ޔޫއޭއީގެ ފުޖައިރާގެ ތެޔޮ ރައްކާކުރާ މަރުކަޒުތަކުގައި ހިނގި އަލިފާނުގެ ހާދިސާ އަކީ އެމެރިކާގެ ނުރައްކާތެރި އަމަލުތަކުގެ ނަތީޖާ: އީރާން

ޔުނައިޓެޑް އެރަބް އެމިރޭޓްސް (ޔޫއޭއީ) ގެ ފުޖައިރާ ބަނދަރުގައި ހުންނަ ތެޔޮ ރައްކާކުރާ މަރުކަޒުތަކެއްގައި ހޯމަ ދުވަހު ހިނގި ބޮޑު އަލިފާނުގެ ހާދިސާއަކީ، ހޮރްމޫޒް ކަނޑުއޮޅީގައި އެމެރިކާއިން ހިންގާ ނުރައްކާތެރި އަސްކަރީ ހަރަކާތްތަކުގެ ސީދާ ނަތީޖާއެއް ކަމަށް ރިޕޯޓްތަކުން ބުނެފިއެވެ.

އިސްލާމިކް ރިޕަބްލިކް އޮފް އީރާން ބްރޯޑްކާސްޓިންގް (އައިއާރުއައިބީ) އިން އަސްކަރިއްޔާގެ އިސް މަސްދަރަކާ ހަވާލާދީ ބުނެފައިވަނީ، ފުޖައިރާގެ ތެޔޮ ރައްކާކުރާ މަރުކަޒުތަކަށް ހަމަލާދިނުމުގެ އެއްވެސް ރޭވުމެއް އީރާނުގެ ހަތިޔާރު އެޅި ސިފައިން ކުރިން ރާވާފައި ނުވާނެ ކަމަށެވެ.

ފުޖައިރާގެ ކަމާބެހޭ އިދާރާތަކުން ހޯމަ ދުވަހު ބުނެފައިވަނީ، ފުޖައިރާ އޮއިލް އިންޑަސްޓްރީ ޒޯނުގައި އަލިފާނުގެ ހާދިސާއެއް ހިނގާފައިވާ ކަމަށާއި، މިއީ އީރާނުން ދިން ޑްރޯން ހަމަލާއެއް ކަމަށް ތުހުމަތުކުރާ ކަމަށެވެ.

"މި ހާދިސާ ހިނގަން މެދުވެރިވީ، ހޮރްމޫޒް ކަނޑުއޮޅީގެ މަނާ ސަރަހައްދުތަކުން ގަވާއިދާ ޚިލާފަށް އުޅަނދުފަހަރު ދަތުރުކުރާނެ މަގެއް ހެދުމަށް އެމެރިކާގެ އަސްކަރިއްޔާއިން ހިންގި ނުރައްކާތެރި އަމަލުތަކުގެ ސަބަބުން،" މަސްދަރުން ހާމަކުރިއެވެ.

އެ މަސްދަރުން އިތުރަށް ބުނީ، މި ހާދިސާގެ ޒިންމާ އެމެރިކާގެ އަސްކަރިއްޔާއިން އުފުލަންޖެހޭނެ ކަމަށާއި، ސަރަހައްދީ ހަމަޖެހުން ނުރައްކަލުގެ ތެރެއަށް ވައްޓާލާތީ ވޮޝިންޓަނަށް ވަރަށް ބޮޑަށް ފާޑުކިޔާފައެވެ.

ސަރަހައްދީ މަސްރަހު ނުތަނަވަސްކުރުވާ އެމެރިކާގެ ޚާރިޖީ ސިޔާސަތަށް ވަރަށް ބޮޑަށް ފާޑުކިޔަމުން، އެމެރިކާގެ އޮފިޝަލުން އެ ގައުމުގެ ސިޔާސަތުތައް ބަދަލުކުރުމަށް އެ މަސްދަރުން ވަނީ ގޮވާލާފައެވެ.

