ބޯޑޯ ގިލްމް އަތުން ބަލިވެ، އިންޓަރ ޕްރެޝަރަށް

ޔުއެފާ ޗެމްޕިއަންސް ލީގުގެ ޕްލޭ އޮފްގެ ފުރަތަމަ ލެގުގައި ބޯޑޯ ގިލްމްއާ ދެކޮޅަށް ކުޅުނު މެޗުން ބަލިވެ، އިންޓަރ މިލާން ޕްރެޝަރަށް ވެއްޓިއްޖެ އެވެ. 

ބޯޑޯ ގިލްމްގެ އަމިއްލަ ދަނޑުގައި ބުދަ ދުވަހުގެ ރޭ ކުޅުނު މެޗުގައި އެ ޓީމުން ވަނީ 3-1 އިން އިންޓަރ ބަލި ކޮށްފަ އެވެ. މެޗުގެ ފުރަތަމަ ހާފުގައި ބޯޑޯ ގިލްމް އިން ލަނޑު ޖަހައި ކުރި ހޯދާފައި ވަނިކޮށް، އިންޓަރ އިން ނަތީޖާ ހަމަހަމަ ވެސް ކުރި އެވެ. ނަމަވެސް ދެ ވަނަ ހާފުގައި ޖެހި ލަނޑު ތަކުން ބޯޑޯ ގިލްމް ވަނީ މެޗުން މޮޅުވެފަ އެވެ.

މެޗުގެ ފުރަތަމަ ހާފުގެ 20 ވަނަ މިނެޓުގައި ބޯޑޯ ގިލްމް އިން ލީޑު ނެގީ ސޮންޑްރީ ފެޓް ޖެހި ލަނޑުންނެވެ. އޭގެ ދިހަ މިނެޓު ފަހުން ފްރެންސެސްކޯ ޕިއޯ އެސްޕޮސިޓޯ ވަނީ ލަނޑު ޖަހައި އިންޓަރ އަށް ނަތީޖާ ހަމަހަމަ ކޮށްދީފަ އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ ކާލޮސް އޮގަސްޓޯ އެވެ. 

މެޗުގެ ދެ ވަނަ ހާފުގައި ބޯޑޯ ގިލްމް އިން އަލުން ލީޑު ނެގީ 61 ވަނަ މިނެޓުގައި ޖެންސް ހައުޖު ޖެހި ލަނޑުންނެވެ. އޭގެ ތިން މިނެޓު ފަހުން ހެސްޕާ ހޮފް ވަނީ ބޯޑޯ ގިލްމްގެ ތިން ވަނަ ލަނޑު ޖަހައި އިތުރަށް ލީޑު ފުޅާ ކޮށްފަ އެވެ. މެޗުގައި ލަނޑު ޖަހަން އިންޓަރ އިން ވަރަށް ބޮޑަށް މަސައްކަތް ކުރި ނަމަވެސް، ފުރުސަތުގެ ބޭނުން ކުރެވޭ ގޮތެއް ނުވި އެވެ.

މެޗުން މޮޅުވެ ބޯޑޯ ގިލްމް އިން މުބާރާތުގެ ގަދަ 16 ވަނަ ބުރުގެ ފުރުސަތު ބޮޑު ކޮށްފައިވާއިރު، އިންޓަރ އަށް ފުރުސަތު އޮތީ އަމިއްލަ ދަނޑުގައި ކުޅޭ ޕްލޭ އޮފްގެ ދެ ވަނަ މެޗުގައި ބޯޑޯ ގިލްމް ބަލިކޮށްގެންނެވެ. އިންޓަރ އަކީ މިދިޔަ ސީޒަންގެ ޗެމްޕިއަންސް ލީގުގެ ރަނައަޕް ޓީމެވެ.