ޕާމާ ބަލިކޮށް، އިންޓަރ އިން އިޓާލިއަން ލީގުގެ ޗެމްޕިއަންކަން ހޯދައިފި

އިޓާލިއަން ލީގުގައި ޕާމާއާ ދެކޮޅަށް ކުޅުނު މެޗުން މޮޅުވެ، އިންޓަރ މިލާން އިން ލީގުގެ ޗެމްޕިއަންކަން ހޯދައިފި އެވެ.

އާދީއްތަ ދުވަހުގެ ރޭ އިންޓަރގެ އަމިއްލަ ދަނޑުގައި ޕާމާއާ ދެކޮޅަށް ކުޅުނު މެޗުން އެ ޓީމު މޮޅުވެފައި ވަނީ 2-0 އިންނެވެ. މެޗުގެ ފުރަތަމަ ހާފުގައި އިންޓަރ އިން އެއް ލަނޑު ޖެހިއިރު، އަނެއް ލަނޑު އެ ޓީމުން ޖެހީ މެޗުގެ ދެ ވަނަ ހާފުގަ އެވެ.

މެޗުގެ ފުރަތަމަ ހާފުގެ އިތުރު ވަގުތުގައި އިންޓަރގެ ފުރަތަމަ ލަނޑު ޖަހައި ލީޑު ނަގައިދިނީ މާކަަސް ތުރަމް އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ ޕިއޮޓް ޒިއެލެންސްކީ އެވެ. މެޗުގައި އިންޓަރގެ ދެ ވަނަ ލަނޑު 80 ވަނަ މިނެޓުގައި ޖެހީ ހެންރިކް މިކިތާރްޔާން އެވެ. އެއީ ލައުޓާރޯ މާޓިނޭޒް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

މޮޅާ އެކު އިންޓަރ އިން ވަނީ އިޓާލިއަން ލީގުގެ ޗެމްޕިއަންކަން ހޯދައިފަ އެވެ. މިއީ އިންޓަރ އިން އިޓާލިއަން ލީގުގެ ޗެމްޕިއަންކަން ހޯދި 21 ވަނަ ފަހަރެވެ. އިންޓަރ އިން އިޓާލިއަން ލީގު ކާމިޔާބު ކޮށްފައި މި ވަނީ، ލީގުގައި މިހާތަނަށް ކުޅެފައިވާ 35 މެޗުން 82 ޕޮއިންޓާ އެކު އެވެ. ހަމަ އެ އަދަދަށް މެޗު ކުޅެގެން ދެ ވަނައިގައި ނަޕޯލީ އަށް ލިބެނީ 70 ޕޮއިންޓެވެ.