ހަ ލަނޑުގެ މޮޅާ އެކު، އިންޓަރ އަށް ހަ ޕޮއިންޓުގެ ލީޑެއް

އިޓާލިއަން ލީގުގައި ޕިސާއާ ދެކޮޅަށް ކުޅުނު މެޗުން މޮޅުވެ، އިންޓަރ މިލާން އިން ލީގު ތާވަލްގެ އެއް ވަނަ މަގާމުގައި ލީޑު ފުޅާ ކޮށްފި އެވެ. 

އިންޓަރގެ އަމިއްލަ ދަނޑުގައި ހުކުރު ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ 6-2 އިންނެވެ. މެޗުގައި ޕިސާ އިން ދެ ލަނޑު ޖަހައި ކުރި ހޯދާފައި ވަނިކޮށް، އިންޓަރ އިން ވަނީ ފަހަތުން އަރައި ހަ ލަނޑު ޖަހައިގެން މެޗުން މޮޅުވެފަ އެވެ. 

މެޗު ފަށައިގެން 11 ވަނަ މިނެޓުގައި ޕިސާ އަށް ލީޑު ނަގައިދިނީ ސްޓެފާނޯ މޮރިއޯ އެވެ. އޭގެ ފަހުން މެޗުގެ 23 ވަނަ މިނެޓުގައި މޮރިއޯ ވަނީ ދެ ވަނަ ލަނޑެއް ޖަހައި ޕިސާ އަށް ލީޑު ފުޅާ ކޮށްދީފަ އެވެ. 

މެޗުގެ 39 ވަނަ މިނެޓުގައި އިންޓަރ އަށް ލިބުނު ޕެނަލްޓީ ކާމިޔާބުކޮށް އެ ޓީމަށް ފަރަގު ކުޑަ ކޮށްދިނީ ޕިއޮޓް ޒިއެލެންސްކީ އެވެ. އޭގެ ދެ މިނެޓު ފަހުން ލައުޓާރޯ މާޓިނޭޒް ވަނީ ލަނޑު ޖަހައި އިންޓަރ އަށް ނަތީޖާ ހަމަހަމަ ކޮށްދީފަ އެވެ. އަދި ފުރަތަމަ ހާފުގެ އިތުރު ވަގުތުގައި އިންޓަ އަށް ލީޑު ނަގައިދިނީ ފްރެންސެސްކޯ ޕިއޯ އެސްޕޮސިޓޯ އެވެ.

މެޗުގައި އިންޓަރ އިން އެ ޓީމުގެ ބާކީ ތިން ލަނޑު ވެސް ޖެހީ ފަހު ދިހަ މިނެޓުގެ ތެރޭގަ އެވެ. އެގޮތުން 82 ވަނަ މިނެޓުގައި އިންޓަރގެ ހަތަރު ވަނަ ލަނޑު ފެޑެރިކޯ ޑިމާކޯ ޖެހިއިރު، އޭގެ ހަތަރު މިނެޓު ފަހުން އަންގޭ ބޮނީ ވަނީ އެ ޓީމުގެ ފަސް ވަނަ ލަނޑު ޖަހައިފަ އެވެ. އަދި މެޗުގައި އިންޓަރގެ ހަ ވަނަ ލަނޑު ޖެހީ ހެންރިކް ޚިތަރްޔަން އެވެ. 

މޮޅާ އެކު އިންޓަރ އިން ވަނީ އެއް ވަނައިގައި ހަ ޕޮއިންޓުގެ ލީޑެއް ނަގައިފަ އެވެ. މިހާތަނަށް ލީގުގައި ކުޅެފައިވާ 22 މެޗުން އިންޓަރ އަށް ލިބެނީ 52 ޕޮއިންޓެވެ. އިންޓަރ އަށް ވުރެ އެއް މެޗު މަދުން ކުޅެގެން ދެ ވަނައިގައި އޭސީ މިލާން އަށް ލިބެނީ 46 ޕޮއިންޓެވެ.