އީރާނުން އެމެރިކާގެ މަނަވަރުތަކަށް މިސައިލް ހަމަލާދީ އިންޒާރުދީފި
5 މެއި 2026 | އަންގާރަ 05:25ހޮރްމޫޒް ކަނޑުއޮޅީގެ ކޮންޓްރޯލް ހޯދުމަށް އެމެރިކާގެ މަނަވަރުތަކުން ކުރި މަސައްކަތާ ގުޅިގެން، އީރާނުގެ އަސްކަރިއްޔާއިން ވަނީ މިސައިލާއި ޑްރޯން ބޭނުންކޮށްގެން އިންޒާރުގެ ހަމަލާތަކެއް ދީފައި. ކަނޑުއޮޅި ސަރަހައްދުގައި ހިންގާ އެމެރިކާގެ އަމަލުތަކަކީ ހަނގުރާމަ ހުއްޓާލުމުގެ އެއްބަސްވުމާ ޚިލާފު ކަމެއް ކަމަށް ބުނެ، އީރާނުގެ ހުއްދައާ ނުލައި އެއްވެސް އުޅަނދަކަށް އެ ސަރަހައްދުން ދަތުރު ނުކުރެވޭނެ ކަމުގެ އިންޒާރު އެ ގައުމުން ވަނީ ދީފައި. މި ހާދިސާއާ ގުޅިގެން މަސްރަހު ގޯސްވެފައިވާއިރު، އީރާނުން ބުނަނީ ދުޝްމަނުންގެ ކޮންމެ ހަމަލާއަކަށް ރައްދުދޭން ފުރިހަމައަށް ތައްޔާރުވެފައިވާ ކަމަށް.
2026 ވަނަ އަހަރުގެ މެއި މަހުގެ 4 ވަނަ ދުވަހު، ހޮރްމޫޒް ކަނޑުއޮޅި ކައިރިން އެމެރިކާގެ އަސްކަރީ މަނަވަރަކަށް އަމާޒުކޮށް އީރާނުގެ ކަނޑުގެ ސިފައިން މިސައިލް ހަމަލާއެއް ފޮނުވާލާ މަންޒަރު ފެންނަ ވީޑިއޯއެއްގެ ސްކްރީންޝޮޓެއް. | ސްކްރީން އިމޭޖް
ޕާޝިއަން ގަލްފުގެ މުހިންމު ކަނޑުއޮޅިއެއް ކަމަށްވާ ހޮރްމޫޒް ކަނޑުއޮޅީގެ ކޮންޓްރޯލް އީރާނުގެ އަތްދަށުން އަތުލުމަށް އެމެރިކާގެ މަނަވަރުތަކަކުން ކުރި މަސައްކަތާ ގުޅިގެން، އެ މަނަވަރުތަކަށް އިންޒާރު ދިނުމުގެ ގޮތުން އީރާނުގެ ކަނޑުގެ ސިފައިން މިސައިލާއި ޑްރޯން ހަމަލާތަކެއް ފޮނުވާލައިފިއެވެ.
އީރާނުގެ ކަނޑުގެ ސިފައިން ހޯމަ ދުވަހު ނެރުނު ބަޔާނެއްގައި ބުނެފައިވަނީ، ހޮރްމޫޒް ކަނޑުއޮޅިއާ ކައިރިނުވުމަށް ދިން އިންޒާރުތަކަށް އެމެރިކާގެ މަނަވަރުތަކުން އިޖާބަ ނުދިނުމުން، އެ މަނަވަރުތަކާ ގާތަށް ކްރޫޒް މިސައިލާއި، ހަނގުރާމަމަތީ ޑްރޯން އަދި ރޮކެޓް ފޮނުވާލަން މަޖުބޫރުވި ކަމަށެވެ.
އެ ބަޔާނުގައިވާ ގޮތުން، އެމެރިކާގެ މަނަވަރުތަކުން ވަނީ އެ ތަކެތީގެ ޓްރާންސްޕޮންޑަރުތައް ނިއްވާލައި، ރާޑަރުތައް އަލުން ހުޅުވުމުގެ ކުރިން "ޑާކް މޯޑް" ގައި ކަނޑުއޮޅިއާ ގާތްވާން މަސައްކަތް ކޮށްފައެވެ.
