އީރަން އިން މަޝްވަރާގެ މަގު އިޚްތިޔާރު ނުކޮށްފި ނަމަ، ފުނޑުފުނޑު ކޮށްލާނަން: ޓްރަމްޕް

ސަރަހައްދީ ހަމަޖެހުމާއި، ނިއުކްލިއަރ މައްސަލައިގައި އީރާން އިން އެންމެ ފަހުން ހުށަހެޅި ސުލްޙައިގެ ޕްލޭންއާ މެދު އެމެރިކާ އިން އެއްވެސް ވަަރަކަށް ހިތްހަމަ ނުޖެހޭ ކަމަށް، އެ ޤައުމުގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

އެމެރިކާގެ ރިޔާސީ ގަނޑުވަރު، ވައިޓް ހައުސްގައި ހުންނަވައި ނޫސްވެރިންނާ ވާހަކަ ދައްކަވަމުން ޓްރަމްޕް ވަނީ، އީރާން އިން މިހާރު އަމަލު ކުރަމުންދާ ގޮތް ބަދަލުކޮށް، ސީދާ މަޝްވަރާގެ މޭޒަށް އައުމަށް ގޮވާލައްވައިފަ އެވެ. 

އެ މޭރުމުން ވާހަކަ ދައްކަވަމުން ޓްރަމްޕް ވަނީ، އީރާން އަށް ވަރުގަދަ އިންޒާރެއް ވެސް ދެއްވައިފަ އެވެ. އެގޮތުން ޓްރަމްޕް ވިދާޅުވީ، އީރާން އިން މަޝްވަރާގެ މަގު އިޚްތިޔާރު ނުކޮށްފި ނަމަ، ދެން އޮތް ގޮތަކީ އެ ޤައުމަށް ވަރުގަދަ ހަމަލާ ތަކެއް ދީ "ފުނޑުފުނޑުކޮށްލުން" ކަމަށެވެ. މިއީ އީރާންއާ މެދު އެމެރިކާ އިން ގެންގުޅޭ ހަރުކަށި ސިޔާސަތުގެ ދަށުން ދެއްވި އިންޒާރެއް ކަމަށް މަސްރަހު ދިރާސާ ކުރާ ފަރާތް ތަކުން ބުނެ އެވެ. 

އެމެރިކާ އާއި އީރާންއާ ދެމެދު އޮތް ގުޅުން ފަހަކަށް އައިސް ވަރަށް ބޮޑަށް ގޯސްވެފައިވާއިރު، އެމެރިކާ އިން ދަނީ އީރާން އަށް އިޤްތިޞާދީ ގޮތުން އަދި ސިޔާސީ ގޮތުން ބޮޑެތި ފިއްތުން ތަކެއް ކުރިމަތި ކުރުވަމުންނެވެ. އީރާން އިން ހުށަހަޅާފައިވާ ހުށަހެޅުން ތަކަކީ، އެެމެރިކާގެ ޝަރުތުތަކާ އެއްގޮތަށް ހުރި ހުށަހެޅުމެއް ނޫން ކަމަށް، މީގެ ކުރިން ވެސް އެމެރިކާ އިން ވަނީ ބުނެފަ އެވެ. 

މި މައްސަލައިގައި އީރާން އިން ބުނަމުން ދަނީ، އެެމެރިކާ އިން އެ ޤައުމާ ދެކޮޅަށް އަޅާފައިވާ ދަތި ކުރުމުގެ ފިޔަވަޅުތައް އުވައި ނުލަނީސް، އެއްވެސް މަޝްވަރާއެއްގައި ބައިވެރި ނުވާާނެ ކަމަށެވެ. ނަަމަވެސް، ޓްރަމްޕްގެ މި ފަހުގެ އިންޒާރާ އެކު، މެދު އިރުމަތީގެ މަސްރަހު އިތުރު ނުތަނަވަސްކަމެއްގެ ތެރެއަށް ދާނެ ކަަމަށް ބެލެވެ އެވެ.