އީރާނުން ތެޔޮ އުފައްދާ މިންވަރު މަދުކުރަން ފަށައިފި
އެމެރިކާއިން އީރާނުގެ ބަނދަރުތައް ބަންދުކޮށް ތެޔޮ ބޭރުކުރުމަށް ހުރަސްއެޅުމާ ގުޅިގެން، ތެޔޮ ރައްކާކުރާނެ ޖާގަ ހުސްވާތީ އީރާނުން ތެޔޮ އުފައްދާ މިންވަރު މަދުކުރަން ފަށައިފި. މި ހަމަނުޖެހުންތަކުގެ ސަބަބުން އީރާނުގެ އިގްތިސާދަށް ބޮޑެތި ގެއްލުންތަކެއް ލިބެމުންދާއިރު، އެގައުމުގެ އިންފްލޭޝަން ރޭޓް ވަނީ 50 އިންސައްތައަށްވުރެ މައްޗަށް ގޮސްފައި. ހޮރްމޫޒް ކަނޑުއޮޅީގެ ކޮންޓްރޯލް އީރާނުން ހޯދުމުގެ ރައްދުގައި އެމެރިކާއިން އެޅި ފިޔަވަޅުތަކުގެ ސަބަބުން، 6 ބިލިއަން ޑޮލަރުގެ ތެލުގެ ވިޔަފާރި ވަނީ ހުއްޓުމަކަށް އައިސްފައި.
މާރިޗު 12، 2017 ގައި ނަގާފައިވާ މި ފޮޓޯއިން ފެންނަނީ، ޚަލީޖު ފާރިސްގެ އައްސޭރިފަށުގައި އޮންނަ އީރާނުގެ ޚާރްކް އައިލެންޑުގައި ގާއިމުކޮށްފައިވާ ތެޔޮ އުފައްދާ މަރުކަޒު. | އޭއެފްޕީ
އެމެރިކާއިން ހޮރްމޫޒް ކަނޑުއޮޅި ބަންދުކުރުމާ ގުޅިގެން، ތެޔޮ ރައްކާކުރާނެ ޖާގަ ނެތުމުގެ މައްސަލަ ކުރިމަތިވެ، އީރާނުން ތެޔޮ އުފައްދާ މިންވަރު މަދުކުރަން ފަށާފައިވާ ކަމަށް ބްލޫމްބާގް ނިއުސް އޭޖެންސީން ރިޕޯޓްކޮށްފިއެވެ. ބްލޫމްބާގުން މިކަން ހާމަކޮށްފައިވަނީ އީރާނުގެ އިސް އޮފިޝަލަކާ ހަވާލާދީ ހޮނިހިރު ދުވަހުއެވެ.
ބްލޫމްބާގުން ރިޕޯޓްކޮށްފައިވާ ގޮތުގައި، ހޮރްމޫޒް ކަނޑުއޮޅި މެދުވެރިކޮށް އީރާނުން ކުރާ ތެލުގެ ވިޔަފާރިއަށް ހުރަސްއެޅުމަށް އެމެރިކާގެ ކަނޑުގެ ސިފައިން ދެމުންދާ ހަމަލާތަކާއި ހުރަސްތައް ވަރުގަދަކުރުމާ ގުޅިގެން، ފާއިތުވި ހަފުތާތަކުގައި އީރާނުން ތެޔޮ ބޭރުކުރާ މިންވަރު ވަނީ ވަރަށް ބޮޑަށް ދަށަށް ގޮސްފައެވެ. މީގެ ސަބަބުން އީރާނުގައި ތެޔޮ ރައްކާކުރާ ތަންތަން ވަރަށް ހަލުވިކަމާއެކު ދަނީ ފުރެމުންނެވެ.
އީރާނުގެ ހަކަތައާ ބެހޭ ސިޔާސަތުތައް ދަންނަ އޮފިޝަލުން ވިދާޅުވާ ގޮތުގައި، މިހާރު ތެޔޮ އުފައްދަމުންދާ މިންވަރަށް ބަލާއިރު، ތެޔޮ ރައްކާކުރާނެ އިތުރު ޖާގަ ހުސްވުމުގެ ކުރިން އީރާނަށް މިހާރު އޮތީ ގާތްގަނޑަކަށް އެއް މަސް ދުވަހުގެ ކުރު މުއްދަތެކެވެ.
ބްލޫމްބާގުން ރިޕޯޓްކޮށްފައިވާ ގޮތުގައި، ތެޔޮ ރައްކާކުރާ ޓޭންކުތައް އެއްކޮށް ފުރެންދެން މަޑުކުރުމުގެ ބަދަލުގައި، ރައްކާތެރިކަމުގެ ފިޔަވަޅެއްގެ ގޮތުން ތެހެރާނުން މިހާރު ދަނީ އިސްވެ ސާފުނުކުރާ ތެޔޮ އުފައްދާ މިންވަރު މަދުކުރަމުންނެވެ.
ފެބްރުއަރީ މަހުގެ ފަހުކޮޅު އެމެރިކާ އާއި އިޒްރޭލުން ފެށި މި ހަނގުރާމަ އޭޕްރިލް 8 ވަނަ ދުވަހުން ފެށިގެން މެދުކަނޑާލާފައިވާއިރު، އޭގެ ފަހުން ޕާކިސްތާނުގައި ބޭއްވި ސުލްހައިގެ ވާހަކަތަކުގެ ފުރަތަމަ ބުރު ވަނީ ނާކާމިޔާބުވެފައެވެ.
ހަނގުރާމަ ފެށުނީއްސުރެ އީރާނުން ވަނީ ހޮރްމޫޒް ކަނޑުއޮޅި އެގައުމުގެ ބާރުގެ ދަށަށް ގެނެސް، ދުނިޔޭގެ އިގްތިސާދަށް ބޭނުންވާ ތެލާއި، ގޭސް އަދި ގަސްކާނާ ބޭރުކުރާ މައި މަގުތައް ބަންދުކޮށްފައެވެ. މީގެ ރައްދުގައި އެމެރިކާއިން ވަނީ އީރާނުގެ ބަނދަރުތައް ބަންދުކޮށްފައެވެ.
އެމެރިކާގެ އަސްކަރިއްޔާއިން ބުނާ ގޮތުގައި، އީރާނުގެ ބަނދަރުތައް ބަންދުކުރުމުގެ ސަބަބުން އެގައުމުން ބޭރުކުރާ 6 ބިލިއަން ޑޮލަރުގެ ތެޔޮ ބޭރުކުރުން ވަނީ ހުއްޓުވާފައެވެ. މީގެ އިތުރުން، ހަނގުރާމައިގެ ކުރިންވެސް މަތީގައި ހުރި އީރާނުގެ އިންފްލޭޝަން ނުވަތަ ތަކެތީގެ އަގު އުފުލޭ މިންވަރު މިހާރު ވަނީ 50 އިންސައްތައަށްވުރެ މައްޗަށް ގޮސްފައެވެ.