އީރާނުގެ އަސްކަރިއްޔާއިން ބުނި ގޮތުގައި، ހޮރްމޫޒް ކަނޑުއޮޅިއާ ގާތްވާން ކުރާ ކޮންމެ މަސައްކަތަކީ އޭޕްރީލް މަހުގެ ކުރީކޮޅު އިއުލާންކުރި ހަނގުރާމަ ހުއްޓާލުމުގެ އެއްބަސްވުމާ ޚިލާފު ކަމެކެވެ. އެ އެއްބަސްވުމަކީ އީރާނާ ދެކޮޅަށް އެމެރިކާއާއި އިޒްރޭލުން ދެމުންދިޔަ ހަމަލާތައް ހުއްޓާލުމަށް އެކުލަވާލި އެއްބަސްވުމެކެވެ.
"މި މަރުހަލާގައި، އެމެރިކާއާއި ޒަޔަނިސްޓުންގެ މަނަވަރުތަކުން ފުރަތަމަ ދިން އިންޒާރަށް ފަރުވާކުޑަކުރުމުން، އިސްލާމީ ޖުމްހޫރިއްޔާ އީރާންގެ ކަނޑުގެ ސިފައިން ވަނީ ހަމަލާދިން އުޅަނދުތަކާ ގާތަށް ކްރޫޒް މިސައިލާއި، ރޮކެޓް އަދި ހަނގުރާމަމަތީ ޑްރޯން ބޭނުންކޮށްގެން އިންޒާރުގެ ހަމަލާތަކެއް ދީފައި،" އީރާނުގެ އަސްކަރިއްޔާގެ ބަޔާނުގައިވެއެވެ.
މީގެ އިތުރުން، މިފަދަ އަމަލުތަކުގެ ޒިންމާއާއި އޭގެ ނުރައްކާތެރި ނަތީޖާތަކުގެ ފުރިހަމަ މަސްއޫލިއްޔަތު އުފުލަންޖެހޭނީ ދުޝްމަނުން ކަމަށްވެސް އެ ބަޔާނުގައި ބުނެފައިވެއެވެ.
މި ހާދިސާއާ ގުޅިގެން ދެ ފަރާތުގެ މެދުގައި ސީދާ ކުރިމަތިލުމެއް ހިނގި ކަމުގެ ރިޕޯޓެއް އަދި ލިބިފައެއް ނުވެއެވެ.
އެމެރިކާގެ މަނަވަރުތަކުން ހޮރްމޫޒް ކަނޑުއޮޅިން ދަތުރުކުރަން މަސައްކަތް މިކުރީ، އެ ކަނޑުއޮޅީގެ މައްޗަށް އީރާނުން ބާއްވާ ކޮންޓްރޯލް ނައްތާލައި، ވިޔަފާރި އުޅަނދުތަކަށް މަގު ހުޅުވައިދިނުމަށް އަސްކަރީ އޮޕަރޭޝަނެއް ފެށުމަށް އެމެރިކާގެ ރައީސް ޑޮނަލްޑް ޓްރަމްޕް އަމުރުކުރެއްވިތާ މަދު ގަޑިއިރުތަކެއްގެ ތެރޭގައެވެ. އެމެރިކާއާއި އިޒްރޭލުން އީރާނާ ދެކޮޅަށް ހިންގި ހަރަކާތްތަކާ ގުޅިގެން، ވިޔަފާރި އުޅަނދުތައް އެ ސަރަހައްދުގެ ކަނޑުގެ ސަރަހައްދުގައި ތާށިވެފައި އޮންނަތާ މިހާރު ދެ މަހަށްވުރެ ގިނަ ދުވަސް ވެއްޖެއެވެ.
އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރު.ޖީ.ސީ) އިން ވެސް ވަނީ، އީރާނުގެ ކަމާބެހޭ ފަރާތްތަކުގެ ހުއްދައެއް ނެތި އެމެރިކާގެ އަސްކަރީ ނުވަތަ ވިޔަފާރި އުޅަނދެއް ހޮރްމޫޒް ކަނޑުއޮޅިން ދަތުރުކުރުމާ ދެކޮޅަށް އެ ދުވަހުގެ ކުރީކޮޅު އިންޒާރު ދީފައެވެ.
އީރާނުގެ ތަސްނީމް ނިއުސް އެޖެންސީން އިތުބާރު ހުރި މަސްދަރަކާ ހަވާލާދީ ހޯމަ ދުވަހު ރިޕޯޓްކޮށްފައިވާ ގޮތުގައި، ސްޓްރެޓީޖިކް ގޮތުން މުހިންމު މި ކަނޑުއޮޅީގައި އެމެރިކާއިން ހިންގި "ދުޝްމަންކަމުގެ އަމަލާ" ގުޅިގެން، ކުރިމަތިވެދާނެ ކޮންމެ ހާލަތަކަށްވެސް އީރާން އޮތީ ފުރިހަމައަށް ތައްޔާރުވެގެންނެވެ.