"ދުނިޔޭގެ ގައުމުތަކުގެ އިގްތިސާދާ ގުޅިފައިވާ މި މުހިންމު ސަރަހައްދުގައި ހިންގާ އަސްކަރީ ހަރަކާތްތައް އެމެރިކާގެ ސިޔާސީވެރިން ހުއްޓާލަންޖެހޭ. އަދި ޑިޕްލޮމެޓިކް މަރުހަލާތަކުގައި ބާރުގެ ބޭނުންކުރުމުގެ ހުތުރު ސިފަވެސް ދޫކޮށްލަންޖެހޭ،" އޭނާ ބުންޏެވެ.

ޔޫއޭއީގެ ހަކަތައިގެ މުހިންމު މަރުކަޒެއް ކަމަށްވާ ފުޖައިރާ ބަނދަރުގައި މި ބޮޑު އަލިފާނުގެ ހާދިސާ ހިނގާފައިވަނީ، ހޮރްމޫޒް ކަނޑުއޮޅީގެ މައްޗަށް އީރާނުގެ ކޮންޓްރޯލް ނައްތާލައި، ވިޔަފާރި އުޅަނދުފަހަރަށް ދަތުރުކުރެވޭނެ މަގު ފަހިކުރުމަށް އެމެރިކާގެ އަސްކަރިއްޔާއަށް އަމުރުކުރެއްވިކަން ރައީސް ޑޮނަލްޑް ޓްރަމްޕް އިއުލާނު ކުރެއްވި ފަހުންނެވެ.

މީގެ ރައްދުގައި އީރާނުގެ ރިވޮލިއުޝަނަރީ ގާޑްސް (އައިއާރުޖީސީ) އިން ވަނީ، އީރާނުގެ ކަމާބެހޭ ފަރާތްތަކުގެ ހުއްދައެއް ނެތި އެމެރިކާގެ އަސްކަރީ ނުވަތަ ވިޔަފާރި އުޅަނދެއް ހޮރްމޫޒް ކަނޑުއޮޅިން ދަތުރުކުރަން މަސައްކަތްކޮށްފިނަމަ، ވަގުތުން ވަރުގަދަ ފިޔަވަޅު އަޅާނެ ކަމުގެ އިންޒާރު ދީފައެވެ.

ފެބްރުއަރީ މަހުގެ ފަހުކޮޅު އެމެރިކާ އާއި އިޒްރޭލުން ފެށި އުދުވާނާ ގުޅިގެން، އީރާނުން ދަނީ އެ ކަނޑުއޮޅި ކޮންޓްރޯލް ކުރަމުންނެވެ. އެ ސަރަހައްދުން ދަތުރުކުރުމުގެ ހުއްދަ ދެނީ ހަމައެކަނި ދުޝްމަނުންގެ ގޮތުގައި ނުބެލެވޭ އުޅަނދުފަހަރަށާއި، އީރާނުގެ އަސްކަރިއްޔާއިން ކަނޑައަޅާފައިވާ ސަލާމަތީ އުސޫލުތަކަށް ތަބާވާ އުޅަނދުފަހަރަށެވެ.

ހޯމަ ދުވަހުގެ ކުރީކޮޅު، ހޮރްމޫޒް ކަނޑުއޮޅީގެ ކޮންޓްރޯލާ މެދު ގޮންޖަހައި އެ ސަރަހައްދަށް ކައިރިވި އެމެރިކާގެ މަނަވަރުތަކަށް އިންޒާރު ދިނުމުގެ ގޮތުން އީރާނުގެ ނޭވީން ވަނީ މިސައިލާއި ޑްރޯން ބޭނުންކޮށްފައެވެ.

އީރާނުގެ ނޭވީން ބުނި ގޮތުގައި، ކަނޑުއޮޅިއާ ކައިރިނުވުމަށް ދިން އިންޒާރުތަކަށް އެމެރިކާގެ މަނަވަރުތަކުން އިޖާބަ ނުދިނުމުން، އެ އުޅަނދުތަކާ ކައިރިއަށް ކްރޫޒް މިސައިލާއި، ހަނގުރާމަވެރި ޑްރޯން އަދި ރޮކެޓް ފޮނުވަން މަޖުބޫރުވީ ކަމަށެވެ.