އީރާނުގެ ހުށަހެޅުމަށް އެމެރިކާއިން ޖަވާބު ދީފި

އީރާނުން އެންމެ ފަހުން ހުށަހެޅި ސުލްހައިގެ ހުށަހެޅުމަށް އެމެރިކާއިން ޖަވާބު ދީފައިވާ ކަމަށް އީރާނުގެ ދައުލަތާ ގުޅުންހުރި މީޑިއާތަކުން ރިޕޯޓްކޮށްފިއެވެ.

އީރާނުގެ ތަސްނީމް ނިއުސް އެޖެންސީން ބުނި ގޮތުގައި، ޕާކިސްތާން މެދުވެރިކޮށް އެމެރިކާއިން ފޮނުވި މި ޖަވާބު މިހާރު ދިރާސާކުރަމުންދާ ކަމަށް އީރާނުގެ ފޮރިން މިނިސްޓްރީގެ ތަރުޖަމާނު ވަނީ ވިދާޅުވެފައެވެ.

އީރާނަށް ޖަވާބު ދީފައިވާކަން އެމެރިކާއިން އަދި ރަސްމީކޮށް ކަށަވަރުކޮށްދީފައެއް ނުވެއެވެ. ނަމަވެސް ހޮނިހިރު ދުވަހު ރައީސް ޑޮނަލްޑް ޓްރަމްޕް ވިދާޅުވީ، އީރާނުން އެމެރިކާއަށް ފޮނުވި ސުލްހައިގެ ހުށަހެޅުން ވަރަށް އަވަހަށް ބައްލަވާނެ ކަމަށާއި، އެހެންނަމަވެސް އެއީ ބަލައިގަނެވޭނެ ފަދަ ހުށަހެޅުމަކަށް ވާނެ ކަމަށް ގަބޫލުފުޅު ނުކުރެއްވޭ ކަމަށެވެ.

އީރާނުގެ ދައުލަތުގެ މީޑިއާތަކުން ރިޕޯޓްކޮށްފައިވާ ގޮތުގައި، ތެހެރާނުން ހުށަހެޅި 14 ނުކުތާގެ މި ސުލްހައިގެ ހުށަހެޅުމުގައި އެމެރިކާގެ ސިފައިން އީރާނުގެ ބޯޑަރު ކައިރިން ދުރުކުރުމަށާއި، އީރާނުގެ ބަނދަރުތަކަށް އަޅާފައިވާ ކަނޑުގެ ބްލޮކޭޑް ނުވަތަ ބަންދު އުވާލުމަށް ވަނީ އެދިފައެވެ. މީގެ އިތުރުން އިޒްރޭލުން ލުބުނާނުގައި ހިންގާ އުދުވާނުތަކާއެކު، ހުރިހާ ހަމަލާތަކެއް ހުއްޓާލުމަށް ވެސް މި ހުށަހެޅުމުގައި ގޮވާލާފައިވެއެވެ.

މީގެ އިތުރުން، ކުރިއަށް އޮތް 30 ދުވަހުގެ ތެރޭގައި ދެ ގައުމުގެ ދެމެދުގައި އެއްބަސްވުމަކަށް އައުމަށް ވެސް އީރާނުން ވަނީ ހުށަހަޅާފައެވެ.

އީރާނުގެ މީޑިއާތަކުން އިތުރަށް ބުނި ގޮތުގައި، މި ހުށަހެޅުމުގައި ބާރުއަޅާފައިވަނީ މިހާރު އޮތް ހަމަލާބަދަލުކުރުން ހުއްޓާލުމުގެ މުއްދަތު އިތުރުކުރުމުގެ ބަދަލުގައި، މުޅި ހަނގުރާމަ އެއްކޮށް ނިމުމަކަށް ގެނައުމަށެވެ.

މި ހުށަހެޅުމާ ގުޅޭގޮތުން ހޮނިހިރު ދުވަހުގެ ރޭ "ޓްރުތް ސޯޝަލް" ގައި ކުރެއްވި ޕޯސްޓެއްގައި ޓްރަމްޕް ވިދާޅުވީ، ވޭތުވެދިޔަ 47 އަހަރު ދުވަހު އިންސާނިއްޔަތަށާއި މުޅި ދުނިޔެއަށް އީރާނުން ދީފައިވާ ގެއްލުންތަކާ އަޅާބަލާއިރު، އެ ގައުމަށް އަދި އެކަށީގެންވާ ވަރުގަދަ އަދަބެއް ލިބިފައި ނުވާ ކަމަށެވެ.