އެ މަސްދަރުން ފާހަގަކުރި ގޮތުގައި، ރައީސް ޓްރަމްޕް ނުވަތަ އެ ސަރަހައްދުގައި ތިބި އެމެރިކާގެ އަސްކަރީ ބާރުތަކުން ދައްކާ ބިރުތަކަށް ތެހެރާނުން ދޫނުދޭނެކަން ވޮޝިންޓަނަށް ރަނގަޅަށް އެނގޭނެއެވެ.
"ކޮންމެ ހާލަތަކަށްވެސް އިސްލާމީ ޖުމްހޫރިއްޔާ އޮތީ ފުރިހަމައަށް ތައްޔާރުވެފައި. ޓްރަމްޕާއި އެމެރިކާގެ ސިފައިންނަށް ބިރުދެއްކުމުގެ ފުރުސަތު އީރާނުން ނުދޭނެކަން އެމެރިކާ މީހުންނަށް އެނގޭނެ،" އެ މަސްދަރުން ބުންޏެވެ.
އަދި 40 ދުވަހުގެ ހަނގުރާމައިގައި އެމެރިކާގެ ސިފައިން ހުއްޓުވި ފަދައިން، މިފަހަރުވެސް އެމެރިކާގެ ސިފައިންނަށް ކަނޑުއޮޅި ހުރަސްކުރުމުގެ ފުރުސަތު އީރާނުގެ ހަތިޔާރު އެޅި ބާރުތަކުން ނުދޭނެ ކަމަށްވެސް އެ މަސްދަރުން އިތުރަށް ބުންޏެވެ.
އީރާނުގެ އަސްކަރިއްޔާގެ ސީދާ ހުއްދައެއް ނެތި، ކަނޑުއޮޅީގެ ތެރޭގައި އެއްވެސް ހަރަކާތެއް ހިންގުމުގެ ފުރުސަތު ނުދޭނެ ކަމަށްވެސް އެ ފަރާތުން ފާހަގަކުރިއެވެ.
ފެބްރުއަރީ މަހުގެ ފަހުކޮޅު އެމެރިކާއާއި އިޒްރޭލުން ހިންގަން ފެށި ހަރަކާތްތަކާ ގުޅިގެން، އީރާނުން ވަނީ ހޮރްމޫޒް ކަނޑުއޮޅީގެ ކޮންޓްރޯލް ނަގާފައެވެ. އޭގެ ފަހުން އެ ކަނޑުއޮޅިން ދަތުރުކުރުމުގެ ހުއްދަ ދެނީ ދުޝްމަން ނޫން ކަމަށް ބެލެވޭ އަދި އީރާނުގެ އަސްކަރިއްޔާއިން އިއުލާންކޮށްފައިވާ ސަލާމަތީ އުސޫލުތަކަށް ތަބާވާ އުޅަނދުތަކަށް އެކަންޏެވެ.
މި ކޮންޓްރޯލްގެ ސަބަބުން ގާތްގަނޑަކަށް 3,000 އުޅަނދާއި 20,000 އެއްހާ ފަޅުވެރިން ކަނޑުއޮޅީގެ ދެފަރާތުގައި ތާށިވެފައިވާއިރު، މީގެ ސަބަބުން ބައިނަލްއަގުވާމީ ބާޒާރުގައި ތެލުގެ އަގު ވަނީ ވަރަށް ބޮޑަށް އުފުލިފައެވެ.
އެމެރިކާއާއި އިޒްރޭލުން އީރާނާއި އީރާނުގެ ބައިވެރިންނާ ދެކޮޅަށް ހިންގާ ހަރަކާތްތައް ދާއިމީކޮށް ހުއްޓާލައި، އީރާނުގެ ކަނޑުގެ ވިޔަފާރިއަށް އަޅާފައިވާ ހުރަސްތައް ނައްތާލައިފިނަމަ، ހޮރްމޫޒް ކަނޑުއޮޅި އަލުން ހުޅުވާލަން ތައްޔާރަށް އޮތްކަމުގެ އިޝާރާތެއް އީރާނުން ވަނީ ދީފައެވެ.
