މޮޑްރިޗްގެ ލަނޑުން، އޭސީ މިލާން މޮޅުވެއްޖެ

އިޓާލިއަން ލީގުގައި ޕިސާއާ ދެކޮޅަށް ކުޅުނު މެޗުން މޮޅުވެ، އޭސީ މިލާން އިން ލީގު ރޭހުގައި ހިފަހައްޓައިފި އެވެ. 

ހުކުރު ދުވަހުގެ ރޭ ޕިސާގެ އަމިއްލަ ދަނޑުގައި ކުޅުނު މެޗު އޭސީ މިލާން އިން ކާމިޔާބު ކުރީ 2-1 އިންނެވެ. މެޗުގައި އޭސީ މިލާން އިން ލަނޑު ޖަހައި ކުރި ހޯދާފައި ވަނިކޮށް، ޕިސާ އިން ނަތީޖާ ހަމަހަމަ ވެސް ކުރި އެވެ. ނަމަވެސް، ދެ ވަނަ ލަނޑެއް ޖަހައިގެން އޭސީ މިލާން ވަނީ މެޗުން މޮޅުވެފަ އެވެ.

މެޗުގެ ފުރަތަމަ ހާފުގެ 39 ވަނަ މިނެޓުގައި އޭސީ މިލާން އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ރުބެން ލޮފްޓުސް ޗީކް އެވެ. އޭގެ ފަހުން ދެ ވަނަ ހާފުގައި ލީޑު ފުޅާ ކުރަން ލިބުނު ފުރުސަތުގައި އޭސީ މިލާންގެ ނިކޮލަސް ފުލްކްރުގް ފޮނުވާލި ޕެނަލްޓީ ކާމިޔާބެއް ނުވި އެވެ.

މެޗުގެ 71 ވަނަ މިނެޓުގައި ޕިސާ އިން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. އެ ޓީމަށް ނަތީޖާ ހަމަހަމަ ކޮށްދިނީ ފެލިޕޭ ލޮޔޯލާ އެވެ. އޭގެ ފަހުން މެޗުގެ ފުރިހަމަ ވަގުތު ހަމަވާން ފަސް މިނެޓަށް ވެފައި ވަނިކޮށް، އޭސީ މިލާން މޮޅުވީ ލޫކާ މޮޑްރިޗް ޖެހި ލަނޑުންންނެވެ. 

މޮޅާ އެކު އޭސީ މިލާން އޮތީ ލީގު ތާވަލްގެ ދެ ވަނަ މަގާމުގަ އެވެ. އެއީ މިހާތަނަށް ލީގުގައި ކުޅެފައިވާ 24 މެޗުން 53 ޕޮއިންޓާ އެކު އެވެ. އޭސީ މިލާާން އާއި، އެއް ވަނައިގައި އޮތް އިންޓަރ މިލާންއާ ދެމެދު އޮތީ ފަސް ޕޮއިންޓުގެ ފަރަގެކެވެ. އެއް ވަަނައިގައި އިންޓަރ އަށް ލިބެނީ 58 ޕޮއިންޓެވެ.