އިންޓަރ މިލާން ބަލިކޮށް، އާސެނަލް އިން ރެކޯޑު ދަމަހައްޓައިފި

ޔުއެފާ ޗެމްޕިއަންސް ލީގުގައި އިންޓަރ މިލާންއާ ދެކޮޅަށް ކުޅުނު މެޗުން މޮޅުވެ، އާސެނަލް އިން މުބާރާތުގައި އެ ޓީމުގެ މޮޅުވުމުގެ ރެކޯޑު ދަމަހައްޓައިފި އެވެ.

އިންޓަރ މިލާންގެ އަމިއްލަ ދަނޑުގައި އަންގާރަ ދުވަހުގެ ރޭ ކުޅުނު މެޗު އާސެނަލް އިން ކާމިޔާބު ކުރީ 3-1 އިންނެވެ. މެޗުގެ ފުރަތަމަ ހާފުގައި އާސެނަލް އިން ލީޑު ނަގާފައި ވަނިކޮށް، އިންޓަރ އިން ނަތީޖާ ހަމަހަމަ ވެސް ކުރި އެވެ. ނަމަވެސް ފުރަތަމަ ހާފުގައި އާސެނަލް އިން ދެ ވަނަ ލަނޑެއް ޖެހިއިރު، އަނެއް ލަނޑު ޖެހީ ދެ ވަނަ ހާފުގަ އެވެ.

މެޗު ފަށައިގެން 10 ވަނަ މިނެޓުގައި އާސެނަލް އަށް ލީޑު ނަގައިދިނީ ގެބްރިއަލް ޖީސުސް އެވެ. އެއީ ޔޫރިއަން ޓިމްބާ ތަނަވަސްކޮށްދިން ފުރެސަތެއްގައި އޭނާ ޖެހި ލަނޑެކެވެ. އޭގެ އަށް މިނެޓު ފަހުން ޕީޓާ ސުސިކް ވަނީ ލަނޑު ޖަހައި އިންޓަރ އަށް ނަތީޖާ ހަމަހަމަ ކޮށްދީފަ އެވެ. 

ދެ ވަނަ ފަހަރަށް މެޗުގައި އާސެނަލް އިން ލީޑު ނެގީ 31 ވަނަ މިނެޓުގަ އެވެ. ލިއާންޑްރޯ ޓްރޮސާޑް ތަނަވަސްކޮށްދިން ފުރުސަތެއްގައި އާސެނަލް އަށް އެ ލަނޑު ވެސް ޖަހައިދިނީ ޖީސުސް އެވެ. އޭގެ ފަހުން މެޗުގެ ފުރިހަމަ ވަގުތު ހަމަވާން ހަ މިނެޓަށް ވެފައި ވަނިކޮށް އާސެނަލްގެ ތިން ވަނަ ލަނޑު ޖެހީ ވިކްޓާ ޔޮކަރޭޝް އެވެ.

މޮޅާއެކު އާސެނަލްް އިން ލީގު ތާވަލްގެ އެއް ވަނަ މަގާމުގައި އޮތީ މިހާތަނަށް ކުޅެފައިވާ ހަތް މެޗުން ވެސް މޮޅުވެ 21 ޕޮއިންޓާ އެކު އެވެ. މިިއީ ޗެމްޕިއަންސް ލީގުގައި ޖެހި ޖެހިގެން ހަތް މެޗުން އާސެނަލް މޮޅުވި ފުރަތަމަ ފަހަރު ކަމަށްވާއިރު، މި ސީޒަންގެ ޗެމްޕިއަންސް ލީގުގައި މިހާތަނަށް ބަލި ނުވެ އޮތް ހަމައެކަނި ޓީމަކީ ވެސް އާސެނަލް އެވެ.