ފްލޮރިޑާގެ ޕާމް ބީޗުގައި ހޮނިހިރު ދުވަހު ނޫސްވެރިންނާ ވާހަކަދައްކަވަމުން ޓްރަމްޕް ވިދާޅުވީ، އީރާނުގެ ހުށަހެޅުން އަދި ތަފްސީލީ ގޮތެއްގައި ބައްލަވާފައި ނުވާ ކަމަށެވެ.

ޓްރަމްޕް ވިދާޅުވީ އެއްބަސްވުމުގެ މައިގަނޑު މަފްހޫމްތައް އޭނާއަށް އަންގާފައިވާ ކަމަށާއި، އެއްބަސްވުމުގައި ހިމެނޭ ސީދާ އިބާރާތްތައް މިހާރު ލިބެމުންދާ ކަމަށެވެ.

އީރާނުގެ އެތެރޭގެ އަމާޒުތަކަށް އަލުން އަސްކަރީ ހަމަލާތަކެއް ދީފާނެތޯ ބީބީސީން ސުވާލުކުރުމުން ޓްރަމްޕް ވިދާޅުވީ، އެއީ ވެދާނެ ކަމެއް ކަމަށެވެ.

ޓްރަމްޕް ވިދާޅުވީ އީރާނުން ގޯސްކޮށް އުޅޭނަމަ ނުވަތަ ނުރަނގަޅު ކަމެއް ކޮށްފިނަމަ ހަމަލާދޭނެ ކަމަށާއި، ނަމަވެސް މިވަގުތު ކަންތައްތައް ވާގޮތް ބައްލަވާނެ ކަމަށެވެ.

މި ހަނގުރާމައިން އެމެރިކާ އެއްކޮށް ވަކިވުމުގެ ވިސްނުމެއް ނެތްކަން ހާމަކުރައްވަމުން ޓްރަމްޕް ވިދާޅުވީ، އެމެރިކާއިން މި ސަރަހައްދު ދޫކޮށް ނުދާނެ ކަމަށެވެ. އަދި ކުރިއަށް އޮތް ދެ އަހަރު ނުވަތަ ފަސް އަހަރު ތެރޭގައި އެއްވެސް ބަޔަކަށް އަލުން މި ހަނގުރާމައަށް ވަންނަން ނުޖެހޭނެ ފަދަ ގޮތަކަށް ކަންކަން ނިންމަވާނެ ކަމަށް ވެސް އޭނާ ވިދާޅުވިއެވެ.

އީރާނުގެ ދައުލަތާ ގުޅުންހުރި އެޖެންސީތަކުން ބުނާ ގޮތުގައި، ތެހެރާނުން މި ހުށަހެޅުން ހުށަހެޅީ ދެ މަސް ދުވަހުގެ މުއްދަތަށް ހަމަލާބަދަލުކުރުން ހުއްޓާލުމަށް އެމެރިކާއިން ހުށަހެޅި ނުވަ ނުކުތާގެ ރޭވުމަށް ޖަވާބު ދިނުމުގެ ގޮތުންނެވެ.

މިދިޔަ ހުކުރު ދުވަހު އެމެރިކާގެ ކޮންގްރެސްގެ މެންބަރުންނަށް ފޮނުއްވި ސިޓީއެއްގައި ޓްރަމްޕް ވިދާޅުވީ، އޭޕްރިލް 8 ވަނަ ދުވަހު ހަމަލާބަދަލުކުރުން ހުއްޓާލުމުގެ އެއްބަސްވުމަށް އަމަލުކުރަން ފެށުމާއެކު ހަނގުރާމަ "ނިމުމަކަށް" އައިސްފައިވާ ކަމަށެވެ. ނަމަވެސް އީރާނަކީ އަދިވެސް އެމެރިކާއަށާއި އެ ސަރަހައްދުގައި ތިބި އެމެރިކާގެ އަސްކަރީ ފައުޖުތަކަށް އޮތް "ބޮޑު" ނުރައްކަލެއް ކަމަށް އޭނާ ފާހަގަކުރެއްވިއެވެ.

