އަދަދަށް ވަންނަން ދިޔަ ފުލުހުން ފުރަތަމަ އޮޅިގެން ވަނީ ރީކޯ މޫސަގެ ގެއަށް
މޫސަ ވިދާޅުވި ގޮތުގައި ރޭގެ ވަގުތެއްގައި ގިނަ އަދަދެއްގެ ފުލުހުން އޭނާގެ ގެއަށް ވަދެ އަށްވަނަ ފްލޯއަށް ދާން މަސައްކަތް ކުރީ އެއީ 'ހަޒާރުމާގެ' ކަމަށް ހީކޮށް އޮޅުމަކުން ކަމަށް.
މަޖިލީހުގެ ކުރީގެ ނައިބު ރައީސް މޫސާ މަނިކް (ރީކޯ މޫސަ) | ސޯޝަލް މީޑިއާ
'އަދަދު' ނޫހުގެ ސޯޝަލް މީޑިއާ މަންސަތަކުގައި އާންމުކުރި 'އައިޝާ' ޑޮކިއުމަންޓްރީއާ ގުޅިގެން ފުލުހުން އަދަދު ނޫޙުގެ އޮފީހަށް ވަންނަން ދިޔަ ފުލުހުން ފުރަތަމަ ވަނީ މަޖިލީހުގެ ކުރީގެ ނައިބު ރައީސް އަދި އެމްޑީޕީގެ ކުރީގެ ޗެއާޕާސަން ރީކޯ މޫސާ މަނިކުގެ ގެ އަށް ކަން ހާމަވެއްޖެ އެވެ.
ރާއްޖެ އެމްވީ އަށް މައުލޫމާތުދެއްވަމުން މޫސަ ވިދާޅުވީ ރޭގެ ވަގުތެއްގައި ގެ ކައިރީގައި ރަހުމަތްތެރިންނާއި ވާހަކަދައްކަވަން ހުންނަވަނިކޮށް ފައިލްތަކަކާއި އެކު އައި ފުލުހުންތަކަކާއި ޔުނިފޯމްގައި ތިބި ފުލުހުންތަކެއް ގޭގެ ދޮރު ހުޅުވާދިނުމަށް އެދުނު ކަމަށެވެ. ފުލުހުންގެ އެދުމާއި އެއްގޮތަށް ގެ ހުޅުވާ، ގޭތެރެއަށް ފުލުހުން ވަނުމުން ފުލުހުން ދަނީ ކޮން ތަނަކަށްތޯ ސުވާލުކޮށްފައިވާނެ ކަމަށް މޫސަ ވިދާޅުވި އެވެ. ފުލުހުން ދަނީ 8 ވަނަ ފްލޯ އަށް ކަމަށް އެންގުމުން ގޭގެ 8 ވަނަ ފްލޯ ނުނިމޭކަން ހާމަކޮށްފައިވާނެ ކަމަށް ވެސް މޫސަ ވިދާޅުވި އެވެ.
"އަޅުގަނޑު ބުނިން ކީއްތޯއޭ ކުރައްވަން ތި އުޅުއްވަނީ. ވިދާޅުވި ތިއީ ހަޒާރުމާގެ އެއް ނޫން ހެއްޔޭ. އަޅުގަނޑު ބުނިން ނޫނެކޭ މިއީ ގުލްހަޒާރު ގެއޭ. ހަޒާރުމާގެ ހުންނާނީ މި ކޮޅުގައޭ." މޫސަ ވިދާޅުވި އެވެ.
އޭރު ގާތްގަނޑަނަށް 07:10 ކަމަށާއި ގެއަށް ވަނީ ވަރަށް ގިނަ ފުލުހުން ކަމަށް މޫސަ ވިދާޅުވި އެވެ. 'އަދަދު' ނޫހުގެ ސޯޝަލް މީޑިއާ މަންސަތަކުގައި އާންމުކުރި 'އައިޝާ' ޑޮކިއުމަންޓްރީއާ ގުޅިގެން ފުލުހުން އަދަދު ނޫޙުގެ އޮފީހަށް ވަދެ، މުދަލާއި، ތަކެތި ގެންގޮސްފައި ވަނީ ހޯމަ ދުވަހުގެ ރެ އެވެ. މިކަމާއި ގުޅިގެން އަންގާރަ ދުވަހު މަޖިލީހަށް މައްސަލަ އެއް ވެސް ހުށަހެޅި އެވެ. ނަމަވެސް އެ މައްސަލަ ބަލައިގަނެފަ އެއް ނުވެ އެވެ.
