މަތީ ވެރިޔާގެ އިތުރުން، އެ ޤައުމުގެ އަސްކަރީ އިސް އޮފިޝަލުން ވެސް ވަނީ އަވަހާރަ ކޮށްލައިފަ އެވެ. ނަމަވެސް، އެ ހަމަލާ ތަކުގައި އީރާންގެ ސަރުކާރު ވެއްޓިފައި ނުވާއިރު، އެމެރިކާ އާއި އިޒްރޭލް އިން އެންމެ ބޮޑަށް ބޭނުންވީ އީރާންގެ ސަރުކާރު ވައްޓާލުމަށެވެ. އެމެެރިކާ އާއި އިޒްރޭލްގެ ހަމަލާ ތަކަށް ރައްދު ދިނުމުގެ ގޮތުން އީރާން އިން ވެސް ވަރުގަދަ ހަމަލާ ތަކެއް ދީފައިވާއިރު، މިދިޔަ އޭޕްރީލް މަހުގެ އަށް ވަނަ ދުވަހު ވަނީ ހަނގުރާމަ މެދު ކަނޑާލުމަށް ދެ ޤައުމުން ވެސް އެއްބަސްވެފަ އެވެ. 

އިތުރަށް ރޫބިއޯ ވިދާޅުވި ގޮތުގައި، އެ ހަނގުރާމަ އިން އެމެރިކާ ބޭނުންވި ހުރިހާ މަގުސަދު ތަކެއް މިހާރު ވަނީ ހާސިލުވެފަ އެވެ. އީރާންގެ އިޤްތިޞާދަށް އިއާދަ ނުކުރެވޭ ފަދަ ބޮޑެތި ގެއްލުން ތަކެއް ލިބިފައިވާ ކަމަށް ފާހަގަ ކުރައްވައި ރޫބިއޯ ވިދާޅުވީ، އެހެން ނަމަވެސް އެމެރިކާގެ ރައީސް ޓްރަމްޕް އަދިވެސް ބޭނުންފުޅު ވަނީ މަަޝްވަރާގެ މޭޒުގެ ދަށުން އެއްބަސްވުމަކަށް އައުމަށް ކަމަށެވެ.