އީރާނުގެ ބަނދަރުތައް ބަންދުކޮށްފައި އޮތް އޮތުމަކީ ހަނގުރާމަ ކުރިއަށްދާ ކަމުގެ ހެއްކެއް ނޫން ކަމަށް ޓްރަމްޕް ދައުވާ ކުރެއްވިއެވެ.

އޭނާ ވިދާޅުވީ އެއްވެސް ބަޔަކު އެކަމާ ދެކޮޅަށް ގޮންޖަހަމުން ނުދާ ކަމަށެވެ.

މީގެ އިތުރުން، ހަމަލާބަދަލުކުރުން ހުއްޓާލާފައި އޮތުމުން ހަނގުރާމައަށް ގާނޫނީ ހުއްދަ ހޯދުމަށް އޮންނަ ސުންގަޑިއަށް އަމަލުކުރަން ނުޖެހޭނެ ކަމަށް ވެސް ޓްރަމްޕް ވަކާލާތު ކުރެއްވިއެވެ.

ގާނޫނު ބުނާ ގޮތުން، އެމެރިކާގެ ރައީސަކު އަސްކަރީ ފިޔަވަޅެއް އަޅާކަން ގާނޫނު ހަދާ މަޖިލީހަށް އެންގުމަށްފަހު، 60 ދުވަހުގެ ތެރޭގައި ކޮންގްރެސްގެ ހުއްދަ ހޯދަންޖެހެއެވެ. އެހެންނޫންނަމަ ހަމަލާތައް ހުއްޓާލަން ޖެހޭނެއެވެ.

މާޗް 2 ވަނަ ދުވަހު އީރާނަށް ހަމަލާދޭން ފެށިކަން ޓްރަމްޕް ރަސްމީކޮށް ކޮންގްރެސްއަށް އެންގެވި ފަހުން، މިދިޔަ ހުކުރު ދުވަހަށް ވަނީ 60 ދުވަސް ހަމަވެފައެވެ. އެމެރިކާއާއި އިޒްރޭލުން އީރާނަށް ހަމަލާދޭން ފެށީ އޭގެ ދެ ދުވަސް ކުރިން، ފެބްރުއަރީ 28 ގައެވެ.

ހުކުރު ދުވަހު ދެއްވި އެކި ބަޔާންތަކުގައި ޓްރަމްޕް ވަނީ "އީރާނަށް ދުވަހަކުވެސް ނިއުކްލިއާ ހަތިޔާރެއް ނުއުފެއްދޭނެ" ކަމަށް ވިދާޅުވާ ވިދާޅުވުން ތަކުރާރު ކުރައްވާފައެވެ.

އީރާނުން ނިއުކްލިއާ ބޮމެއް އުފައްދަން މަސައްކަތް ކުރާ ކަމަށް ކުރެވޭ ތުހުމަތުތައް އެ ގައުމުން ތަކުރާރުކޮށް ދޮގުކުރެއެވެ. އަދި އެ ގައުމުގެ ނިއުކްލިއާ ޕްރޮގްރާމަކީ ހަމައެކަނި ސުލްހަވެރި ބޭނުންތަކަށް ކުރިއަށްގެންދާ ޕްރޮގްރާމެއް ކަމަށް ބުނެއެވެ. ނަމަވެސް، ނިއުކްލިއާ ހަތިޔާރު ނެތް ގައުމުތަކުގެ ތެރެއިން، ހަތިޔާރު އުފެއްދުމަށް ބޭނުންވާ މިންވަރާ ގާތްކުރާ މިންވަރަށް ޔުރޭނިއަމް މުއްސަނދިކޮށްފައިވާ ހަމައެކަނި ގައުމަކީ އީރާނެވެ.

ޓްރަމްޕް މި މޭރުމުން ވާހަކަދައްކަވާފައި މިވަނީ، މި ހަނގުރާމައަކީ ބޮޑު ހޭދައެއް ހިނގާ، އޮޅުންބޮޅުން ބޮޑު އަދި ސާފު މަގްސަދެއް ނެތް ހަނގުރާމައެއް ކަމަށް ބުނެ، އެމެރިކާގެ ގާނޫނު ހަދާ މަޖިލީހުގެ މެންބަރުންނާއި ޓްރަމްޕްގެ ރިޕަބްލިކަން ޕާޓީގެ ބައެއް މެންބަރުން ވެސް ފާޅުގައި ކަންބޮޑުވުން ފާޅުކުރަމުންދާ ދަނޑިވަޅެއްގައެވެ.