އެމެރިކާ އިން ހަދަނީ ދޮގު، ހޮރްމޫޒް ކަނޑު އޮޅިން އެއްވެސް އުޅަނދެއް ދަތުރު ކޮށްފައި ނުވޭ: އީރާން

އެމެރިކާ އިން ހަދަމުން ދަނީ ކަނޑައެޅިގެން ދޮގު ކަމަށާއި، މިހާތަނަށް ހޮރްމޫޒް ކަނޑު އޮޅިން އެއްވެސް އުޅަނދެއް ދަތުރު ކޮށްފައި ނުވާ ކަމަށް އީރާން އިން ބުނެފި އެވެ. 

އީރާންގެ ތަސްނީމް ނިއުސް އެޖެންސީ އިން ހާމަ ކުރި ބަޔާނެއްގައި އީރާންގެ އިސްލާމިކް ރިވޮލިއުޝަނަރީ ގާޑް ކޯޕްސް އިން ބުނީ، ފާއިތުވި މަދު ގަޑިއިރު ތަކުގެ ތެރޭގައި ވިޔަފާރީގެ އެއްވެސް ބޯޓެއް ނުވަތަ ތެޔޮ ޓޭންކަރެއް ހޮރްމޫޒް ކަނޑު އޮޅިން ދަތުރު ކޮށްފައި ނުވާ ކަމަށެވެ. 

އެ ބަޔާނުގައި ބުނެފައި ވަނީ، އެމެރިކާގެ ވެރިންގެ ފަރާތުން ކުރާ ދައުވާ ތަކަކީ އަދި ފަތުރާ ވާހަކަ ތަކަކީ އެއްވެސް އަސާސެއް ނެތް، މުޅިން ދޮގު ވާހަކަ ތަކެއް ކަމަށެވެ. 

މި ވާހަކަތައް ދޮގު ކުރުމަކީ، އެމެރިކާ އާއި އީރާންއާ ދެެމެދު މިހާރު އޮތް ނުތަނަވަސްކަމުގެ ތެރޭގައި ދިމާވި އެންމެ ފަހުގެ ހާދިސާ އެވެ. ހޮރްމުޒް ކަނޑު އޮޅި އަކީ ދުނިޔޭގެ ތެލުގެ ވިޔަފާރީގައި ވަރަށް މުހިންމު ދައުރެއް އަދާ ކުރާ މަގެކެވެ. ދުނިޔޭގެ ތެލުގެ ވިޔަފާރީގެ ބޮޑު ބައެއް މި ކަނޑު އޮޅިން ދަތުރު ކުރެ އެވެ.

އީރާންގެ ރިވޮލިއުޝަނަރީ ގާޑް އިން މިހެން ބުނެފައިވާއިރު، މި މައްސަލައާ ގުޅޭ ގޮތުން އެމެރިކާގެ ފަރާތުން މިހާތަނަށް ވަކި ތަފްސީލެއް ހާމަ ކޮށްފައި ނުވެ އެވެ. ހޮރްމޫޒް ކަނޑު އޮޅީގައި ދަތުރު ކުރުމާ ގުޅޭ ގޮތުން މީގެ ކުރިން ވެސް އެމެރިކާ އާއި އީރާންއާ ދެމެދު ވަނީ މައްސަލަ ޖެހިފަ އެވެ.