އީރާން އިން ބަސް ނާހާ ނަމަ، ހަނގުރާމަ ފަށަން ޖެހިދާނެ: ޓްރަމްޕް

އެމެރިކާ އިން އީރާންއާ ދެކޮޅަށް ކުރަމުން އައި ހަނގުރާމަ މެދު ކަނޑާލާފައި ވީ ނަމަވެސް، އީރާން އިން ގޯސް ކަމެއް ކޮށްފި ނަމަ، ނުވަތަ އެ ޤައުމުން ބަސް ނާހައިފި ނަމަ، އަލުން ހަނގުރާމަ ފަށަން ޖެހިދާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ. 

ނޫސްވެރިންނާ ވާހަކަ ދައްކަވަމުން ޓްރަމްޕް ވިދާޅުވީ، އީރާންއާ ގުޅޭ ގޮތުން އެމެރިކާ އިން މިހާރު ވަރަށް ރަނގަޅަށް ކަންތައްތައް ކުރިއަށް ގެންދާ ކަމަށެވެ. އަދި އީރާންގެ ސަރުކާރުން އެމެރިކާ އާއެކު އެއްބަސްވުމެއް އެކުލަވާލަން ބޭނުން ވަނީ، އެ ޤައުމު ވަރަށް ބޮޑަށް ހަލާކުވެފައި ވާތީ ކަމަށް ވެސް ޓްރަމްޕް ވިދާޅުވި އެވެ. 

އީރާންގައި ވެރިކަން ކުރަމުން އަންނަނީ ކޮން ބައެއްކަން ނޭނގޭ ކަމަށާއި، އެ ޤައުމުގެ ވެރިންނަށް ވެސް އެއީ ކޮން ބައެއްކަން ނޭނގޭ ކަމަށް ޓްރަމްޕް ވިދާޅުވި އެވެ. އެގޮތުން އީރާންގެ ލީޑަރުންނަކީ ކޮން ބައެއްކަން ދެނެގަތުމުގައި އެ ޤައުމު ވެސް އޮތީ ބޮޑު އުނދަގުލެއްގެ ތެރޭގައި ކަމަށް ޓްރަމްޕް ވިދާޅުވި އެވެ. އެކަމަށް އިޝާރާތް ކުރައްވައި ޓްރަމްޕް ވިދާޅުވީ، އީރާންގެ ކުރީގެ ރޫހީ ލީޑަރު އާޔަތުﷲ އަލީ ޚާމަނާއީ ވަނީ ގެއްލިފައި ކަމަށެވެ. 

އީރާން އިން ފޮނުވި ސުލްޙައިގެ ހުށަހެޅުމާ ގުޅޭ ގޮތުން ވާހަކަ ދައްކަވަމުން ޓްރަމްޕް ވިދާޅުވީ، އެ ޤައުމުން ހުށަހެޅި ސުލްޙައިގެ ހުށަހެޅުމުގެ މައިގަނޑު ޚިޔާލުތައް އޭނާއާ ހިއްސާ ކޮށްފައިވާ ކަމަށެވެ. އަދި މިހާރު އެ ހުށަހެޅުމުގެ ތަފްސީލް އަދި މުޅި ހުށަހެޅުން ލިބޭނެ ކަމަށް ވެސް ޓްރަމްޕް ވިދާޅުވި އެވެ. 

އީރާން އިން ހުށަހެޅި ހުށަހެޅުމުގައި، އެ ޤައުމުގެ ނިއުކްލިއަރ ޕްރޮގްރާމް އާއި، އެ ސަރަހައްދުގައި އެމެރިކާގެ އަސްކަރީ ޙަރަކާތްތައް ކުރިއަށް ގެންދާ ގޮތް އަދި އީރާންއާ ދެކޮޅަށް އަޅާފައިވާ އިޤްތިޞާދީ ދަތި ކުރުންތަކާ ގުޅޭ ކަންކަން ހިމެނޭ ކަމަށް ބެލެވެ އެވެ. 

އެމެރިކާ އާއި އީރާންއާ ދެމެދު މިހާރު މަޝްވަރާ ކުރަމުން އަންނަނީ ދެ ޤައުމުގެ ދެމެދު އުފެދިފައިވާ ނުތަނަވަސްކަން ޙައްލު ކުރުމަށް ކުރަމުން އަންނަ މަސައްކަތް ތަކެވެ.