ވައިޓް ހައުސް ކައިރީގައި އަނެއްކާ ވެސް ބަޑީގެ ހަމަލާ ތަކެއް

އެމެރިކާގެ ރިޔާސީ ގަނޑުވަރު، ވައިޓް ހައުސް ކައިރީގައި އަނެއްކާ ވެސް ބަޑީގެ ހަމަލާ ތަކެއް ދީފައިވާ ކަމަށާއި، އެ ހަމަލާ ދޭން މަސައްކަތް ކުރި މީހާ މިހާރު ހައްޔަރު ކޮށްފައިވާ ކަމަށް އެމެރިކާގެ ސީކްރެޓް ސާވިސް އިން ބުނެފި އެވެ. 

ސީކްރެޓް ސާވިސް އިން ބުނެފައި ވަނީ، ހަމަލާ ދިން މީހާ ހަމަލާ ދިނުމަށް ފަހު ދުވެ ފިލަން މަސައްކަތް ކުރި ކަމަށާއި، އެ ވަގުތު އޭނާ އަތުލައި ގަތުމަށްޓަކައި ސީކްރެޓް ސާވިސް އިން ވެސް އޭނާ އަށް އަމާޒުކޮށް ބަޑި ޖަހަން ޖެހުނު ކަމަށެވެ. 

ވައިޓް ހައުސް ކައިރީގައި ހިނގި މި ހާދިސާގެ ސަބަބުން، ކުޑަ ވަގުތު ކޮޅަކަށް ވައިޓް ހައުސް ލޮކްޑައުން ކޮށްފައި ވެސް ބަހައްޓަން ޖެހުނެވެ. މި ހާދިސާ ހިނގާފައިވާއިރު، މިދިޔަ މަހުގެ ފަހު ކޮޅު އެމެރިކާާގެ ރައީސް ޑޮނަލްޑް ޓްރަމްޕް ބައިވެރިވެ ވަޑައިގެންނެވީ ރަސްމީ އިވެންޓެއްގެ ތެރެއިން ވެސް މީހަކު ވަނީ ބަޑީގެ ހަމަލާ ތަކެއް ދީފަ އެވެ. 

ސީކްރެޓް ސާވިސްގެ ޑެޕިއުޓީ ޑިރެކްޓަރު މެތިއު ކުއިން ނޫސްވެރިންނަށް މައުލޫމާތު ދެއްވަމުން ވިދާޅުވީ، ވައިޓް ހައުސް ކޮމްޕްލެކްސްގެ ބޭރުގެ ސަރަހައްދުގައި ޕެޓްރޯލް ކުރަމުން ދިޔަ އެޖެންޓުންނަށް، އެ މީހާ ދެނެގަނެވުނު ކަމަށެވެ. އަދި އޭނާގެ އަތުގައި ހަތިޔާރު ހުރި ކަމަށް ދެނެގަނެވުމާ އެކު، އޭނާ ހުއްޓުވަން މަސައްކަތް ކުރި ކަމަށް ވިދާޅުވި އެވެ. 

މީގެ އިތުރުން ޑެޕިއުޓީ ޑިރެކްޓަރު ވިދާޅުވީ ސީކްރެޓް ސާވިސްގެ އެޖެންޓުން އޭނާ ގާތަށް ދިޔުމުން، އޭނާ މަސައްކަތް ކުރީ ދުވެ ފިލަން ކަމަށާއި، އެ ވަގުތު އޭނާ ބަޑިން ހަމަލާ ދޭން މަސައްކަތް ކުރި ކަމަށެވެ. އޭގެ ފަހުން ސީކްރެޓް ސާވިސްގެ އެޖެންޓުން ވެސް އޭނާ އަށް އަމާޒުކޮށް ބަޑިން ހަމަލާ ދިންއިރު، އޭނާ ހައްޔަރު ކުރުމަށް ފަހު ވަނީ ހޮސްޕިޓަލް އަށް ގެންގޮސްފަ އެވެ. 

އެ ހަމަލާތައް ދިނުމުގެ ކުޑަ ވަގުތު ކޮޅެއްގެ ކުރިން، އެމެރިކާގެ ނައިބު ރައީސް ޖޭޑީ ވޭންސްގެ ރަސްމީ މޮޓޯކޭޑު އެ ސަަރަހައްދުން ވަނީ ދަތުރު ކޮށްފަ އެވެ. ނަމަވެސް، ހަމަލާ ދިން މީހާ ނައިބު ރައީސްގެ މޮޓޯކޭޑާ ގާތަށް ދިޔުމުގެ، ނުވަތަ އެ މޮޓޯކޭޑަށް ހަމަލާ ދިނުމުގެ ނިޔަތެއް ގެންގުޅުނު ކަމަށް ފާހަގަވާން ނެތް ކަމަށް ވެސް ޑެޕިއުޓީ ޑިރެކްޓަރު ހާމަ ކުރެއްވި އެވެ. 

ވައިޓް ހައުސްގެ ކައިރީގައި މިފަހަރު ވެސް ހަމަލާ ތަކެއް ދީފައިވާއިރު، އެ ވަގުތު އެމެރިކާގެ ރައީސް ޓްރަމްޕް ވެސް ވައިޓް ހައުސްގައި ހުންނެވި އެވެ. މިފަހަރުގެ ހަމަލާ އަމާޒު ކޮށްފައި ވަނީ އެމެރިކާގެ ރައީސް ޓްރަމްޕް އަށް ތޯ ސުވާލު ކުރުމުން ޑެޕިއުޓީ ޑިރެކްޓަރު ވިދާޅުވީ، މިއީ ރައީސް އަށް އަމާޒު ކުރި ހަމަލާއެއް ކަމަށް ބުނަން ނޭނގޭ ކަމަށެވެ. ނަމަވެސް، ކުރިއަށް އޮތް ތަނުގައި އެކަން ބަލާނެ ކަމަށާއި، އަދި އެކަން ދެނެގަންނާނެ ކަމަށް ވެސް އޭނާ ވަނީ ވިދާޅުވެފަ އެވެ. 

ހަމަލާގައި ހައްޔަރު ކުރި މީހާގެ އަތުން ހަތިޔާރު އަތުލާފައިވާ ކަމަށް ހާމަ ކޮށްފައި ވީ ނަމަވެސް، އޭނާގެ އަތުގައި އޮތީ ކޮން ކަހަލަ ހަތިޔާރެއް ކަމެއް ހާމަކޮށްފައި ނުވެ އެވެ.