ހޮރްމޫޒް ކަނޑު އޮޅިއަށް ވަންނަން އެމެރިކާގެ އަސްކަރިއްޔާ އިން މަސައްކަތް ކޮށްފި ނަމަ، ހަމަލާ ދޭނެ ކަމުގެ އިންޒާރު އީރާން އިން ދީފި

ހޮރްމޫޒް ކަނޑު އޮޅި އަށް ވަންނަން އެމެރިކާގެ އަސްކަރިއްޔާ އިން މަސައްކަތް ކޮށްފި ނަމަ، އެ ފައުޖުތަކަށް ހަމަލާ ދޭނެ ކަމުގެ އިންޒާރު އީރާންގެ އަސްކަރިއްޔާ އިން ދީފި އެވެ. 

އީރާން އިން މި އިންޒާރު ދީފައި ވަނީ، އެ ސަރަހައްދުގައި ތާށިވެފައިވާ އުޅަނދު ފަހަރު ނެރުމަށްޓަކައި އެމެރިކާގެ އަސްކަރީ މިޝަނެއް ފެށުމަށް، އެމެރިކާގެ ރައީސް ޑޮނަލްޑް ޓްރަމްޕް ނިންމަވައި، އެކަން އިއުލާން ކޮށްފައި ވަނިކޮށެވެ. 

އީރާންގެ އަސްކަރިއްޔާ އިން ނެރުނު ބަޔާނެއްގައި ބުނެފައި ވަނީ، ހޮރްމޫޒް ކަނޑު އޮޅީޣެ ސަލާމަތާއި ރައްކާތެރިކަން ބެލެހެއްޓުމުގެ ފުރިހަމަ ބާރު އޮތީ އިސްލާމިކް ރިޕަބްލިކް އޮފް އީރާންގެ ހަތިޔާރު އެޅި ސިފައިންގެ އަަތް މަތީގައި ކަމަށެވެ. އަދި ކޮންމެ ޙާލަތެއްގައި ވެސް، އެ ސަރަހައްދުން އުޅަނދު ފަހަރު ދަތުރު ކުރަން ވާނީ، އީރާންގެ އަސްކަރިއްޔާއާ ކޯޑިނޭޓު ކުރުމަށް ފަހު، އެ ފަރާތުގެ އިރުޝާދުގެ ދަށުން ކަމަށް ވެސް ބަޔާނުގައި ބުނެފައިވެ އެވެ. 

އީރާންގެ އަސްކަރިއްޔާ އިން އިތުރަށް ބުނެފައި ވަނީ، އެ ޤައުމުގެ މުޅި ބާރު ބޭނުން ކޮށްގެން ހޮރްމޫޒް ކަނޑު އޮޅީގެ ސަލާމަތީ ކަންކަން ބަލަހައްޓަމުން ގެންދާނެ ކަަމަށެވެ. އެހެންކަމުން، އެ ސަރަހައްދުން ދަތުރު ކުރާ ހުރިހާ މުދާ އުފުލާާ ބޯޓު ފަހަރާއު، ތެޔޮ ޓޭންކަރު ތަކުން ވެސް، އީރާންގެ އަސްކަރިއްޔާގެ ހުއްދައެއް ނެތި އެއްވެސް ޙަރަކާތެއް ނުހިންގުމަށް ވަނީ އިލްތިމާސް ކޮށްފަ އެވެ. އީރާން އިން ބުނާ ގޮތުގައި، މިގޮތަށް އަމަލު ކުރުމަކީ މި އުޅަނދު ފަހަރުގެ ސަލާމަތީ ރައްކާތެރިކަން ކަށަވަރު ކުރުމަށްޓައި ކޮންމެހެން ކުރަން ޖެހޭ ކަމެކެވެ. 

މީގެ އިތުުރުން ބޭރުގެ އެއްވެސް އަސްކަރީ ފައުުޖަކުން، ޚާއްސަކޮށް އެމެރިކާގެ އިސްތިއުމާރީ ސިފައިން ހޮރްމޫޒް ކަނޑުއޮޅިއާ ގާތްވާން މަސައްކަތްކޮށް، ނުވަތަ އެ ސަރަހައްދަށް ވަންނަން އުޅެފި ނަމަ، އެ ބަޔަކަށް ހަމަލާ ދޭނެ ކަމުގެ ހަރުކަށި އިންޒާރު އީރާން އިން ވަނީ ދީފަ އެވެ. އީރާން އިން ބުނާ ގޮތުގައި އެމެރިކާގެ އަސްކަރިއްޔާ އަކީ ސަރަހައްދުގެ ހަމަޖެހުން ނަގާލުމަށް މަސައްކަތް ކުރާ ބައެކެވެ. 

މި މައްސަލައިގައި މަސްރަހު ގޯސްވެފައި ވަނީ، މެދު އިރުމަތީގެ ކަނޑުގެ ސަރަހައްދު ތަކުގައި ދަތުރު ކުރާ އުޅަނދު ފަހަރަށް ހިމާޔަތް ދިނުމުގެ ނަމުގައި އެމެރިކާ އިން އަސްކަރީ ޙަރަކާތްތައް ވަރުގަދަ ކުރަން ފެށުމާ ގުޅިގެންނެވެ. ހޮރްމޫޒް ކަނޑު އޮޅި އަކީ ދުނިޔޭގެ ތެލުގެ ވިޔަފާާރީގައި އެންމެ މުހިންމު އެއް މަގު ކަމަށްވާއިރު، މި ސަރަހައްދުގެ ކޮންޓްރޯލް ހޯދުމަށް އެމެރިކާ އާއި އީރާންއާ ދެމެދު ނުތަނަވަސްކަން މިހާރު ވަނީ އިންތިހާ އަށް ބޮޑުވެފަ އެވެ.