ޕާކިސްތާން އާއި އެހެން ޤައުމު ތަކުގެ އެދުމުގެ މަތިން، ހޮރްމޫޒް ކަނޑުއޮޅީގެ އޮޕަރޭޝަން އެމެރިކާ އިން މެދު ކަނޑާލައިފި

އެމެރިކާ އާއި އީރާންއާ ދެމެދު ކުރިއަށް ގެންދަމުން އަންނަ މަޝްވަރާ ތަކުގައި ބޮޑެތި ކުރިއެރުން ތަކެއް ލިބެމުންދާތީވެ، ހޮރްމޫޒް ކަނޑު އޮޅިން ދަތުރު ކުރާ އުޅަނދު ފަހަރަށް އެހީތެރިކަން ފޯރުކޮށްދިނުމަށް އެމެރިކާގެ ސިފައިން ކުރިއަށް ގެންދިޔަ "ޕްރޮޖެކްޓް ފްރީޑަމް" މެދު ކަނޑާލަން ނިންމާފައިވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް އިއުލާން ކުރައްވައިފި އެވެ. 

ޓްރަމްޕްގެ އަމުރުފުޅަށް އެމެރިކާގެ އަސްކަރިއްޔާ އިން ފެށި މި އޮޕަރޭޝަން މެދު ކަނޑާލަން ޓްރަމްޕް ނިންމެވީ، ޕާކިސްތާންގެ އިތުރުން، އެހެން ޤައުމު ތަކުގެ ވެސް އެދުމުގެ މަތީންނެވެ. ޕާކިސްތާން އަކީ، އެމެރިކާ އާއި އީރާންއާ ދެމެދު ސުލްޙަ ޤާއިމު ކުރުމުގައި މެދުވެރިއެއްގެ ދައުރު އަދާ ކުރަމުން އަންނަ ޤައުމެވެ. 

އީރާންއާ ދެކޮޅަށް އެމެެރިކާ އިން ހިންގަމުންދާ އަސްކަރީ އޮޕަރޭޝަންގައި ބޮޑެތި ކާމިޔާބީ ތަކެއް ހޯދިފައިވާ ކަމަށް ފާހަގަ ކުރައްވައި ޓްރަމްޕް ވިދާޅުވީ، އީރާންގެ މަންދޫބުންނާ އެކު ފަހުގެ އެއްބަސްވުމަކަށް އައުމަށް ކުރެވޭ މަސައްކަތުގައި މިހާރު ބޮޑެތި ކުރިއެރުން ތަކެއް ލިބިފައިވާ ކަމަށެވެ. 

މި އޮޕަރޭޝަން ވަގުތީ ގޮތުން މެދު ކަނޑާލި ނަމަވެސް، އީރާންއާ ދެކޮޅަށް އެމެރިކާ އިން އަޅާފައިވާ ކަނޑުގެ ހުރަސްތައް، ނުވަތަ ނޭވަލް ބްލޮކޭޑް އެގޮތުގައި ދެމި އޮންނާނެ ކަމަށް ޓްރަމްޕް ވިދާޅުވި އެވެ. އޭނާ ވިދާޅުވި ގޮތުގައި، "ޕްރޮޖެކްޓް ފްރީޑަމް" މަޑު ޖައްސާލަން ނިންމީ އީރާން އާއެކު ވެވޭ އެއްބަސްވުމުގައި ސޮއިކޮސް، އެކަން ނިންމާލެވޭތޯ ބެލުމަށް ދެވޭ ފުރުސަތެއްގެ ގޮތުންނެވެ. 

ހޮރްމޫޒް ކަނޑު އޮޅިން ދަތުރު ކުރާ އުޅަނދު ފަހަރަށް ހިމާޔަތް ދިނުމުގެ މި މަޝްރޫއު މެދު ކަނޑާލުމަށް އެމެރިކާ އިން ނިންމި ނިންމުމާ އެކު، ސަރަހައްދީ މަސްރަހަށް ބަދަލު ތަކެއް އަންނާނެ ކަމަށް ބެލެވެ އެވެ. ނަމަވެސް، ޓްރަމްޕް ތަކުރާރުކޮށް ވިދާޅުވީ އެމެރިކާގެ އަސްކަރީ ބާރުވެރިކަން އެ ސަރަހައްދުގައި ދެމި އޮންނާނެ ކަމަށާއި، ބްލޮކޭޑުގެ ކަންކަން ފުރިހަމަ ބާރާ އެކު ކުރިއަށް ދާނެ ކަމަށެވެ. 

މި ނިންމެވުމާ ގުޅޭ ގޮތުން އެމެރިކާގެ ރިޔާސީ ގަނޑުވަރު، ވައިޓް ހައުސް އިން ބުނެފައި ވަނީ މިއީ ޑިޕްލޮމެޓިކް މަގުން މައްސަލަ ހައްލު ކުރުމަށް ލިބުނު ފުރުސަތެއް ކަމަށެވެ. އަދި އީރާން އާއެކު އެކުލަވާލެވޭ ފަހުގެ އެއްބަސްވުމަކީ ދާއިމީ ޙައްލަކަށް ވާނެ ކަމަށް އުންމީދު ކުރާ ކަމަށް ވެސް އެމެރިކާ ސަރުކާރުން ވަނީ ހާމަ ކޮށްފަ އެވެ.