އިޒްރޭލްއާ މެދު ގެންގުޅޭ ވަންހަނާ ނިއުކްލިއާ ސިޔާސަތު ހާމަ ކުރުމަށް، ޑިމޮކްރެޓިކް ޕާޓީގެ 30 މެމްބަރަކު ގޮވާލައްވައިފި

އިޒްރޭލްގެ ނިއުކްލިއާ ހަތިޔާރުގެ ޤާބިލުކަމާ ގުޅޭ ގޮތުން ގެންގުޅޭ ވަންހަނާ ސިޔާސަތު ނިމުމަކަށް ގެނެސް، އެކަމުގައި ދެ ފުށް ފެންނަ ސިޔާސަތެއް ޤާއިމު ކުރުމަށް އެމެރިކާގެ ޤާނޫނު ހަދާ މަޖިލީހުގެ ތިރިގެ، ހައުސް އޮފް ރެޕްރެޒެންޓެޓިވްސްގެ ޑިމޮކްރެޓިކް ޕާޓީ އަށް ނިސްބަތްވާ 30 މެމްބަރަކު ގޮވާލައިފި އެވެ. 

އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ އަށް ފޮނުއްވި ގުޅިފައިވާ ބަޔާނެއްގައި އެ މެމްބަރުން ވިދާޅުވީ، އެމެރިކާާ އިން މިހާރު ހަނގުރާމައިގައި ބައިވެރިވަމުން ދަނީ ނިއުކްލިއާ ހަތިޔާރު ހުރި ކަމަށް ބެލެވޭ ޤައުމަކާ އެކު ކަމަށެވެ. ނަމަވެސް، އެއީ އެމެރިކާގެ ސަރުކާރުން އެކަން ރަސްމީކޮށް ޤަބޫލު ކުރަން ދެކޮޅު ހަދާ ޤައުމެއް ކަމަށް ވެސް ފާހަގަ ކޮށްފައިވެ އެވެ. 

އިޒްރޭލްގެ ނިއުކްލިއާ ޕްރޮގްރާމްއާ މެދު ގެންގުޅޭ ގޮތް ނޭނގޭ ސިޔާސަތުގެ ސަބަބުން، މެދު އިރުމަތީގައި ނިއުކްލިއާ ހަތިޔާރު ފެތުރުން ހުއްޓުވުމަށް ކުރާ މަސައްކަތް ތަކަށް ހުރަސް އެޅޭ ކަމަށް ވެސް އެ ބަޔާނުގައި ފާހަގަ ކޮށްފައިވެ އެވެ. 

މެމްބަރުންގެ ބަޔާނުގައި ބަޔާން ކޮށްފައިވާ ގޮތުގައި، މެދު އިރުމަތީގެ ނިއުކްލިއާ މަސްރަހާއި، މިހާރު ހިނގަމުންދާ ހަމަ ނުޖެހުން ތަކުގެ ތެރެއިން ކަންކަން ގޯސްވެގެން ދިޔުމުގެ ފުރުސަތު އޮތް މިންވަރާއި، އެފަދަ ޙާލަތެއްގައި ސަރުކާރުން ގެންގުޅޭ ޕްލޭން ތަކުގެ ފުރިހަމަ މައުލޫމާތު އެނގުމަކީ ޤާނޫނު އަސާސީ އިން ކޮންގްރެސް އަށް މަތިކޮށްފައިވާ ޒިންމާ އެކެވެ. އަދި އީރާން އިން ނިއުކްލިއާ ޕްރޮގްރާމެއް ކުރިއަށް ގެންދަން ނިންމި ނިންމުމަކީ، އެކަހެރި ނިންމުމެއް ނޫން ކަމަށާއި، އެއީ ސަރަހައްދީ ޤައުމު ތަކުގެ ޤާބިލުކަން ހުރި މިންވަރަށް ބަލައި ނިންމާފައިވާ ނިންމުމެއް ކަމަަށް ވެސް މެމްބަރުން ވިދާޅުވި އެވެ. 

މީގެ އިތުރުން ނިއުކްލިއާ ހަތިޔާރު އުފެއްދުމަށް، ނުވަތަ ގެންގުޅުމަށް މަސައްކަތް ކުރާ އެހެން ޤައުމުތަކާ މެދު އެމެރިކާ އިން ގެންގުޅޭ ދެ ފުށް ފެންނަ، ހަމަހަމަ އުސޫލުތައް އިޒްރޭލްއާ މެދު ވެސް ގެންގުޅުމަށް އެ މެމްބަރުން ވަނީ ސަރުކާރަށް ގޮވާލައްވައިފަ އެވެ. 

އިޒްރޭލް އަކީ ނިއުކްލިއާ ހަތިޔާރު ހުރި ޤައުމެއް ކަމަށް ބައިނަލްއަޤުވާމީ މުޖުތަމައުން ބޮޑަށް ޤަބޫލު ކުރި ނަމަވެސް، އިޒްރޭލް އިން އަބަދު ވެސް އަންނަނީ އެކަން ދޮގު ކުރަމުންނެވެ. އަދި މިހާތަނަށް އެކަމުގައި ދެ ފުށް ފެންނަ ސިޔާސަތެއް ހާމަ ކުރުމަށް ބައިނަލްއަޤުވާމީ ފަރާތް ތަކުން އިޒްރޭލް އަށް ކުރާ ފިއްތުންތައް ވަނީ ވަރަށް ބޮޑަށް ކުޑަވެފަ އެވެ.