ހަނގުރާމަ އަލުން ފެށިދާނެ، މިތިބީ އެމެރިކާގެ "މޮޔަ" ހަމާލާ ތަކަށް ތައްޔާރުވެގެން: އީރާން

އެމެރިކާ އާއި އިޒްރޭލް އިން އީރާންއާ ދެކޮޅަށް ކުރިއަށް ގެންދަމުން އަންނަ ހަނގުރާމަ އަލުން ފެށުމުގެ ފުރުސަތު ވަރަށް ބޮޑު ކަމަށާއި، އެމެރިކާ އަކީ އެއްވެސް އެއްބަސްވުމަކަށް ނުވަތަ މުއާހަދާ އަކަށް އިޙުތިރާމް ކުރާ ޤައުމެއް ނޫންކަން ހެކި ތަކުން ފެންނަން އެބަހުރި ކަމަށް އީރާންގެ އަސްކަރިއްޔާ އިން ބުނެފި އެވެ. 

އީރާންގެ އަސްކަރީ މަރުކަޒުގެ ޑެޕިއުޓީ މުޙައްމަދު ޖައުފަރު އާސަދީ ނެރުއްވި ބަޔާނެއްގައި ވިދާޅުވީ، އެމެރިކާގެ އޮފިޝަލުންގެ އަމަލުތަކާއި ބަސްމަގު ހުރީ މައިގަނޑު ގޮތެއްގައި މީޑިއާގެ ސަމާލުކަން ހޯދުމަށް ކަމަށެވެ. އޭގެ ބޭނުމަކީ ދުނިޔޭގެ ބާޒާރުގައި ތެލުގެ އަގު ދަށަށް ދިޔަ ނުދީ ހިފެހެއްޓުމާއި، އެމެރިކާ އަމިއްލަ އަށް އުފައްދާފައިވާ ނުތަނަވަސްކަމުގެ ތެރެއިން ސާލަމަތްވުން ކަމަަށް އޭނާ ތުހުމަތު ކުރެއްވި އެވެ. 

އީރާންގެ ފާރްސް ނިއުސް އެޖެންސީ އިން ރިޕޯޓު ކޮށްފައިވާ ގޮތުގައި، އާސަދީ ވަނީ އެމެރިކާ އިން ކުރިމަތި ކޮށްދާނެ ކޮންމެ ނުރައްކަލަކަށް ނުވަތަ "މޮޔަ" އަމަލަށް އީރާންގެ އަސްކަރިއްޔާ އޮތީ ފުރިހަމަ އަށް ތައްޔާރު ވެގެން ކަމުގެ އިންޒާރު ދެއްވައިފަ އެވެ. އޭނާ ވިދާޅުވީ، އެމެރިކާގެ ސިޔާސަތު ތަކަކީ އިތުބާރު ހިފޭ ސިޔާސަތު ތަކެއް ނޫން ކަމަށާއި، އެ ޤައުމުން އަމަލު ކުރަމުން ދަނީ އަމިއްލަ އެދުމާއި، ސިޔާސީ މަންފާ އަށް އިސްކަން ދީގެން ކަމަށެވެ. 

މި ބަޔާނަކީ މެދު އިރުމަތީގެ މަސްރަހު ނުހަނު ބޮޑަށް ހޫނުވެފައިވާ ދަނޑިވަޅެއްގައި، އެމެެރިކާ އާއި އިޒްރޭލް އިން އީރާން އަށް ދީފާނެ ހަމަލާ އަކަށް ތައްޔާރުވެ އޮތްކަން ހާމަ ކުރުމުގެ ގޮތުން އީރާން އިން ދިން އިންޒާރެކެވެ. އީރާންގެ އަސްކަރިއްޔާ އިން ބުނެފައިވާ ގޮތުގައި، އެމެރިކާ އިން ބައިނަލްއަޤުވާމީ އުސޫލުތަކާ ޚިލާފުވަމުންދާ ދިޔުމަކީ ސަރަހައްދީ ހަމަޖެހުމަށް އޮތް ބޮޑު ގޮންޖެހުމެކެވެ.