ހަނގުރާމައިގައި ބޯޅަ އޮތީ އެމެރިކާ ކޮޅުގައި: އީރާންގެ ޑެޕިއުޓީ ފޮރިން މިނިސްޓަރު

އެމެރިކާ އާއި އީރާންއާ ދެމެދު ހިނގަމުން އަންނަ ހަނގުރާމަ ނިންމުމަށް މަޝްވަރާގެ މަގު އިޚްތިޔާރު ކުރާނީތޯ، ނުވަތަ ހަނގުރާމަ ކުރިއަށް ދިޔުމުގެ މަގު އިޚްތިޔާރު ކުރާނީތޯ ނިންމުން މިހާރު އޮތީ އެމެރިކާގެ އަތް މަތީގައި ކަމަށާއި، ނަމަވެސް އީރާން އޮތީ ކޮންމެ ޙާލަތަކަށް ވެސް ތައްޔާރަށް ކަމަށް އެ ޤައުމުން ބުނެފި އެވެ. 

އީރާންގެ ސްޓޭޓް ބްރޯޑްކާސްޓަރު އައިއާރުއައިބީ އިން ރިޕޯޓު ކޮށްފައިވާ ގޮތުގައި، އީރާންގައި ތިއްބަވާ ބޭރުގެ ޑިޕްލޮމޭޓުންނާ މުޚާތަބު ކުރައްވައި ވާހަކަ ދައްކަވަމުން އީރާންގެ ޑެޕިއުޓީ ފޮރިން މިނިސްޓަރު ކާޒެމް ޣަރިބާބާދީ ވިދާޅުވީ، ޑިޕްލޮމެސީގެ މަގު އިޚްތިޔާރު ކުރުމާއި، ކުރިމަތިލުން ތަކުގެ މަގު އިޚްތިޔާރު ކުރުމުގެ ފުރުސަތު މިހާރު އޮތީ އެމެރިކާ އަށް ދޫކޮށްލެވިފައި ކަމަށެވެ. މިއީ ބައިނަލްއަޤުވާމީ މަސްރަޙުގައި ބޭނުން ކުރާ "ބޯޅަ އޮތީ އެމެރިކާގެ ކޯޓުގައި" ކަމަށް ބުނާ އުސޫލުން ފާހަގަ ކުރެއްވި ނުކުތާއެއް ކަމަށް ވެސް އޭނާ ވިދާޅުވި އެވެ.

ޣަރިބާބާދީ އިތުރަށް ވިދާޅުވީ، އީރާންގެ ޤައުމީ މަސްލަޙަތާއި ސަލާމަތްތެރިކަން ކަށަވަރު ކުރުމަށްޓަކައި، އެމެރިކާ އިން އިޚްތިޔާރު ކުރާ ކޮންމެ މަގަކުން ކުރިއަށް ދިޔުމަށް ވެސް އީރާން އޮތީ ފުރިހަމަ ތައްޔާރުވެގެން ކަމަށެވެ. އޭނާގެ ވާހަކައިގައި އިޝާރާތް ކުރެއްވީ، އެމެރިކާ އިން އީރާންއާ މެދު ގެންގުޅޭ ހަރުކަށި ސިޔާސަތުތައް ދޫކޮށްލައި، މަޝްވަރާގެ މޭޒަށް އައުމަށް، ނުވަތަ ދެ ޤައުމުގެ ދެ މެދުގައި އޮތް ނުތަނަވަސްކަން އިތުރަށް ބޮޑު ކުރުމުގެ އިޚްތިޔާރު އެމެރިކާ އަށް އޮތް ކަމަށެވެ.

މި ވާހަކަތައް އައިސްފައި ވަނީ، މެދު އިރުމަތީގެ މަަސްރަހު ނުހަނު ބޮޑަށް ހޫނުވެފައިވާ ދަނޑިވަޅެއްގަ އެވެ. އީރާން އިން ބުނަމުން ދަނީ އެ ޤައުމުން އަބަދު ވެސް އިސްކަން ދެނީ ސަރަހައްދީ ހަމަޖެހުމަށް ކަމަށާއި، ނަމަވެސް އެ ޤައުމުގެ އެ ޤައުމުގެ އިސްތިޤުލާލަށް އުނިކަން އަންނަ ފަދަ އެއްވެސް އަމަލަކަށް ފުރުސަތު ނުދޭނެ ކަމަށެވެ. 

އެމެރިކާގެ ސަރުކާރުން އީރާންއާ މެދު ގެންގުޅޭ ސިޔާސަތު ތަކަށް ބަދަލު ތަކެއް އަތުވެދާނެ ކަމަށް ބެލެވޭ މި ދަނޑިވަޅުގައި، އީރާންގެ މި ބަހުގެ ހަމަލާ އަކީ އެމެރިކާގެ ކުރިއަށް އޮތް ފިޔަވަޅު ތަކަށް ބަލައިގެން ދީފައިވާ އިންޒާރެއްގެ ގޮތުގައި މަސްރަހު ދިރާސާކުރާ ފަރާތް ތަކުން ސިފަ ކުރެ އެވެ. އީރާން އިން ތަކުރާރުކޮށް ބުނަމުން ދަނީ ދަތި ކުރުމުގެ ފިޔަވަޅު ތަކުން އެ ޤައުނު ކުޑަ ކަކޫ ނުޖެއްސޭނެ ކަމަށާއި، މަޝްވަރާ ކުރެވޭނީ ހަމަހަމަ އުސޫލު ތަކެއްގެ މަތިން ކަމަށެވެ.