އެމެރިކާގެ ޖަވާބު ލިބިއްޖެ، މިހާރު ދަނީ ދިރާސާ ކުރަމުން: އީރާން

އެމެރިކާ އާއި އީރާންއާ ދެމެދު ހިނގަމުން އަންނަ ހަނގުރާމަ ހުއްޓުމަކަށް ގެނައުމަށް، އީރާން އިން ހުށަހަޅާފައިވާ 14 ނުކުތާގެ މައްޗަށް އެކުލެވޭ ޕްލޭން އަށް އެމެރިކާ އިން ދީފައިވާ ޖަވާބު ލިބިފައިވާ ކަމަށާއި، މިހާރު އެ ޖަވާބު ދިރާސާ ކުރުމުގެ މަސައްކަތް ކުރަމުން އަންނަ ކަމަށް އީރާން އިން ބުނެފި އެވެ. 

އީރާންގެ ފޮރިން މިނިސްޓްރީގެ ތަރުޖަމާނު އިސްމާއީލް ބަޣާއީ އެ ޤައުމުގެ މީޑިއާ ތަކަށް މައުލޫމާތު ދެއްވަމުން ވިދާޅުވީ، އެމެރިކާގެ ޖަވާބު އީރާން އަށް ލިބިފައި ވަނީ ޕާކިސްތާން މެދުވެރިކޮށް ކަމަށެވެ. އަދި އެ ލިޔެ ކިޔުންތައް މިހާރު ކަމާ ބެހޭ ފަރާތް ތަކުން ވަރަށް ގާތުން މުރާޖައާ ކުރަމުން އަންނަ ކަމަށް ވެސް އޭނާ ވިދާޅުވި އެވެ. ޕާކިސްތާން އަކީ، އެމެރިކާ އާއި އީރާންއާ ދެމެދު ސުލްޙަ ޤާއިމު ކުރުމަށް މެދުވެރިއެއްގެ ދައުރު އަދާ ކުރަމުން އަންނަ ޤައުމެވެ. 

ބަޣާއީ އިތުރަށް ވިދާޅުވި ގޮތުގައި، އީރާން އިން ހުށަހެޅި މި ޕްލޭން އަކީ ހަމައެކަނި މިހާރު ހިނގަމުންދާ ހަނގުރާމަ ހުއްޓާލުމާ ގުޅޭ ކަންކަމަށް އަމާޒު ކޮށްފައިވާ ޕްލޭނެއް ކަމަށެވެ. އަދި މި މަރުހަލާގައި ނިއުކްލިއާ ހަތިޔާރާ ގުޅޭ އެއްވެސް މަޝްވަރާއެއް ކުރިއަށް ނުދާނެ ކަމަށާއި، މި ޕްލޭން އަކީ ނިއުކްލިއާ މައްސަލައާ ގުޅުމެއް އޮތް ކަމެއް ނޫން ކަމަށް ވެސް އޭނާ ފާހަގަ ކުރެއްވި އެވެ. 

އީރާން އިން މިފަދަ ޕްލޭނެއް ހުށަހަޅާފައި މި ވަނީ، މެދު އިރުމަތީގެ މަސްރަހު ނުތަނަވަސްވެ، ހަނގުރާމަ އިތުރަށް ފުޅާ ވެދާނެ ކަމުގެ ބިރު ބޮޑުވެފައިވާ ދަނޑިވަޅެއްގަ އެވެ. އީރާން އާއި އެމެރިކާގެ މެދުގައި ސީދާ ސިޔާސީ ގުޅުން ނޯންނާތީ، ދެ ޤައުމުގެ ދެ މެދުގައި މުއާމަލާތްތައް ކުރިއަށް ގެންދަނީ ސްވިޒަލޭންޑް ނުވަތަ ޕާކިސްތާން ފަދަ ތިން ވަނަ ޤައުމެއް މެދުވެރިކޮށެވެ. 

އީރާންގެ 14 ނުކުތާގެ ޕްލޭންއާ ގުޅޭ ގޮތުން އެމެރިކާ އިން ދިން ޖަވާބުގެ ތަފްސީލެއް އީރާން އިން މިހާތަނަށް ހާމަ ކޮށްފައި ނުވެ އެވެ. ނަމަވެސް، މި ޕްލޭން އަކީ ސަރަހައްދީ ހަމަޖެހުން ޤާއިމު ކުރުމަށް އީރާން އިން އިސްނަގައިގެން ކުރިއަށް ގެންދާ މުހިންމު މަަސައްކަތެއްގެ ގޮތުގައި އެ ޤައުމުން ވަނީ ސިފަ ކޮށްފަ އެވެ.