އެމެރިކާ އިން ހަމަލާ ދިނީ އާންމުން ދަތުރުކުރި ކުޑަ ދެ ކާގޯ ބޯޓަށް: އީރާން
އީރާނުގެ އަސްކަރީ މަސްދަރުތަކުން ހާމަކުރި ގޮތުގައި، އެމެރިކާއިން ހަމަލާދީފައިވަނީ އާންމުންގެ މުދާ އުފުލާ ދެ ބޯޓަކަށް ކަމަށާއި، މި ހަމަލާގައި އާންމުންގެ ފަސް މީހަކު ޝަހީދުވެފައިވާ ކަމަށް. އެމެރިކާގެ މި އަމަލަކީ އީރާނުގެ އަސްކަރީ ބާރަށް ބިރުން ހިންގި ޖަރީމާއެއް ކަމަށްވެސް އެ ގައުމުން ވަނީ ސިފަކޮށްފައި.
މެދުއިރުމައްޗަށް ފޮނުވާފައިވާ ޔޫއެސްއެސް ޓްރިޕޮލީ (އެލްއެޗްއޭ 7) މަނަވަރުގައި މަސައްކަތްކުރާ ފަޅުވެރިންނާ، އެމެރިކާގެ ސެންޓްރަލް ކޮމާންޑް (ސެންޓްކޮމް) ގެ ކޮމާންޑަރު އެޑްމިރަލް ބްރެޑް ކޫޕާ 2026 ވަނަ އަހަރުގެ މެއި މަހުގެ 3 ވަނަ ދުވަހު ވާހަކަދައްކަވަނީ. | ޔޫއެސް ނޭވީ
އެމެރިކާގެ ބާރުތަކުން ހަމަލާދީފައިވަނީ އޮމާންގެ އައްސޭރިފަށުގައިވާ ޚަސަބުން ފުރައިގެން އީރާނުގެ އައްސޭރިފަށަށް އާންމުންގެ މުދާ ހިފައިގެން ދަތުރުކުރި ކުދި ދެ ބޯޓަކަށް ކަމަށް އީރާނުގެ އަސްކަރީ މަސްދަރަކުން ހާމަ ކޮށްފި އެވެ.
އީރާނުގެ ދެކުނުން އޮންނަ ހޮރްމޫޒް ކަނޑުއޮޅީގައި، އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) ގެ ހަލުވި ދުވެލީގެ އުޅަނދުތަކަކަށް ހަމަލާދީފައިވާ ކަމަށް އެމެރިކާގެ އަސްކަރިއްޔާއިން ކުރާ ދައުވާތަކާ ގުޅިގެން "ތަސްނީމް" ނިއުސް އެޖެންސީއަށް މައުލޫމާތު ދެއްވަމުން، އީރާނުގެ އަސްކަރީ މަސްދަރަކުން ބުނެފައިވަނީ އެ ގައުމުގެ އުޅަނދުތަކަށް އެއްވެސް ހަމަލާއެއް އަމާޒުވެފައި ނުވާ ކަމަށެވެ.
އެމެރިކާގެ އަސްކަރިއްޔާއިން އީރާނުގެ ހަނގުރާމަމަތީ ހަލުވި ދުވެލީގެ 6 އުޅަނދަކަށް ހަމަލާދިން ކަމަށް ބުނެ ފަތުރާފައިވާ ޚަބަރުތަކާ ގުޅިގެން، އެ ސަރަހައްދުގެ މަސްދަރުތައް މެދުވެރިކޮށް އެކަން ހިނގާދިޔަ ގޮތް ތަހުގީގުކޮށްފައިވާ ކަމަށް އެ މަސްދަރުން ބުންޏެވެ.
އެމެރިކާގެ މި ހަމަލާގައި އާންމުންގެ 5 މީހަކު ޝަހީދުވެފައިވާކަން ފާހަގަކުރަމުން، މި ޖަރީމާއާ ގުޅިގެން އެމެރިކާއިން ފުރިހަމައަށް ޒިންމާ އުފުލަންޖެހޭނެ ކަމަށް އެ މަސްދަރުން ބުންޏެވެ.
އަދި ދުޝްމަނުން މިފަދަ ކަންކަން ކުރަމުން ދަނީ، އައި.އާރް.ޖީ.ސީގެ ހަލުވި ދުވެލީގެ އުޅަނދުތަކުން ހިންގާ އޮޕަރޭޝަންތަކަށް އެމެރިކާގެ އަސްކަރިއްޔާއިން އިންތިހާއަށް ބިރުގަންނާތީ ކަމަށްވެސް އެ އަސްކަރީ މަސްދަރުން ފާހަގަކުރިއެވެ.
އީރާނުގެ އަސްކަރީ މަސްދަރުން މިހެން ބުނެފައިވަނީ، ހޮރްމުޒް ކަނޑުއޮޅީގައި އީރާނުގެ "ފާސްޓް ބޯޓްސް" ނުވަތަ ހަލުވި ދުވެލީގެ އުޅަނދުތަކަކަށް އެމެރިކާއިން ހަމަލާދީފައިވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވުމާ ގުޅިގެންނެވެ.
އެމެރިކާގެ ސެންޓްރަލް ކޮމާންޑުން ބުނެފައިވާ ގޮތުގައި، އީރާނުގެ އެ ކުދި އުޅަނދުތައް ނައްތާލުމަށް އެމެރިކާއިން ވަނީ ހެލިކޮޕްޓަރު ބޭނުންކޮށްފައެވެ.
މި އޮޕަރޭޝަނަކީ ޑޮނަލްޑް ޓްރަމްޕްގެ "ޕްރޮޖެކްޓް ފްރީޑަމް" ގެ ދަށުން ހިންގި ކަމެއް ކަމަށް ރިޕޯޓްކޮށްފައިވާއިރު، އީރާނުގެ ޚާރިޖީ ވަޒީރު އައްބާސް އަރާގްޗީ ވަނީ އެއީ "ޕްރޮޖެކްޓް ޑެޑްލޮކް" ނުވަތަ މަރުތަޅު އެޅުވުމުގެ މަޝްރޫއެއްގެ ގޮތުގައި ސިފަކުރައްވާފައެވެ.
މަސްދަރު: ތަސްނީމް ނިއުސް އޭޖެންސީ
