ފަހު ވަގުތު ޔުވެންޓަސް ބަލިކޮށް، އިންޓަރ އިން ލީޑު ފުޅާ ކޮށްފި

އިޓާލިއަން ލީގުގައި ޔުވެންޓަސްއާ ދެކޮޅަށް ކުޅުނު މެޗުން ފަހު ވަގުތު މޮޅުވެ، އިންޓަރ މިލާން އިން އެއް ވަނައިގައި ލީޑު ފުޅާ ކޮށްފި އެވެ.

ހޮނިހިރު ދުވަހުގެ ރޭ ދަންވަރު އިންޓަރގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާބު ކުރީ 3-2 އިންނެވެ. މެޗުގައި ދެ ފަހަރު އިންޓަރ އިން ލީޑު ނެގިއިރު ވެސް، ޔުވެންޓަސް އިން ނަތީޖާ ހަމަހަމަ ކުރި އެވެ. ނަަމަވެސް، ފަހު ވަގުތުގައި ލަނޑު ޖަހައިގެން އިންޓަރ ވަނީ މެޗުން މޮޅުވެފަ އެވެ.

މެޗު ފަށައިގެން 17 ވަނަ މިނެޓުގައި އިންޓަރ އަށް ލީޑު ލިބުނީ ޔުވެންޓަސްގެ އެންޑްރިއާ ކަމްބިއާސޯ އަތުން ބައި ކޮޅަށް ވަތް ލަނޑުންނެވެ. އޭގެ ފަހުން މެޗުގެ 26 ވަނަ މިނެޓުގައި ކަމްބިއާސޯ ވަނީ ލަނޑު ޖަހައި ޔުވެންޓަސް އަށް ނަތީޖާ ހަމަހަމަ ކޮށްދީފަ އވެެ. މެޗުގައި ޔުވެންޓަސް އަށް އެންމެ ބޮޑު ގެއްލުމެއް ދެއްކީ ފުރަތަމަ ހާފުގެ ފަހު ވަގުތު އެ ޓީމުގެ ޕިއެރޭ ކަލޫލޫ އަށް ދެ ވަނަ ރީނދޫ ކާޑާ އެކު ރަތް ކާޑު ދެއްކުމުންނެވެ.

މެޗުގެ ދެ ވަނަ ހާފުގެ 76 ވަނަ މިނެޓުގައި ދެ ވަނަ ފަހަރަށް އިންޓަރ އަށް ލީޑު ނަގައިދިނީ ފްރެންސެސްކޯ ޕިއޯ އެސްޕޮސިޓޯ އެވެ. މެޗުގައި އޭނާ ކުޅެން ނިކުތީ ވެސް ބަދަލު ކުޅުންތެރިޔެއްގެ ގޮތުގަ އެވެ. އޭގެ ފަހުން މެޗުގެ ފުރިހަމަ ވަގުތު ހަަމަވާން ހަތް މިނެޓަށް ވެފައި ވަނިކޮށް ޔުވެންޓަސް އަށް ނަތީޖާ ހަމަހަމަ ކޮށްދިނީ މެނުއެލް ލޮކަޓެލީ އެވެ. މެޗުގެ ފަހު ވަގުތު އިންޓަރ މޮޅުވެފައި ވަނީ ޕިއޮޓް ޒިއެލެންސްކީ ޖެހި ލަނޑުންނެވެ.

މޮޅާއެކު އިންޓަރ އެއް ވަަނައިގައި އޮތީ މިހާތަނަށް އެ ޓީމު ކުޅެފައިވާ 25 މެޗުން 61 ޕޮއިންޓާ އެކު އެވެ. އެއް ވަނައިގައި އިންޓަރ އިން އަށް ޕޮއިންޓުގެ ލީޑެއް ނެގިއިރު، ދެ ވަނައިގައި އޭސީ މިލާާން އޮތީ 24 މެޗުން 53 ޕޮއިންޓާ އެކު އެވެ.