އިންޓަރ މިލާން ބަލިކޮށް، އޭސީ މިލާން އިން ހަތް ޕޮއިންޓަށް ފަރަގު ކުޑަ ކޮށްފި
މެޗުން އިންޓަރ މިލާން ބަލިވެފައިވާއިރު، މި ދެ ޓީމުގެ ދެ މެދުގައި މިހާރު އޮތީ ހަތް ޕޮއިންޓުގެ ފަރަގެއް. މިހާތަނަށް ލީގުގައި ކުޅެފައިވާ 28 މެޗުން އިންޓަރ އަށް 67 ޕޮއިންޓު ލިބޭއިރު، ދެ ވަނައިގައި އޭސީ މިލާން އަށް ލިބެނީ 60 ޕޮއިންޓު.
މެޗުގައި ލަނޑު ޖެހުމަށް ފަހު އޭސީ މިލާންގެ ކުޅުންތެރިން އުފާ ފާޅު ކުރަނީ | ރޮއިޓާސް
އިޓާލިއަން ލީގުގައި އިންޓަރ މިލާންއާ ދެކޮޅަށް ކުޅުނު މެޗުން މޮޅުވެ، އެ ޓީމާ ދެމެދު އޮތް ފަރަގު އޭސީ މިލާން އިން ހަތް ޕޮއިންޓަށް ކުޑަ ކޮށްފި އެވެ.
އޭސީ މިލާންގެ އަމިއްލަ ދަނޑުގައި އާދީއްތަ ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ 1-0 އިންނެވެ. މެޗުގައި އޭސީ މިލާން އިން ލަނޑު ޖެހީ ވެސް ފުރަތަމަ ހާފުގަ އެވެ.
މެޗު ފަށައިގެން އޭސީ މިލާން އިން ރަނގަޅަށް ކުޅެފައިވާއިރު، މެޗުގެ ކުރީ ކޮޅު ވެސް އެ ޓީމަށް ވަނީ ލީޑު ނަގަން ފުރުސަތު ލިބިފަ އެވެ. އެގޮތުން އޭސީ މިލާންގެ ލޫކާ މޮޑްރިޗް ފޮނުވާލި ބޯޅަ ދިޔައީ ގޯލުގެ އަރި މަތީ ދަނޑި ކައިރިން ބޭރަށެވެ. އޭގެ ފަހުން އިންޓަރ އަށް ވެސް ލީޑު ނަގަން ފުރުސަތު ލިބުނެވެ.
މެޗުގެ ފުރަތަމަ ހާފުގެ 35 ވަނަ މިނެޓުގައި އޭސީ މިލާާން އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ޕާވިސް އެސްޓުޕިނާން އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ ޔޫސުފާ ފޮފާނާ އެވެ. އޭގެ ފަހުން މެޗުގެ ދެ ވަނަ ހާފުގައި އިންޓަރ މިލާން އަށް ނަތީޖާ ހަމަހަމަ ކުރަން ފުރުސަތު ލިބުނުއިރު، ފެޑެރިކޯ ޑިމާކޯ ފޮނުވާލި ބޯޅަ ގޯލާ އަމާޒުވާ ގޮތެއް ނުވި އެވެ.
މެޗުން އިންޓަރ މިލާން ބަލިވެފައިވާއިރު، މި ދެ ޓީމުގެ ދެ މެދުގައި މިހާރު އޮތީ ހަތް ޕޮއިންޓުގެ ފަރަގެކެވެ. މިހާތަނަށް ލީގުގައި ކުޅެފައިވާ 28 މެޗުން އިންޓަރ އަށް 67 ޕޮއިންޓު ލިބޭއިރު، ދެ ވަނައިގައި އޭސީ މިލާން އަށް ލިބެނީ 60 ޕޮއިންޓެވެ.
