މިލާން ފަހަތަށް ޖައްސާލުމަށް ފަހު، ނަޕޯލީ ދެ ވަނަ އަށް

އިޓާލިއަން ލީގުގައި އޭސީ މިލާންއާ ދެކޮޅަށް ކުޅުނު މެޗުން މޮޅުވެ، ނަޕޯލީ އިން ލީގު ތާވަލްގެ ދެ ވަނަ މަގާމަށް ޖެހިލައިފި އެވެ.

ހޯމަ ދުވަހުގެ ރޭ ނަޕޯލީގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާބު ކުރީ 1-0 އިންނެވެ. މެޗުގައި ނަޕޯލީ އިން ލަނޑު ޖެހީ ވެސް މެޗުގެ ދެ ވަނަ ހާފުގަ އެވެ.

މެޗަށް ނިކުތްއިރު ލީގު ތާވަލްގެ ދެ ވަނައިގައި އޮތީ އޭސީ މިލާން އެވެ. ނަޕޯލީ ތިން ވަނައިގައި އޮތްއިރު، އެ ޓީމުން ވަނީ ފުރުސަތުގެ ބޭނުން ހިފައި ދެ ވަނަ އަށް ޖެހިލައިފަ އެވެ.

މެޗު ފަށައިގެން އޭސީ މިލާން އިން ކުރިއަށް ޖެހިގެން ލަނޑު ޖަހަން މަސައްކަތް ކުރަމުން ދިޔައިރު، ނަޕޯލީ އިން ވެސް ވަނީ ލަނޑު ޖަހަން މަސައްކަތް ކޮށްފަ އެވެ. މެޗުގެ ދެ ވަނަ ހާފުގެ 79 ވަނަ މިނެޓުގައި ނަޕޯލީ އިން ވަނީ އޭސީ މިލާން ކޮޅަށް ލަނޑު ޖަހައި ލީޑު ނަގައިފަ އެވެ. އެ ލަނޑު ނަޕޯލީ އަށް ޖަހައިދިނީ ބަދަލު ކުޅުންތެރިޔެއްގެ ގޮތުގައި ކުޅެން ނިކުތް މަތެއޯ ޕޮލިޓާނޯ އެވެ.

މޮޅާ އެކު ނަޕޯލީ އިން ދެ ވަނަ އަށް ޖެހިލާފައި ވަނީ މިހާތަނަށް އެ ޓީމު ކުޅެފައިވާ 31 މެޗުން 65 ޕޮއިންޓާ އެކު އެވެ. ހަމަ އެ އަދަދަށް މެޗު ކުޅެގެން ތިން ވަނައިގައި އޭސީ މިލާން އަށް ލިބެނީ 63 ޕޮއިންޓެވެ. އެއް ވަނައިގައި އިންޓަރ މިލާން އޮތީ 72 ޕޮއިންޓާ އެކު އެވެ.